Tag: កាណាដា

ក្រុមហ៊ុន GM សម្ពោធរោងចក្រធំដំបូងនៅ កាណាដា ដើម្បីផលិតរថយន្តអគ្គិសនីដឹកទំនិញ
ក្រុមហ៊ុនផលិតរថយន្តអាម៉េរិក General Motors (GM) បានសម្ពោធរោងចក្រផលិតរថយន្តអគ្គិសនីទ្រង់ទ្រាយធំដំបូងនៅ ប្រទេសកាណាដា កាលពីថ្ងៃទី 05 ធ្នូកន្លងទៅ ក្រោមអធិបតីភាព នាយករដ្ឋមន្ត្រី Justin Trudeau។
រោងចក្រដំឡើងរថយន្តដែលមានទីតាំងនៅក្នុងតំបន់ Ingersoll ខេត្ត Ontario នេះ ទទួលបានទុនវិនិយោគប្រហែល 380 លានដុល្លារអាម៉េរិក ពីរដ្ឋាភិបាល និងខេត្ត Ontario។ នេះគឺជាផ្នែកមួយនៃយុទ្ធសាស្ត្ររថយន្តអគ្គិសនីធំរបស់ កាណាដា ដែលរួមមានទាំងការរុករករ៉ែលីចូមសម្រាប់ការផលិតថ្មផ្ទុកថាមពលដើម្បីផ្គត់ផ្គត់ដល់រថយន្តអគ្គិសនីនៅ អាម៉េរិកខាងជើង។
នាយករដ្ឋមន្ត្រីកាណាដា លោក Justin Trudeau ថ្លែងកាលពីថ្ងៃទី 05 ធ្នូថា «ថ្ងៃនេះ យើងនឹងសម្ពោធរោងចក្រផលិតរថយន្តអគ្គិសនីទ្រង់ទ្រាយធំដំបូងនៅ កាណាដា»។ ចំណែកប្រធានក្រុមហ៊ុន GM កាណាដា អ្នកស្រី Marissa West បាននិយាយថា «អនាគតរបស់រថយន្តអគ្គិសនីនៅ កាណាដា លែងនៅជាគម្រោងមួយដែលនៅឆ្ងាយទៀតហើយ»។
រថយន្តអគ្គិសនីប្រភេទដឹកទំនិញ BrightDrop Zevo 600
រោងចក្រខាងលើនេះនឹងផលិតរថយន្តអគ្គិសនីប្រភេទដឹកទំនិញដែលមានឈ្មោះថា BrightDrop Zevo 600។ GM បានកំណត់គោលដៅផលិតរថយន្តប្រភេទនេះឱ្យបាន 50,000 គ្រឿងជារៀងរាល់ឆ្នាំចាប់ពីឆ្នាំ 2025។ ក្រុមហ៊ុនដឹកជញ្ជូនទំនិញរបស់ អាល្លឺម៉ង់ DHL Express គឺជាអតិថិជននៅ កាណាដា ដំបូងដែលបានបញ្ជាទិញរថយន្តដឹកទំនិញ BrightDrop៕
December 7, 2022
កាណាដា គ្រោងនឹងទិញយន្តហោះចម្បាំង F-៣៥ ជិត ១០០ គ្រឿង ព្រោះខ្លាច រុស្ស៊ី
ប្រទេសកាណាដា មានផែនការទិញយន្តហោះចម្បាំង F-៣៥ ចំនួន ៨៨ គ្រឿង ដើម្បីធ្វើទំនើបកម្មទ័ពអាកាស និងដើម្បីទប់ទល់នឹងការគំរាមកំហែងថ្មី ក្នុងនោះមាន រុស្ស៊ី ជាដើម។
