កូវីដ១៩ - La Reine Media

COVID-19! នាវាទេសចរណ៍នៅជប៉ុនមួយគ្រឿងទៀតហើយ ដែលក្លាយជាសម្បុកមេរោគរលាកសួតថ្មី

នាវាទេសចរណ៍របស់ប្រទេសអ៊ីតាលីមួយគ្រឿងដែលកំពុងចតនៅកំពង់ផែប្រទេសជប៉ុនដើម្បីជួសជុល បានក្លាយជាសម្បុកមេរោគ COVID-19 ខណៈមកដល់ពេលនេះ វាមានអ្នកជំងឺកូរ៉ូណាប្រភេទថ្មី យ៉ាងតិច48នាក់។

នៅថ្ងៃនេះ (23មេសា) មន្ត្រីនៅ Nagasaki ប្រទេសជប៉ុនបានឱ្យដឹងថា នាវាទេសចរណ៍អ៊ីតាលី Costa Atlantica មានអ្នកជំងឺ COVID-19 យ៉ាងតិចចំនួន48នាក់។ នាវា Costa Atlantica បានក្លាយជាសម្បុកមេរោគលើផ្ទៃទឹកទី2នៅជប៉ុន បន្ទាប់នាវា Diamond Princess ដែលមានអ្នកជំងឺកូរ៉ូណាសរុប700នាក់។ ក៏ប៉ុន្តែ នាវា Costa Atlantica វិញ មានតែក្រុមនាវិកប៉ុណ្ណោះដែលកំពុងនៅលើនាវា ព្រោះថា វាកំពុងចតនៅកំពង់ផែ Nagasaki ដើម្បីជួសជុល។

នាវាខាងលើនេះ បានទៅកាន់រោងចក្រសាងសង់នាវាមួយនៅតំបន់ Nagagaki កាលពីចុងខែកុម្ភៈ ក្រោយពី COVID-19 បានធ្វើឱ្យគម្រោងជួសជុលរបស់ពួកគេនៅប្រទេសចិនមុននោះត្រូវបានលុបចោល។

អ្នកជំងឺកូរ៉ូណាថ្មីចំនួន14នាក់ដែលត្រូវបានរកឃើញនៅលើនាវា Costa Atlantica បានធ្វើឱ្យមានការព្រួយបារម្ភថា វាអាចនាំឱ្យឆ្លងដល់ប្រជាជនក្នុងតំបន់ Nagasaki។ មុននេះ មានព័ត៌មានក្រៅផ្លូវការបានឱ្យដឹងថា នាវិកមួយចំនួនបានចាកចេញពីតំបន់ដែលគេបានកំណត់ បើទោះជាក្រុមហ៊ុន Costa Cruises (Italia) ដែលជាអ្នកគ្រប់គ្រងនាវា Costa Atlantica បានសន្យាថា ក្រុមនាវិករបស់ខ្លួននឹងនៅតែក្នុងតំបន់រោងចក្រសាងសង់នាវាដែលពួកគេកំពុងស្ថិតនៅក៏ដោយ។

នាវាទេសចរណ៍របស់អ៊ីតាលីនេះ មាននាវិក និងអ្នកបម្រើចំនួន623នាក់ និងមិនមានភ្ញៀវទេសចរណ៍នោះទេ។ សមាជិកក្រុមនាវិកម្នាក់ ដែលបានឆ្លងវីរុស COVID-19 កំពុងទទួលការព្យាបាលនៅឯមន្ទីរពេទ្យ។ អ្នកជំងឺនេះកំពុងស្ថិតក្នុងស្ថានភាពគ្រោះថ្នាក់ដល់ជីវិត និងត្រូវប្រើម៉ាស៊ីនជំនួយដង្ហើម។

ចំណែកអ្នកជំងឺ47នាក់ផ្សេងទៀត កំពុងបង្ខាំងខ្លួននៅក្នុងបន្ទប់ដោយឡែក។ ពួកគេមិនទាន់មានអាការរោគធ្ងន់ធ្ងរនៅឡើយ។

សារព័ត៌មាន AP បានឱ្យដឹងថា មន្ត្រីជប៉ុនកំពុងតែស្រាវជ្រាវរកប្រភពចម្លងរបស់សម្បុកមេរោគនេះ ខណៈដែលតំបន់ Nagasaki មានអ្នកជំងឺតែ17នាក់ប៉ុណ្ណោះ។ ក្រុមមន្ត្រីជប៉ុនបានសង្ស័យថា មេរោគប្រហែលជាបានឆ្លងនៅពេលដែលបុគ្គលិកនៃក្រុមនាវិកបានចេញទៅក្រៅ ឬបានឆ្លងនៅពេលនាវានេះបានប្ដូរនាវិកកាលពីប៉ុន្មានសប្ដាហ៍មុន។

បច្ចុប្បន្ន ជប៉ុនមានអ្នកជំងឺកូរ៉ូណាសរុបប្រមាណជាជិត12,000នាក់ និងជិត300នាក់បានបាត់បង់ជីវិត។ តួលេខនេះ មិនបានរាប់បញ្ចូលទាំងអ្នកជំងឺនៅលើនាវា Diamond Princess នោះទេ៕

ប្រភព៖ Channel News Asia

April 23, 2020

WHO ដាស់តឿនពិភពលោក៖ កុំប្រហែស! ព្រោះ កូវីដ-19 នៅជាមួយយើងយូរតទៅទៀត…

ខណៈដែលប្រទេសជាច្រើនកំពុងស្ថិតក្នុងអំឡុងពេលបន្ធូរបន្ថយវិធានការបិទប្រទេស ដើម្បីកាត់បន្ថយផលប៉ះពាល់ខាងសេដ្ឋកិច្ច ដែលបណ្ដាលមកពីការឆ្លងរាលដាលរបស់វីរុសកូរ៉ូណាប្រភេទថ្មី ឬកូវីដ-19 នោះ លោក ថេដ្រូស អាត់ហាណូម គីប្រ៊ីយេស៊ុស ប្រធានអង្គការសុខភាពពិភពលោក ឬ WHO បានចេញមកដាស់តឿនប្រទេសនានាថា ចូរកុំធ្វើអ្វីខុសឆ្គងឱ្យសោះ ព្រោះនៅមានដំណើរផ្លូវវែងឆ្ងាយតទៅទៀត ដែលត្រូវដើរ ហើយវីរុសកូវីដ-19 នឹងនៅជាមួយយើងយូរតទៅទៀត។

លោក គីប្រ៊ីយេស៊ុស ថ្លែងថា “ប្រទេសភាគច្រើន នៅតែកំពុងស្ថិតក្នុងដំណាក់កាលដំបូងនៃការឆ្លងរាលដាលប៉ុណ្ណោះ ខណៈដែលប្រទេស ដែលមានការឆ្លងរាលដាលតាំងពីដំបូងៗនោះ ខណៈនេះ ក៏កំពុងរកឃើញការឆ្លងរាលដាលថ្មីៗកើតឡើងដូចគ្នា..”

លោកប្រធានអង្គការ WHO បានសម្ដែងក្ដីកង្វល់ពាក់ព័ន្ធនឹងសញ្ញានៃការកើនឡើងក្នុងការឆ្លងរាលដាលដ៏ធំមួយនៅក្នុងផ្លែកខ្លះរបស់ទ្វីបអាហ្វ្រិក ខណៈដែលការឆ្លងរាលដាលនៅក្នុងអឺរ៉ុបខាងលិច មើលទៅហាក់ដូចជាកំពុងស្ថិតក្នុងសភាវស្មើ និងថយចុះជាបណ្ដើរៗហើយ។

លោក គីប្រ៊ីយេស៊ុស បានដាស់តឿនថា នៅតែមានចន្លោះប្រហោងជាច្រើនទៀត ក្នុងការដាក់វិធានការដើម្បីការពារការឆ្លងរាលដាលរបស់មេរោគវីរុសកូវីដ-19 ទូទាំងពិភពលោក និងគ្មានប្រទេសណាមួយក្នុងពិភពលោក មានភាពត្រៀមខ្លួនរួចជាស្រេចគ្រប់យ៉ាងឡើយ។ ប្រទេសនានាចាំបាច់ត្រូវចំណាយប្រាក់ពាក់ព័ន្ធនឹងការត្រៀមខ្លួនឱ្យរួចជាស្រេច ព្រោះក្នុងខណៈពេលនេះ មានត្រឹមតែ 76% ប៉ុណ្ណោះ ដែលមានប្រព័ន្ធតាមដានដែលអាចត្រួតពិនិត្យរកអ្នកឆ្លងមេរោគបាន។

ស្ថិតក្រោមពាក្យរិះគន់ថា WHO ឆ្លើយតបនឹងការឆ្លងរាលដាលរបស់មេរោគកូវីដ-19 មិនបានល្អគ្រប់គ្រាន់នោះ លោកគីប្រ៊ីយេស៊ុស នៅតែអះអាងថា ការប្រកាសសភាវអាសន្នកម្រិតពិភពលោក ដែលជាការប្រកាសកម្រិតខ្ពស់បំផុតរបស់អង្គការមួយនេះកាលពីថ្ងៃទី30 មករាកន្លងទៅ គឺជាពេលវេលាដែលសមរម្យហើយ និងស្ថិតក្នុងអំឡុងពេលដែលពិភពលោកមានពេលវេលាល្មមគ្រប់គ្រាន់ សម្រាប់ទប់ទល់នឹងស្ថានការណ៍ទាំងនោះ ដោយខណៈនោះ មានអ្នកឆ្លងមេរោគកូវីដ-19 នៅក្រៅប្រទេសចិន មានត្រឹមតែ 82នាក់ប៉ុណ្ណោះ។

ចំណែកលោក ម៉ៃក៏ រ៉ៃអាន់ អ្នកជំនាញការរបស់អង្គការ WHO បានដាស់តឿនថា ការបើកដំណើរការទេសចរណ៍លឿនជ្រុលពេក ត្រូវមានការគ្រប់គ្រងចាត់ការភាពប្រថុយប្រថានយ៉ាងប្រុងប្រយ័ត្ន ព្រោះខណៈពេលនេះ ក្នុងតំបន់ខ្លះរបស់ទ្វីបអាហ្វ្រិក ដូចជា សូម៉ាលី ជាដើម បានរកឃើញការកើនឡើងនៃអ្នកឆ្លងមេរោគដល់ទៅជិត 300% ក្នុងអំឡុងសប្ដាហ៍កន្លងទៅ ដែលការណ៍នេះបានបង្ហាញឱ្យឃើញថា ស្ថានការណ៍ការឆ្លងរាលដាលធំនៅក្នុងទ្វីបអាហ្វ្រិក ទើបតែចាប់ផ្ដើមប៉ុណ្ណោះ៕

ប្រភព៖ សារព័ត៌មានបរទេស

April 23, 2020

WHO ព្រមានថា បញ្ហាអាក្រក់បំផុតនៃ COVID-19 កំពុងរង់ចាំនៅខាងមុខ

ខណៈដែលប្រទេសមួយចំនួន បានចាប់ផ្ដើមបន្ធូរបន្ថយបម្រាមគោចរ ឬបន្ថយការរឹតបន្តឹងទៅលើការដើរហើរដែលត្រូវបានធ្វើឡើងកន្លងមកដើម្បីទប់ស្កាត់ការឆ្លងរាលដាលនៃវីរុស COVID-19 អង្គការសុខភាពពិភពលោក(WHO) បានចេញមកព្រមានថា បញ្ហាអាក្រក់បំផុតនៅតែស្ថិតនៅខាងមុខនៅឡើយ។

AFP ដកស្រង់សម្ដីរបស់ប្រធានអង្គការសុខភាពពិភពលោក(WHO) លោក Tedros Adhanom Ghebreyesus ដែលថ្លែងនៅក្នុងសន្និសីទសារព័ត៌មានមួយកាលពីថ្ងៃទី20មេសា បានឱ្យដឹដងថា “យើងត្រូវការសាមគ្គីភាពទូទាំងពិភពលោក ដោយយោងទៅលើការប្រមូលផ្ដុំនៃសាមគ្គីភាពរបស់បណ្ដាប្រជាជាតិ។ បើសិនជាមិនមានប្រការទាំង2នេះទេ សូមជឿយើងខ្ញុំថា បញ្ហាអាក្រក់បំផុតនៅតែមានវត្តមាននៅខាងមុខ។ ចូរទប់ស្កាត់សោកនាដកម្មនេះ។ នោះគឺជាវីរុសដែលមនុស្សជាច្រើនមិនទាន់យល់អំពីវា”។

មេដឹកនាំអង្គការ WHO បានបន្ថែមថា “យើងបានព្រមានរួចហើយថា វីរុសនេះថែមទាំងអាចគ្របដណ្ដប់ទាំងបណ្ដាប្រទេសអភិវឌ្ឍ។ ហើយជាក់ស្ដែង វាពិតជាដូច្នេះមែន។ យើងនិយាយថា វានឹងធ្វើឱ្យប្រទេសអ្នកមាន នឹកស្មានមិនដល់។ ចូរទប់ស្កាត់សោកនាដកម្មនេះ។ មនុស្សរាប់សែននាក់កំពុងតែស្លាប់ជាបន្តបន្ទាប់។ ជីវិតមនុស្សម្នាក់ក៏មានតម្លៃកាត់ថ្លៃមិនបាន។ ចូរនិយាយថា៖ មកដល់ត្រឹមនេះគឺគ្រប់គ្រាន់ហើយ”។

លោក Tedros ក៏បានថ្លែងថា ការមិនចុះសម្រុងគ្នាផ្នែកនយោបាយនៃបណ្ដាប្រទេស ក៏អាចបណ្ដាលឱ្យស្ថានភាពនៃរោគរាតត្បាតកាន់តែអាក្រក់ជាងមុន បើសិនជាមេដឹកនាំប្រទេសនានា មិនសហការគ្នាក្នុងការទប់ទល់នឹងវីរុសនេះ។ លោកបន្តថា “ចូរកុំកេងចំណេញទៅលើវិបត្តិសុខភាពនេះដើម្បីធ្វើជាទីលានប្រយុទ្ធគ្នា ឬដើម្បីបានផលប្រយោជន៍ផ្នែកនយោបាយ។ ប្រការនេះពិតជាគ្រោះថ្នាក់ខ្លាំងណាស់ ហើយវាដូចទៅនឹងការដែលយើងប្រលែងជាមួយភ្លើងយ៉ាងដូច្នោះដែរ។ ចូរសហការគ្នា។ យើងត្រូវការសាមគ្គីភាពរវាងប្រជាជាតិ”។