«យន្តហោះចម្បាំងបំបាំងកាយ F-៣៥ បានបង្ហាញអំពីសក្ដានុពល លក្ខណៈពេញលេញ និងសមត្ថភាពសហការក្នុងសមរភូមិ ដែលនោះគឺជាមូលហេតុនាំឱ្យយើងឈានដល់ដំណាក់កាលបង្ហើយកិច្ចសន្យាទិញដូរ។ កាណាដា ដែលមានដែនអាកាសធំបំផុតមួយក្នុងពិភពលោក ត្រូវការធានាថា ក្រុមហោះហើរនៃយន្តហោះចម្បាំងបន្ទាប់ អាចទប់ទល់នឹងការគំរាមកំហែង» រដ្ឋមន្ត្រីការពារជាតិកាណាដា Anita Anand បានថ្លែងកាលពីម្សិលមិញដូច្នេះ។
បណ្ដាយន្តហោះចម្បាំង F-៣៥ របស់ កាណាដា នឹងដើរតួនាទីសំខាន់ក្នុងការល្បាតដែនអាកាសនៅ អាម៉េរិកខាងជើង ជាមួយនឹងទ័ពអាកាសរបស់ សហរដ្ឋអាម៉េរិក ក្រោមបញ្ជាការរបស់បញ្ជាការដ្ឋានការពារដែនអាកាសអាម៉េរិកខាងជើង (NORAD)។ ពួកវាក៏អាចចូលរួមបេសកកម្មការពារ ណាតូ នៅ អឺរ៉ុប ឬប្រទេសនានា។
F-៣៥
មូលហេតុដែលនាំឱ្យ កាណាដា សម្រេចចិត្តទិញយន្តហោះចម្បាំងខាងលើ ត្រូវបាន រដ្ឋមន្ត្រីការបរទេសកាណាដា Melanie Joly ថ្លែងថា «ពិភពលោកបានផ្លាស់ប្ដូរចាប់ពីថ្ងៃទី ២៤ កុម្ភៈ» ជាពេលដែល រុស្ស៊ី បើកការឈ្លានពានទឹកដីរបស់ អ៊ុយក្រែន។
F-៣៥
ទ័ពអាកាសរបស់ កាណាដា បច្ចុប្បន្នមានយន្តហោះចម្បាំងពហុមុខងារ CF-១៨A/B ចំនួន ៧៦ គ្រឿង ដែលត្រូវបានអភិវឌ្ឍពីកំណែ F/A-១៨A/B របស់ សហរដ្ឋអាម៉េរិក រួមនឹងយន្តហោះចម្បាំង F/A-១៨ ចំនួន ១៨ គ្រឿង ដែលទទួលបានពី អូស្ត្រាលី កាលពីឆ្នាំ ២០១៩។ យន្តហោះចម្បាំងជាច្រើនគ្រឿងរបស់ កាណាដា នឹងត្រូវបានដាក់ឱ្យចូលនិវត្តន៍ ដោយសារតែផុតអាយុកាលប្រើប្រាស់។
យន្តហោះចម្បាំង CF-១៨ របស់ កាណាដា
ដំណាក់នៃការចរចាជាមួយក្រុមហ៊ុន Lockheed Martin គ្រោងនឹងចំណាយពេល ៧ ខែ ហើយ កាណាដា អាចទទួលបានយន្តហោះ F-៣៥ ដំបូង ចាប់ពីឆ្នាំ ២០២៥៕
March 29, 2022
សារធាតុអាហារដែលចាំបាច់បំផុតសម្រាប់ស្ត្រីក្នុងអំឡុងពេលមានគភ៌
ស្រ្តីមានគភ៌ត្រូវការកម្លាំងថាមពលបន្ថែមឡើងពី 150 – 350កាឡូរីក្នុង 1ថ្ងៃ ដើម្បីការចម្រើនធំធាត់របស់ទារកក្នុងផ្ទៃ និងមេតាបូលីហ្ស៊ឹមដែលកើនឡើងរបស់មាតា។ ជាទូទៅគ្រូពេទ្យតែងណែនាំឱ្យទទួលទានប្រូតេអុីនបន្ថែមឡើងយ៉ាងតិច 30ក្រាមក្នុង 1ថ្ងៃ។ ដូច្នេះខាងក្រោមនេះ គឺជាសារធាតុអាហារសំខាន់ៗដែលស្រ្តីមានគភ៌ចាំបាច់ត្រូវតែបានទទួល។