ការព្រមាន និងការអំពាវនាវរបស់លោក Tedros ត្រូវបានធ្វើឡើងក្នុងពេលដែល COVID-19 បានសម្លាប់មនុស្សជាង170,000នាក់ ក្នុងចំណោមអ្នកជំងឺសរុបជិត2.5លាននាក់នៅទូទាំងពិភពលោក។ ប្រទេសមួយចំនួនបាន និងកំពុងចាប់ផ្ដើមបន្ធូរបន្ថយការរឹតត្បិតការដើរហើរ ហើយប្រទេសខ្លះក៏កំពុងរៀបចំបើកដំណើរការសេដ្ឋកិច្ចប្រទេសជាតិឡើងវិញ ដោយពួកគេយល់ថា “ដំណាក់កាលអាក្រក់បំផុត” បានកន្លងផុតទៅហើយ៕

ប្រភព៖ សារព័ត៌មានបរទេស

April 21, 2020

COVID-19 នៅអាស៊ីអាគ្នេយ៍៖ សិង្ហបុរីឈរកំពូលតារាង ខណៈដែល4ប្រទេសទៀតមិនទាន់មានករណីស្លាប់

នៅអាស៊ីអាគ្នេយ៍ តួលេខនៃអ្នកជំងឺ COVID-19 បានកើនលើស30,000នាក់។ សិង្ហបុរីគឺជាសម្បុកមេរោគធំជាងគេបង្អស់ក្នុងតំបន់នេះ ដោយមានអ្នកជំងឺសរុប8,014នាក់ កើន1,426ករណី ក្នុងរយៈពេល24ម៉ោងចុងក្រោយនេះ ក្នុងនោះមានអ្នកស្លាប់សរុប11នាក់។

ក្រសួងសុខាភិបាលសិង្ហបុរី បានឱ្យដឹងថា ករណីឆ្លងថ្មីភាគច្រើននៅក្នុងជំរំស្នាក់នៅរបស់ពលករបរទេស ខណៈដែល16ករណីគឺជាជនជាតិសិង្ហបុរី និងអ្នកស្នាក់នៅអចិន្ត្រៃយ៍។ 90%នៃអ្នកជំងឺសរុបនៅសិង្ហបុរី គឺជាប់ទាក់ទងជាមួយបុគ្គលិកបរទេស។

ឥណ្ឌូនេស៊ី មានអ្នកជំងឺថ្មី185នាក់ និងអ្នកជំងឺសរុប6,760នាក់ ខណៈអ្នកស្លាប់ថ្មីមាន8នាក់ និងអ្នកស្លាប់សរុបឡើងដល់590នាក់ ក្នុងនោះមានវេជ្ជបណ្ឌិត20រូបផងដែរ។

ហ្វីលីពីន៖ អ្នកស្លាប់សរុបបានកើនដល់428នាក់ បន្ទាប់ពីមានករណីស្លាប់ថ្មី19នាក់កាលពីម្សិលមិញ។ អ្នកជំងឺថ្មីមានចំនួន200នាក់ និងអ្នកជំងឺសរុបមាន 6,459នាក់។

ម៉ាឡេស៊ី មានអ្នកជំងឺថ្មី36នាក់ និងអ្នកជំងឺសរុបមាន 5,425នាក់ ក្នុងនោះមានអ្នកស្លាប់89នាក់។

ប្រទេសថៃ៖ ថ្ងៃនេះបានរាយការណ៍ថា មានអ្នកជំងឺថ្មី27នាក់ ក្នុងចំណោមអ្នកជំងឺសរុប2,792នាក់។ ចំនួនអ្នកស្លាប់សរុបនៅប្រទេសនេះមាន47នាក់។

ឡាវ និងទីម័រខាងកើតនៅតែជាប្រទេសដែលមានអ្នកជំងឺCOVID-19 តិចជាងគេបង្អស់ក្នុងតំបន់អាស៊ិអាគ្នេយ៍ ដោយមានអ្នកជំងឺសរុបជាបន្តបន្ទាប់គឺ19 និង22នាក់។ វៀតណាម ឡាវ កម្ពុជា និងទីម័រខាងកើតគឺជាបណ្ដាប្រទេសនៅអាស៊ីអាគ្នេយ៍ដែលមិនទាន់មានករណីស្លាប់ដោយសារវីរុស COVID-19 នៅឡើយ៕

ប្រភព៖ សារព័ត៌មានបរទេស

April 21, 2020

ជិត170,000នាក់ស្លាប់ដោយសារ COVID-19 នៅទូទាំងពិភពលោក

សកលលោកទាំងមូលមានអ្នកស្លាប់ជិត170,000នាក់ ក្នុងចំណោមអ្នកជំងឺCOVID-19 ជិត2.5លាននាក់ ដែលភាគច្រើននៅសហរដ្ឋអាមេរិក និងបណ្ដាប្រទេសនៅអឺរ៉ុប។

ស្ថិតិរបស់សាកលវិទ្យាល័យ Johns Hopkins របស់សហរដ្ឋអាមេរិក បានឱ្យដឹងថា មនុស្សចំនួន 2,470,410នាក់ បានឆ្លងវីរុស COVID-19 នៅក្នុងប្រទេស និងដែនដីចំនួន210 នៅទូទាំងពិភពលោក ក្នុងនោះមាន 169,595នាក់បានស្លាប់។ អ្នកជំងឺថ្មី កើន76,117នាក់ និងអ្នកស្លាប់ថ្មីកើន4,657នាក់ បើធៀបនឹងម្សិលមិញ។

សហរដ្ឋអាមេរិក នៅតែជាសម្បុកមេរោគធំជាងគេបង្អស់ក្នុងពិភពលោក ដោយមានអ្នកជំងឺសរុប782,159នាក់ អ្នកស្លាប់សរុប41,872នាក់។ អ្នកជំងឺ COVID-19 ដែលបានជាសះស្បើយក្នុងប្រទេសនេះ កើនដល់71,832នាក់។

អេស្ប៉ាញគឺជាសម្បុកមេរោគធំជាងគេទី2ក្នុងពិភពលោក ដោយមានអ្នកស្លាប់20,852នាក់ ខណៈដែលអ្នកជំងឺថ្មីមានចំនួន4,266នាក់ ធ្វើឱ្យចំនួនអ្នកជំងឺសរុបឡើងដល់200,210នាក់។ ប្រទេសនេះទើបបានជួបតួលេខនៃអ្នកស្លាប់ដោយសារ COVID-19 ទាបបំផុតក្នុងអំឡុង1ខែមកនេះ ហើយក៏ជាលើកដំបូងដែលអេស្ប៉ាញមានអ្នកស្លាប់តិចជាង400នាក់ក្នុង1ថ្ងៃ រាប់ចាប់ពីរោគរាតត្បាតនេះឆ្លងដល់ប្រទេសនេះ។

អ៊ីតាលី៖ អ្នកជំងឺថ្មី2,256នាក់ អ្នកជំងឺសរុប181,228នាក់ ខណៈអ្នកស្លាប់ថ្មី454នាក់ អ្នកស្លាប់សរុប24,114នាក់។

បារាំង៖ អ្នកជំងឺថ្មី3,585នាក់ អ្នកស្លាប់ថ្មី574នាក់ និងអ្នកជំងឺសរុប156,479នាក់ អ្នកស្លាប់សរុប20,292នាក់។

អាល្លឺម៉ង់៖ អ្នកជំងឺថ្មី1,469នាក់ អ្នកស្លាប់ថ្មី120នាក់ ចំណែកអ្នកជំងឺសរុបមាន146,653នាក់ និងអ្នកស្លាប់សរុប4,706នាក់។

អង់គ្លេស៖ អ្នកជំងឺថ្មី4,676នាក់ អ្នកស្លាប់ថ្មី449នាក់ និងអ្នកជំងឺសរុប124,743នាក់ អ្នកស្លាប់សរុប16,509នាក់។

ប្រទេសចិន៖ តួលេខចុងក្រោយបង្ហាញថា ប្រទេសនេះមានអ្នកជំងឺសរុប83,817នាក់ និងអ្នកស្លាប់សរុប4,636នាក់។

អ៊ីរ៉ង់នៅតែជាសម្បុកមេរោគធំជាងគេទី2នៅអាស៊ី បន្ទាប់ពីប្រទេសចិន ដោយមានអ្នកជំងឺសរុប83,505នាក់ ក្នុងនោះមានអ្នកស្លាប់5,209នាក់។ អ្នកជំងឺថ្មី និងអ្នកស្លាប់ថ្មីនៅប្រទេសនេះ គឺមាន1,294 និង91នាក់៕

ប្រភព៖ សារព័ត៌មានបរទេស

April 21, 2020

ជិត160,000នាក់ស្លាប់ដោយសារCOVID-19 នៅទូទាំងពិភពលោក

នៅក្នុងពិភពលោកទាំងមូល អ្នកស្លាប់ដោយសារឆ្លងវីរុសCOVID-19 បានកើនឡើងជិតដល់160,000នាក់ ក្នុងចំណោមអ្នកជំងឺជាង2.3លាននាក់ ដែលភាគច្រើនគឺនៅសហរដ្ឋអាមេរិក និងបណ្ដាប្រទេសនៅទ្វីបអឺរ៉ុប។

ស្ថិតិពីសាកលវិទ្យាល័យ Johns Hopkins បានឱ្យដឹងថា ពិភពលោកបានរកឃើញអ្នកផ្ទុកវីរុសCOVID-19 ចំនួន2,317,759នាក់ នៅក្នុងប្រទេសនិងដែកដីចំនួន210 ក្នុងនោះមាន159,691នាក់បានបាត់បង់ជីវិត និង592,319នាក់បានជាសះស្បើយ។

សហរដ្ឋអាមេរិកនៅតែជាសម្បុកមេរោគធំជាងបង្អស់ក្នុងពិភពលោក ដោយមានអ្នកជំងឺ732,197នាក់ និងអ្នកស្លាប់38,721នាក់ ខណៈ64,697នាក់បានជាសះស្បើយ។

រដ្ឋ New York ដែលជាស្នូលនៃរោគរាតត្បាតCOVID-19 នៅសហរដ្ឋអាមេរិក មានអ្នកជំងឺដល់ទៅ222,284នាក់ ក្នុងនោះមាន14,636នាក់បានបាត់បង់ជីវិត។ រដ្ឋនេះនៅតែបន្តពន្យារសុពលភាពនៃបម្រាមគោចររហូតដល់ថ្ងៃទី15ឧសភា។

សម្បុកមេរោគធំជាងគេលំដាប់ទី2ក្នុងពិភពលោកគឺប្រទេសអេស្ប៉ាញ បានឱ្យដឹងថា បានរកឃើញអ្នកជំងឺថ្មី887នាក់ និងអ្នកស្លាប់ថ្មី637នាក់ ធ្វើឱ្យអ្នកជំងឺសរុបកើនដល់191,726នាក់ និងអ្នកស្លាប់សរុប20,639នាក់។ តួលេខនៃករណីឆ្លងមេរោគ និងស្លាប់ កំពុងថយចុះ ខណៈដែលអ្នកជំងឺបានជាសះស្បើយ កើនឡើងជិតដល់75,000នាក់។

ក៏ប៉ុន្តែ នាយករដ្ឋមន្ត្រី Pedro Sanchez កាលពីម្សិលមិញបានសម្រេចអូសបន្លាយបម្រាមគោចរទូទាំងប្រទេស រហូតដល់ថ្ងៃទី9ឧសភា។

អ៊ីតាលី៖ អ្នកជំងឺថ្មី3,491នាក់ អ្នកជំងឺសរុប175,925នាក់ និងអ្នកស្លាប់ថ្មី482នាក់ អ្នកស្លាប់សរុប23,227នាក់។ ប្រទេសនេះក៏បន្តសុពលភាពនៃបម្រាមគោចររហូតដល់ថ្ងៃទី3ឧសភា ប៉ុន្តែ បានអនុញ្ញាតឱ្យរោងចក្រ និងហាងមួយចំនួនដំណើរការឡើងវិញចាប់ពីថ្ងៃទី14មេសា។

បារាំងរកឃើញអ្នកជំងឺថ្មី3,824នាក់ អ្នកស្លាប់ថ្មី642នាក់ និងអ្នកជំងឺសរុប151,793នាក់ អ្នកស្លាប់សរុប19,323នាក់។ ប្រទេសនេះបានចាប់ផ្ដើមដាក់បម្រាមគោចរពីថ្ងៃទី17មីនា ប៉ុន្តែប្រធានាធិបតីបារាំង លោក Macron បានប្រកាសក្នុងសប្ដាហ៍នេះថា បម្រាមគោចរនេះអាចនឹងត្រូវបន្ធូរបន្ថយចាប់ពីថ្ងៃទី11ឧសភា។

អាល្លឺម៉ង៖ អ្នកជំងឺថ្មី1,945នាក់ អ្នកស្លាប់ថ្មី107នាក់ និងអ្នកជំងឺសរុប143,342នាក់ អ្នកស្លាប់សរុបឡើងដល់4,459នាក់។ រដ្ឋមន្ត្រីសុខាភិបាល Jens Spahn ថ្លែងថា តួលេខនៃករណីឆ្លងវីរុសថ្មីនៅអាល្លឺម៉ង់ “បានថយចុះច្រើន” ហើយសម្បុកមេរោគកំពុង “ត្រូវបានគ្រប់គ្រង”។

អង់គ្លេស៖ អ្នកជំងឺថ្មី5,525នាក់ អ្នកស្លាប់ថ្មី888នាក់ ធ្វើឱ្យអ្នកជំងឺសរុបកើនដល់114,217នាក់ អ្នកស្លាប់សរុប15,464នាក់។ សាស្ត្រាចារ្យ Anthony Costello មកពីវិទ្យាស្ថានសុខាភិបាលសកល UCL នៅទីក្រុងឡុងដ៍បានព្រមានថា អ្នកស្លាប់ដោយសារវីរុសកូរ៉ូណាអាចកើនដល់ជាង40,000នាក់ ព្រោះតែរាជរដ្ឋាភិបាលមានការយឺតយ៉ាវក្នុងការចាត់វិធានការទប់ស្កាត់។