ហ្វូលេត ៈ ស្រ្តីមានគភ៌មួយចំនួនមានភាពប្រថុយប្រថានចំពោះការខ្វះសារធាតុហ្វូលេតខ្លាំងណាស់ ដូចជា ការមានគភ៌កូនភ្លោះ ការទទួលទានថ្នាំការពារប្រកាច់ ជាដើម ដូច្នេះហើយទើបស្ត្រីមានគភ៌ គួរបានទទួលសារធាតុហ្វូលេតបន្ថែមយ៉ាងតិច 200 – 400មីក្រូក្រាម ហើយហ្វូលេតថែមទាំងជួយកាត់បន្ថយភាពប្រថុយចំពោះភាពពិការរបស់បំពង់ប្រសាទទារកដែលមិនបិទ( Neural Tube Defect)ទៀតផង។
សារធាតុដែក ៈ ស្រ្តីមានគភ៌ត្រូវការសារធាតុដែកច្រើនឡើងដើម្បីផលិតគ្រាប់ឈាម។ ឡារ៉ែនសូមណែនាំឱ្យទទួលយកសារធាតុដែកពីអាហារឱ្យបាន 30 – 60មីល្លីក្រាមក្នុង 1ថ្ងៃ តែបើទទួលទានសារធាតុដែកបន្ថែមក្នុងរូបបែប FeSO4 វិញនោះ ត្រូវឱ្យបានពី 300 – 600មីល្លីក្រាមក្នុង 1ថ្ងៃ។ មានឯកសារមួយបានឱ្យដឹងថា បើកម្រិតសារធាតុដែកខ្ពស់ជ្រុលពេក នឹងនាំឆ្ពោះទៅរកសភាវទឹកនោមផ្អែមខណៈមានគភ៌ ដូច្នេះហើយទើបក្រុមវេជ្ជបណ្ឌិតក្នុងប្រទេសអង់គ្លេស និងកាណាដា តែងពិចារណាក្នុងការផ្តល់សារធាតុដែកបន្ថែមចំពោះតែស្រ្តីណាដែលរកឃើញថា មានជំងឺឈាមស្លេក ដែលបណ្តាលមកពីការខ្វះសារធាតុដែកតែប៉ុណ្ណោះ។ សម្រាប់ប្រទេសដែលកំពុងអភិវឌ្ឍន៍ ភាគច្រើនគ្រូពេទ្យនឹងឱ្យសារធាតុដែកបន្ថែមជាប្រចាំ ដោយសារតែតែងមានការខ្វះសារធាតុដែកច្រើន ទើបកន្លែងខ្លះមានកម្មវិធីបន្ថែមសារធាតុដែក និងហ្វូលេតដល់ស្រ្តីវ័យជំទង់ ដើម្បីកាត់បន្ថយការកើនឡើងនៃរោគឈាមស្លេកតាំងពីពេលមុនតាំងគភ៌។
វីតាមីនB12 ៈ បើមានវីតាមីនក្នុងកម្រិតទាប រួមជាមួយកម្រិតហ្វូលេតដែលខ្ពស់នៅលើស្រ្តីមានគភ៌នោះ នឹងក្លាយជាបច្ច័យប្រថុយប្រថាន ដែលអាចនឹងធ្វើឱ្យទារកមានសភាវឌឺនឹងសារធាតុអុីនស៊ូលីននាពេលអនាគតបាន។