ប្រទេសចិន៖ តួលេខចុងក្រោយបង្ហាញថា មានអ្នកជំងឺសរុប8,719នាក់ និងអ្នកស្លាប់សរុប4,632នាក់។

អ៊ីរ៉ង់បន្តជាសម្បុកមេរោគធំជាងគេលំដាប់ទី2នៅអាស៊ី ដោយមានអ្នកជំងឺសរុប80,568នាក់ និងអ្នកស្លាប់សរុប5,031នាក់។ ប្រទេសនេះទើបតែបានរកឃើញអ្នកជំងឺថ្មី1,374នាក់ និងអ្នកស្លាប់ថ្មី73នាក់បន្ថែមទៀត។ នេះជាថ្ងៃទី5ហើយដែលប្រទេសនេះមានអ្នកស្លាប់ក្រោម100នាក់ក្នុងមួយថ្ងៃ៕

ប្រភព៖ សារព័ត៌មានបរទេស

April 19, 2020

ជាង153,000នាក់ស្លាប់ដោយសារCOVID-19 នៅទូទាំងពិភពលោក! ឥណ្ឌូនេស៊ី “លេចធ្លោ” ជាងគេនៅអាស៊ីអាគ្នេយ៍

ពិភពលោកមានអ្នកស្លាប់ដោយសារCOVID-19 សរុបជាង153,000នាក់ ក្នុងចំណោមអ្នកជំងឺសរុប ជាង2.2លាននាក់។

សាកលវិទ្យាល័យ Johns Hopkins ប្រកាសថា មានអ្នកជំងឺកូរ៉ូណាសរុប2,234,109នាក់ និងស្លាប់153,379នាក់នៅក្នុងប្រទេស និងដែនដី210 នៅក្នុងពិភពលោកទាំងមូល ក្នុងនោះមានអ្នកជំងឺបានជាសះស្បើយ 569,953នាក់ផងដែរ។

សហរដ្ឋអាមេរិកនៅតែជាសម្បុកមេរោគCOVID-19 ធំជាងគេបង្អស់ក្នុងពិភពលោក ដោយមានអ្នកជំងឺសរុប699,706នាក់ និងអ្នកស្លាប់សរុប36,727នាក់ ក្នុងនោះមានអ្នកជំងឺថ្មី32,481នាក់ និងអ្នកស្លាប់ថ្មី4,041នាក់។

អេស្ប៉ាញ៖ អ្នកជំងឺថ្មី3,291នាក់ អ្នកស្លាប់ថ្មី316នាក់ និងអ្នកជំងឺសរុប188,167នាក់ អ្នកស្លាប់សរុប19,631នាក់។ ប្រទេសនេះជាសម្បុកមេរោគCOVID-19 ធំជាងគេបង្អស់នៅទ្វីបអឺរ៉ុប និងលំដាប់ទី2នៅក្នុងពិភពលោក។

អ៊ីតាលី៖ អ្នកជំងឺថ្មី3,493នាក់ អ្នកស្លាប់ថ្មី575នាក់ និងអ្នកជំងឺសរុប172,434នាក់ អ្នកស្លាប់សរុប22,745នាក់។

បារាំង៖ អ្នកជំងឺថ្មី1,909នាក់ អ្នកស្លាប់ថ្មី761នាក់ និងអ្នកជំងឺសរុប147,969នាក់ អ្នកស្លាប់សរុបឡើងដល់18,681នាក់។

ចំនួនអ្នកផ្ទុកមេរោគសរុប និងស្លាប់សរុបនៅប្រទេសអាល្លឺម៉ង់គឺ 140,886នាក់ និង4,326នាក់ បន្ទាប់ពីបានរកឃើញករណីឆ្លងមេរោគថ្មី3,188នាក់ និងស្លាប់ថ្មី274នាក់។

អង់គ្លេសគឺជាសម្បុកមេរោគធំជាងគេលំដាប់ទី5នៅអឺរ៉ុប ដោយមានអ្នកជំងឺសរុប108,692នាក់ និងស្លាប់សរុបឡើងដល់14,576នាក់ ក្នុងនោះមានអ្នកជំងឺថ្មី5,599នាក់ និងអ្នកស្លាប់ថ្មី847នាក់។

ប្រទេសចិន បានរកឃើញអ្នកជំងឺថ្មី27នាក់ ក្នុងនោះមាន17នាក់ជាករណីនាំចូល។ ប្រទេសនេះក៏បានរាយការណ៍ថាបានរកឃើញអ្នកជំងឺថ្មីដែលមិនមានរោគសញ្ញាចំនួន54ករណីផងដែរ។ ចំនួនសរុបនៃករណីឆ្លងវីរុសនៅប្រទេសចិន គិតមកដល់ថ្ងៃនេះ បានកើនដល់82,719នាក់ ក្នុងនោះមាន4,512នាក់បានបាត់បង់ជីវិត។

អ៊ីរ៉ង់បន្តជាសម្បុកមេរោគធំជាងគេទី2នៅអាស៊ី ដោយមានអ្នកជំងឺសរុប79,494នាក់ និងអ្នកស្លាប់សរុប4,958នាក់។ ប្រទេសនេះទើបតែបានរកឃើញអ្នកជំងឺថ្មី1,499នាក់ និងស្លាប់ថ្មី89នាក់បន្ថែមទៀត។

ចំណែកអាស៊ីអាគ្នេយ៍វិញ ប្រទេសឥណ្ឌូនេស៊ីក្លាយជាសម្បុកមេរោគធំជាងគេដោយមានអ្នកជំងឺសរុប5,923នាក់ និងស្លាប់សរុប520នាក់ ក្នុងនោះមានអ្នកជំងឺថ្មីមានចំនួន407នាក់ និងអ្នកស្លាប់ថ្មី24នាក់។ ហ្វីលីពីនឈរលំដាប់ទី2 ដោយមានអ្នកជំងឺសរុប5,878នាក់ និងស្លាប់សរុប387នាក់ ខណៈម៉ាឡេស៊ីទើបរកឃើញអ្នកជំងឺថ្មី69នាក់ និងអ្នកស្លាប់ថ្មី2នាក់ ដែលធ្វើឱ្យតួលខនៃអ្នកជំងឺសរុបនៅប្រទេសនេះកើនដល់5,251នាក់ និងស្លាប់សរុបកើនដល់86នាក់៕

ប្រភព៖ សារព័ត៌មានបរទេស

April 18, 2020

COVID-19! នាយករដ្ឋមន្ត្រីប្រទេសនូវែលហ្សេឡង់ត្រូវគេប្ដឹង ដោយសារចេញបម្រាមគោចរ

បុរស2នាក់បានដាក់ពាក្យប្ដឹងនាយករដ្ឋមន្ត្រី Jacinda Ardern ដោយសារតែពួកគេយល់ថា លោកស្រីដាក់បម្រាមគោចរទូទាំងប្រទេសនូវែលហ្សេឡង់ដើម្បីទប់ស្កាត់COVID-19 គឺដើម្បី “ផលប្រយោជន៍នយោបាយ”។

ដើមបណ្ដឹងដែលមិនត្រូវបានបញ្ចេញឈ្មោះ ថ្ងៃនេះបានដាក់ពាក្យបណ្ដឹងទៅតុលាការជាន់ខ្ពស់នៃទីក្រុង Auckland ប្រទេសនូវែលហ្សេឡង់ ដោយចោទប្រកាន់នាយករដ្ឋមន្ត្រី Ardern ថា បានប្រកាសអាសន្នកម្រិត4 នៅទូទាំងប្រទេស ធ្វើឱ្យពួកគេ “ត្រូវបង្ខាំងខ្លួនក្នុងផ្ទះដោយខុសច្បាប់ និងមិនគួរប្ដូរជាមួយនឹងការខាតបង់សេដ្ឋី ព្រោះតែចំនួនអ្នកស្លាប់ដោយសារវីរុសCOVID-19 មានកម្រិតទាប”។ ពួកគេយល់ថា បទបញ្ជាដាក់បម្រាមគោចររបស់លោកស្រី Ardern “ទាំងអស់សុទ្ធតែដោយសារផលប្រយោជន៍នយោបាយ”។

ដើមបណ្ដឹងទី1 បាននិយាយជាមួយ Mary Peters ដែលជាតំណាងតុលាការថា ការដាក់បម្រាមគោចរទូទាំងប្រទេស “គឺជាការលេងសើច” ហើយ COVID-19 គ្រាន់តែជា “ការភ័យស្លន់ស្លោប៉ុណ្ណោះ គឺវាមិនមែនជារោគរាតត្បាតអ្វីនោះទេ” បើទោះជាគាត់ទទួលបានសិទ្ធិចេញពីផ្ទះចាប់ពីម៉ោង8ដល់ម៉ោង17 ក៏ដោយ។

ដើមបណ្ដឹងរូបនេះយល់ថា នាយករដ្ឋមន្ត្រី Ardern មិនមានមូលដ្ឋានដើម្បីដាក់បម្រាមគោចរនោះទេ។ ទន្ទឹមនឹងនេះ បុរសនេះក៏បានចោទលោកស្រីថា បានឃុបឃិតជាមួយ Stephen Tindall ដែលជាស្ថាបនិកក្រុមហ៊ុនលក់រាយធំបំផុតនៅប្រទេសនូវែលហ្សេឡង់ ដើម្បីបំផ្លាញសេដ្ឋកិច្ច ហើយការដាក់បម្រាមគោចរទូទាំងប្រទេសនេះ គួរតែត្រូវបានពិគ្រោះយោបល់ជាមួយអគ្គលេខាធិការនៃអង្គការសហប្រជាជាតិ។

ដើមបណ្ដឹងថែមទាំងបានប្រៀបធៀបលោកស្រី Ardern ទៅនឹង Adolf Hitler ផងដែរ ហើយប្រៀបធៀបការដាក់បម្រាមគោចរដូចទៅនឹង “ការសម្លាប់រង្គាល”។ បុរសនេះនិយាយថា ការស្លាប់ចំនួន9ករណីដោយសារវីរុសCOVID-19 នៅនូវែលហ្សេឡង់បានកើតឡើងក្នុងពេលដែលពួកគេបានដាក់ពាក្យបណ្ដឹង នេះបង្ហាញថា ការដាក់បម្រាមគោចរគឺមិនសមហេតុផលជាមួយនឹងស្ថានភាពជាក់ស្ដែង។

ចំណែកដើមបណ្ដឹងទី2 យល់ថា តួលេខអ្នកស្លាប់ដោយសារជំងឺផ្សេងៗដូចជាមហារីកជាដើម វាមានអត្រាខ្ពស់ជាង COVID-19 ទៅទៀត ប៉ុន្តែមិនត្រូវបានពិនិត្យ និងព្យាបាល ដោយសារតែធនធានរបស់មន្ត្រីពេទ្យ ផ្ដោតទៅលើតែការទប់ស្កាត់COVID-19។ “នាយករដ្ឋមន្ត្រីបានសម្រេចចិត្តខុស ទាំងអស់គឺដើម្បីផលប្រយោជន៍នយោបាយរបស់លោកស្រីតែប៉ុណ្ណោះ”។

មេធាវី Austin Powell របស់នាយករដ្ឋមន្ត្រី Ardern បកស្រាយថា បម្រាមគោចរ បង្កផលប៉ះពាល់ច្រើនគួរសមដល់សិទ្ធិនៃការដើរហើររបស់អ្នករាល់គ្នា ក៏ប៉ុន្តែ ប្រជាជននៅតែមានសិទ្ធិដើរ ពេលមានការចាំបាច់។ មេធាវីខាងលើក៏បានបដិសេធការចោទប្រកាន់របស់ដើមបណ្ដឹង និងបានបកស្រាយថា ច្បាប់សុខភាពអនុញ្ញាតឱ្យក្រសួងសុខាភិបាលមានសិទ្ធិអនុវត្តវិធានការរឹតបន្តឹងនានាទាក់ទិននឹងបម្រាមគោចរ។ តំណាងតុលាការ លោកស្រី Peters បានឱ្យដឹងថា លោកស្រីនឹងកាត់ក្ដីរឿងនេះក្នុងពេលឆាប់ៗខាងមុខ។

នាយករដ្ឋមន្ត្រី Ardern កាលពីខែមីនា បានប្រកាសអាសន្នកម្រិត4(កម្រិតខ្ពស់បំផុត) ទូទាំងប្រទេស ព្រោះតែCOVID-19។ តាមរយៈការប្រកាសអាសន្នដែលមានសុពលភាព4សប្ដាហ៍នេះ សាលារៀន ភោជនីយដ្ឋាន បារ រោងកុន រួមនឹងកន្លែងដែលប្រមូលផ្ដុំមនុស្សច្រើន ត្រូវបានផ្អាកដំណើរការទាំងស្រុង។

វិធានការខ្លាំងក្លានេះ ត្រូវបានគេមើលឃើញថា បាន និងកំពុងជួយប្រទេសនូវែលហ្សេឡង់ គ្រប់គ្រងវីរុសCOVID-19 បានឆាប់រហ័ស៕

ប្រភព៖ សារព័ត៌មានបរទេស

April 17, 2020

អង់គ្លេសកំពុងពិនិត្យលើសម្មតិកម្ម “COVID-19 រួចចេញពីបន្ទប់ពិសោធន៍នៅ Wuhan” និងត្រៀមសំណួរពិបាកឆ្លើយសម្រាប់ចិន

រដ្ឋមន្ត្រីការបរទេស Dominic Raab បានឱ្យដឹងថា ប្រទេសអង់គ្លេស និងសម្ព័ន្ធមិត្ត នឹងដាក់សំណួរទៅកាន់ប្រទេសចិន ទាក់ទិននឹងប្រភពវីរុសCOVID-19 រួមនឹងវិធីដោះស្រាយបញ្ហានេះ។