កាល់ស្យូម ៈ កាល់ស្យូម មានភាពសំខាន់សម្រាប់ការអភិវឌ្ឍឆ្អឹងរបស់ទារក នៅពេលតាំងគភ៌ ស្ត្រីនឹងមានតម្រូវការកាល់ស្យូមកើនឡើង 122 – 167ភាគរយ ឬគួរបានទទួលជាតិកាល់ស្យូមយ៉ាងតិចបំផុត 1ក្រាមក្នុង 1ថ្ងៃ។ តាមរយៈការសិក្សាស្រាវជ្រាវមួយ បានឱ្យដឹងថា កាល់ស្យូមនឹងជួយកាត់បន្ថយសម្ពាធឈាមឡើងខ្ពស់នៅលើស្រ្តីមានគភ៌ កាត់បន្ថយភាពប្រថុយប្រថានចំពោះសភាវគភ៌មានជាតិពុលបានទៀតផង។
វីតាមីន A ៈ មានសម្ព័ន្ធភាពជាមួយកម្រិតសារធាតុដែក បើទទួលបានមិនគ្រប់គ្រាន់ក្នុងខណៈមានគភ៌ នឹងក្លាយជាមូលហេតុបណ្តាលឱ្យកើតរោគលោហិតស្លេកបាន។ បរិមាណដែលលោកគ្រូពេទ្យណែនាំឱ្យទទួលទាននោះគឺ 1ថ្ងៃ 5,000IU បើទទួលបានច្រើនជាង 10,000 IU ទារកនៅក្នុងផ្ទៃនឹងប្រថុយប្រថានក្នុងការកើតសភាវពិការ ជាពិសេសនៅលើប្រព័ន្ធបញ្ចេញទឹកមូត្រ។
ដូច្នេះហើយទើបការជ្រើសរើសប្រើអាហារបំប៉នក្នុងអំឡុងពេលមានគភ៌គួរស្ថិតនៅក្រោមការមើលថែរបស់គ្រូពេទ្យដើម្បីទទួលបានពាក្យណែនាំដែលត្រឹមត្រូវ និងការប្រើថ្នាំដែលស័ក្តិសម និងដើម្បីឱ្យទាំងម្តាយ និងទារកក្នុងផ្ទៃមានសុវត្ថិភាព រឹងប៉ឹង និងមានវិវឌ្ឍនាការដ៏ល្អប្រសើរ៕
January 5, 2021
កូនស្រីរបស់ស្ថាបនិកក្រុមហ៊ុនចិន Huawei អាចត្រូវបានដោះលែងនៅសប្ដាហ៍ក្រោយ
តុលាការកាណាដានឹងចេញសាលក្រមនៅសប្ដាហ៍ក្រោយទាក់ទងនឹងបញ្ហាដែលថា គួរតែបញ្ជូនខ្លួននាយិកាផ្នែកហិរញ្ញវត្ថុរបស់ក្រុមហ៊ុន Huawei គឺអ្នកស្រី Meng Wanzhou ទៅកាន់ទឹកដីអាមេរិកតាមសំណើពីអាមេរិកាំងដែរ ឬយ៉ាងណា។
យោងតាមសារព័ត៌មាន South China Morning Post អ្នកស្រី Heather Holmes ដែលជាអនុប្រធានតុលាការកំពូលនៃខេត្ត British Columbia របស់ប្រទេសកាដាណា នៅថ្ងៃទី22នេះ បានឱ្យដឹងថា តុលាការនេះនឹងសម្រេចប្រកាសសាលក្រមលើរឿងក្ដីរបស់អ្នកស្រី Meng Wanzhou ដែលជានាយិកាហិរញ្ញវត្ថុរបស់ក្រុមហ៊ុនចិន Huawei នៅថ្ងៃទី27ឧសភាខាងមុខ ហើយអ្នកស្រី Meng Wanzhou ប្រហែលជាអាចត្រូវបានដោះលែងឱ្យមានសេរីភាព។