“យើងនឹងត្រូវតែសួរសំណួរដែលពិបាកបំផុតអំពីរោគរាតត្បាតនេះថា តើវាផ្ទុះឆ្លងរាលដាលតាមរបៀបណា ហើយហេតុអ្វីមិនត្រូវបានទប់ស្កាត់ឆាប់រហ័ស” រដ្ឋមន្ត្រីការបរទេសអង់គ្លេស Cominic Raab ថ្លែងនៅក្នុងសន្និសីទសារព័ត៌មានមួយស្ដីអំពី COVID-19 កាលពីថ្ងៃទី16មេសា នៅឯការិយាល័យនាយករដ្ឋមន្ត្រី បន្ទាប់ពីត្រូវបានសួរអំពីទំនាក់ទំនងនាពេលអនាគតរវាងអង់គ្លេសជាមួយនឹងប្រទេសចិន។ លោក Raab បានដឹកនាំកិច្ចប្រជុំនេះជំនួសនាយករដ្ឋមន្ត្រី Boris Johnson ដែលកំពុងសម្រាកយកកម្លាំងក្រោយពីបានជាពីជំងឺ COVID-19។

លោក Raab ព្រមានប្រទេសចិនថា មិនអាចត្រឡប់មកធ្វើសកម្មភាពពាណិជ្ជកម្មជាធម្មតាជាមួយអង់គ្លេសដូចមុនទៀតនោះទេ ក្រោយវិបត្តិ COVID-19 ហើយសាធារណៈមតិអន្តរជាតិ ចង់បានចម្លើយពីទីក្រុងប៉េកាង អំពីវិធីដោះស្រាយបញ្ហាវិបត្តិសុខភាពនេះ។

“បច្ចុប្បន្ន យើងត្រូវការពិនិត្យមើលគ្រប់ជ្រុងជ្រោយនៃទំនាក់ទំនងជាមួយប្រទេសចិន និងអនុវត្តវាដោយយុត្តិធម៌បំផុត ប៉ុន្តែ ប្រាកដណាស់ថា ប្រទេសអង់គ្លេសនឹងមិនអាចរកស៊ីធម្មតាជាមួយចិនបានដូចមុននោះទេ ក្រោយវិបត្តិសុខភាពនេះ” រដ្ឋមន្ត្រីការបរទេសអង់គ្លេសមានប្រសាសន៍។

សារព័ត៌មានអង់គ្លេសយល់ថា យោបល់របស់រដ្ឋមន្ត្រីការបរទេស Raab បានបង្ហាញអំពីការខកចិត្តរបស់រាជរដ្ឋាភិបាលអង់គ្លេសចំពោះការខ្វះតម្លាភាពរបស់ប្រទេសចិនទាក់ទង់នឹងវិបត្តិ COVID-19។

ការប្រកាសរបស់រដ្ឋមន្ត្រីការបរទេសអង់គ្លេសនេះ ត្រូវបានធ្វើឡើងបន្ទាប់ពីប្រធានាធិបតី Donald Drump បានឱ្យដឹងថា រដ្ឋាភិបាលរបស់លោកកំពុងតែពិនិត្យយ៉ាងយកចិត្តទុកដាក់ទៅលើសម្មតិកម្មមួយដែលថា COVID-19 “រួច” ចេញពីបន្ទប់ពិសោធន៍នៅទីក្រុង Wuhan ដែលជាទីក្រុងធំរបស់ខេត្ត Hubei ប្រទេសចិន និងជាកន្លែងដែលមេរោគនេះចាប់ផ្ដើមឆ្លង និងរាតត្បាតកាលពីចុងឆ្នាំ2019។

មានសម្មតិកម្មជាច្រើនយល់ថា បន្ទប់ពិសោធន៍ដែលមានស្ដង់ដាទាបនៅទីក្រុង Wuhan បានធ្វើឱ្យមនុស្សម្នាក់ឆ្លងវីរុស ហើយមនុស្សម្នាក់នេះក៏បានទៅកាន់ផ្សារលក់គ្រឿងសមុទ្រ និងសត្វព្រៃ ជាកន្លែងដែល COVID-19 ចាប់ផ្ដើមផ្ទុះឆ្លង។ ប៉ុន្តែ វិទ្យាស្ថានស្រាវជ្រាវមេរោគ Wuhan បានទាត់ចោលការចោទប្រកាន់នេះកាលពីខែកុម្ភៈកន្លងទៅ។

ប្រតិកម្មទៅនឹងមតិរបស់លោក Trump ក្រសួងការបរទេសចិន បានឱ្យដឹងថា មន្ត្រីនៃអង្គការសុខភាពពិភពលោក (WHO) បាននិយាយជាច្រើនលើកហើយថា មិនមានភ័ស្ដុតាងណាមួយបញ្ជាក់ថា វីរុសCOVID-19 ត្រូវបានបង្កើតឡើងនៅក្នុងបន្ទប់ពិសោធន៍នោះទេ ហើយអ្នកជំនាញជាច្រើនក៏បានយល់ថា ការប្រកាសរបស់មន្ត្រីសហរដ្ឋអាមេរិក គឺមិនប្រកបដោយវិទ្យាសាស្ត្រ។

ក្រុមអ្នកវិទ្យាសាស្ត្រភាគច្រើនយល់ថា COVID-19 មានប្រភពពីតំបន់ផ្សារត្រីសមុទ្រនៅទីក្រុង Wuhan។ ប៉ុន្តែក្រុមមន្ត្រីជំនាញរបស់អង់គ្លេសកំពុងតែពិនិត្យទៅលើលទ្ធភាពដែលថា វីរុសនេះបាន “រួច” ចេញពីមន្ទីរពិសោធន៍នៅទីក្រុង Wuhan។ នេះបើតាមសារព័ត៌មានអង់គ្លេស Daily Mail ចេញផ្សាយកាលពីថ្ងៃទី12មេសា។ សមាជិកម្នាក់នៃគណៈកម្មធិការសង្គ្រោះបន្ទាន់របស់រាជរដ្ឋាភិបាលអង់គ្លេសថ្លែងថា “វាប្រហែលជាមិនធម្មតានោះទេ ដែលនៅសុខៗ គេបង្កើតមន្ទីរពិសោធន៍នៅ Wuhan បែបនេះ”។

ឆ្លើយនឹងសំណួររបស់អ្នកយកព័ត៌មានរបស់ Financial Times កាលពីថ្ងៃទី16មេសា ប្រធានាធិបតីបារាំង លោកEmmanuel Macron បានថ្លែងថា មាន “តំបន់ប្រផេះ” ជាច្រើននៅក្នុងវិធីដែលចិនប្រើប្រាស់ក្នុងដោះស្រាយបញ្ហា COVID-19។ “យើងមិនត្រូវឆោតល្ងង់ដល់ថ្នាក់និយាយថា ការដោះស្រាយបញ្ហារោគរាតត្បាតរបស់ពួកគេ បានល្អនោះទេ។ យើងមិនដឹងសោះឡើយ។ មានរឿងខ្លះបានកើតឡើង ហើយយើងមិនបានដឹងអំពីវា”៕

ប្រភព៖ សារព័ត៌មានបរទេស

April 17, 2020

COVID-19! វេជ្ជបណ្ឌិតឥណ្ឌូនេស៊ី ពាក់អាវភ្លៀងជំនួសឈុតការពារវីរុស

ដោយសារតែមានការខ្វះខាតឧបករណ៍វេជ្ជសាស្ត្រ និងសម្ភារការពារការឆ្លងវីរុស ក្រុមវេជ្ជបណ្ឌិតនៅប្រទេសឥណ្ឌូនេស៊ី កំពុងតែប្រថុយប្រថានជាមួយនឹងការប្រយុទ្ធប្រឆាំងវីរុសCOVID-19 ដែលអាចមានហានិភ័យខ្ពស់ក្នុងការឆ្លងមេរោគដល់ពួកគេ។

គិតមកដល់បច្ចុប្បន្ន វេជ្ជបណ្ឌិតចំនួន20រូបហើយដែលបានបាត់បង់ជីវិតចាប់តាំងពីCOVID-19 បានបង្ហាញខ្លួននៅឥណ្ឌូនេស៊ី។ តួលេខនៃអ្នកស្លាប់ចំនួន459នាក់ក្នុងប្រទេសនេះ ត្រូវបានក្រុមអ្នកវិភាគយល់ថា ជាតួលេខទាបបំផុត បើធៀបជាមួយនឹងស្ថានភាពជាក់ស្ដែង។

មន្ទីរពេទ្យនានា មិនមានសម្ភារការពារសុវត្ថិភាពគ្រប់គ្រាន់ ខណៈម៉ាស៊ីនជំនួយដង្ហើមក៏មានតម្លៃខ្ពស់ ធ្វើឱ្យក្រុមវេជ្ជបណ្ឌិតពិបាលក្នុងការទប់ទល់នឹងវីរុសCOVID-19នេះ។ ពួកគេក៏ត្រូវពាក់អាវភ្លៀងដែលមានតម្លៃទាប ជំនួសឈុតការពារសុវត្ថិភាពដែលមានតម្លៃថ្លៃ និងកំពុងខ្វះខាត។

Muhammad Farras Hadyan ដែលជាវេជ្ជបណ្ឌិតម្នាក់នៅទីក្រុង Jakarta បានឱ្យដឹងថា សម្ភារវេជ្ជសាស្ត្រកំពុងតែអស់ជាបណ្ដើរៗហើយនៅក្នុងមន្ទីរពេទ្យរបស់លោក រហូតដល់មានវេជ្ជបណ្ឌិតខ្លះ ត្រូវស្នើសុំជំនួយប្រាក់កាសពីគ្រួសាររបស់ពួកគេដើម្បីទិញឈុតការពារសុវត្ថិភាព។

Handoko Gunawan វេជ្ជបណ្ឌិតឯកទេសផ្នែករោគសួត វ័យ79ឆ្នាំ បាននៅជួរមុខរហូតដល់ថ្ងៃមួយគាត់ត្រូវបង្ខំចិត្តបង្ខាំងខ្លួនឯងដោយសារសង្ស័យថា បានឆ្លងវីរុសកូរ៉ូណា។

Handoko Gunawan និយាយថា “ខ្ញុំពិតជារន្ធត់ចិត្តខ្លាំងណាស់ ហើយក្រុមបុគ្គលិកពេទ្យផ្សេងៗទៀតក៏ដូចគ្នា។ វេជ្ជបណ្ឌិតក្មេងៗ មានប្ដី និងកូនៗនៅឯផ្ទះ ប៉ុន្តែពួកគេនៅតែប្រឹងប្រែងប្រឈមនឹងបញ្ហានេះ។ មានវេជ្ជបណ្ឌិតតិចណាស់នៅឥណ្ឌូនេស៊ី ហើយបើពួកគេស្លាប់ ពួកយើងនឹងមានវេជ្ជបណ្ឌិតកាន់តែតិចដើម្បីជួយព្យាបាលអ្នកជំងឺ”។

យោងតាមទិន្នន័យរបស់អង្គការសុខភាពពិភពលោក ប្រទេសឥណ្ឌូនេស៊ី មានវេជ្ជបណ្ឌិតមិនដល់4នាក់ផងក្នុងចំណោមមនុស្ស10,000នាក់។ តួលេខនេះ ទាបខ្លាំងណាស់បើធៀបនឹងចំនួន40នាក់នៅអ៊ីតាលី និង24នាក់នៅកូរ៉េខាងត្បូង។ សមាគមវេជ្ជបណ្ឌិតឥណ្ឌូនេស៊ីបានព្រមានថា វិបត្តិCOVID-19នេះ អាក្រក់ជាងអ្វីដែលបានរាយការណ៍ទៅទៀត ចំណែកប្រតិកម្មរបស់រដ្ឋាភិបាលវិញ ហាក់មានសភាព “ទន់ជ្រាយ”។

ស្ថិតិផ្លូវការថ្មីបំផុតបានឱ្យដឹងថា ឥណ្ឌូនេស៊ីបានរកឃើញអ្នកផ្ទុកវីរុសចំនួន 5,136នាក់ ក្នុងចំណោម36,000នាក់ដែលបានធ្វើតេស្ត ខណៈប្រជាជនរបស់ប្រទេសនេះ មានចំនួនដល់ទៅជាង260លាននាក់ (ច្រើនជាងគេលំដាប់ទី4ក្នុងពិភពលោក)។

អ្នកនាំពាក្យរបស់សមាគមវេជ្ជបណ្ឌិតឥណ្ឌូនេស៊ីបានថ្លែងថា “តួលេខផ្លូវការរបស់រដ្ឋាភិបាល មិនបង្ហាញអំពីទិដ្ឋភាពពិតប្រាកដស្ដីអំពីចំនួនអ្នកឆ្លងមេរោគក្នុងប្រទេសនេះនោះទេ”។

តួលេខរបស់អាជ្ញាធរទីក្រុង Jakarta បានបង្ហាញថា មានអ្នកស្លាប់ដោយសារការឆ្លងមេរោគ ឬសង្ស័យថាបានឆ្លងមេរោគCOVID-19 ជាង1,000នាក់ ត្រូវបានបញ្ចុះនៅក្នុងទីបញ្ចុះសពនៅឯមូលដ្ឋាន ដែលតួលេខនេះ ខ្ពស់ជាង5ដង បើធៀបនឹងតួលេខដែលបង្ហាញដោយរដ្ឋាភិបាល។

ករណីបញ្ចុះសពនៅក្នុងទីក្រុង Ban Dung នៃខេត្ត Java ដែលជាប់ជាមួយនឹងទីក្រុង Jakarta បានកើនទ្វេដង ដោយមានប្រមាណជា400នាក់ក្នុងរយៈពេលតែ1ខែ រាប់ចាប់ពី COVID-19 បានឆ្លងរាលដាលក្នុងប្រទេសនេះ។ នេះបើតាមការឱ្យដឹងពីអភិបាលក្រុង Ban Dung លោក Ridwan Kamil។

លោក Ridwan Kamil បន្តថា “នេះគឺជាស្ថានភាពដែលដូចទៅនឹង Jakarta។ យើងមិនអាចប្រាកដថា អ្នកដែលបានស្លាប់ទាំងអស់នេះ គឺសុទ្ធតែបានឆ្លងវីរុសCOVID-19នោះទេ ប៉ុន្តែតួលេខនៃករណីស្លាប់ គឺវាខ្ពស់ជាងធម្មតា”៕

ប្រភព៖សារព័ត៌មានបរទេស

April 17, 2020

Tag: កូវីដ១៩