សាលក្រមតុលាការខេត្ត British Columbia របស់កាដាណានឹងសម្រេចថា តើអ្នកស្រី Meng Wanzhou បានប្រព្រឹត្តបទល្មើសចំនួនពីរដែរ ឬយ៉ាងណា ពោលគឺមានន័យថា អ្នកស្រីនឹងត្រូវបានបញ្ជូនទៅកាន់សហរដ្ឋអាមេរិក បើសិនជាត្រូវបានថ្កោលទោសទាំងនៅកាណាដា ទាំងនៅសហរដ្ឋអាមេរិក។ បើសិនជាអនុប្រធានតុលាការកំពូលនៃខេត្ត British Columbia សម្រចចិត្តចេញសាលក្រមបញ្ជាក់ថា អ្នកស្រី Meng Wanzhou មិនបានប្រព្រឹត្តខុសច្បាប់សហរដ្ឋអាមេរិកនោះទេ អ្នកស្រី Wanzhou អាចនឹងត្រូវបានដោះលែង ប៉ុន្តែ ប្រការនេះក៏នៅតែអាស្រ័យទៅលើក្រុមមេធាវីរបស់សហរដ្ឋអាមេរិកប្រចាំប្រទេសកាណាដា ដែលថាតើពួកគេបន្តប្ដឹងឧទ្ធរណ៍ទៀតឬអត់។ ផ្ទុយទៅវិញ បើសិនជាពិនិត្យឃើញថា អ្នកស្រី Wanzhou បានប្រព្រឹត្តខុសច្បាប់សហរដ្ឋអាមេរិកដែរនោះ រឿងក្ដីបញ្ជូនខ្លួនអ្នកស្រីទៅកាន់សហរដ្ឋអាមេរិកនឹងនៅតែបន្តទៅមុខជាមួយនឹងការការពារកូនក្ដីរបស់ក្រុមមេធាវីដែលតំណាងឱ្យអ្នកស្រី Wanzhou។
អ្នកស្រី Meng Wanzhou ចាកចេញពីតុលារមួយនៅកាណាដាកាលពីខែមករា ឆ្នាំ2020
ដើម្បីទទួលបានសេរីភាព អ្នកស្រី Wanzhou និងក្រុមមេធាវីរបស់អ្នកស្រី ត្រូវតែធ្វើយ៉ាងដើម្បីបញ្ចុះបញ្ចូលចៅក្រមតុលាការឱ្យជឿជាក់ថា ការចោទប្រកាន់របស់សហរដ្ឋអាមេរិកគឺមិនសមស្រាបជាមួយនឹងច្បាប់របស់កាដាណា និងជារឿងនយោបាយ។
រឿងក្ដីធ្វើបត្យាប័ននាយិកាហិរញ្ញវត្ថុរបស់ Huawei អាចបន្តរហូតដល់ខែតុលា ឬខែវិច្ឆិកាឆ្នាំនេះ អាស្រ័យទៅលើការវិនិច្ឆ័យរបស់ចៅក្រម។ ក៏ប៉ុន្តែ ដោយសារតែមានភាពស្មុគស្មាញខ្លាំង រឿងក្ដីនេះអាចអូសបន្លាយជាច្រើនឆ្នាំទៅមុខទៀត។
អ្នកស្រី Wanzou ត្រូវបានសមត្ថកិច្ចប្រទេសកាណាដាចាប់ឃាត់ខ្លួននៅឯព្រលានយន្តហោះ Vancouver កាលពីថ្ងៃទី1ធ្នូ ឆ្នាំ2018 ទៅតាមសំណើរបស់សហរដ្ឋអាមេរិក។ អ្នកស្រី Meng Wanzhou ត្រូវបានសហរដ្ឋអាមេរិកចោទថាបានកុហកធនាគារធំៗនៅសហរដ្ឋអាមេរិកអំពីការគ្រប់គ្រងរបស់ក្រុមហ៊ុន Huawei ទៅលើក្រុមហ៊ុន Skycom នៅទីក្រុងហុងកុង។ Skycom គឺជាក្រុមហ៊ុនមួយដែលត្រូវគេចោទប្រកាន់ថាបានលក់ទំនិញទៅឱ្យប្រទេសអ៊ីរ៉ង់ ដែលនេះគឺជាការរំលោភលើការដាក់ទណ្ឌកម្មសេដ្ឋកិច្ចរបស់សហរដ្ឋអាមេរិកទៅលើរដ្ឋាភិបាលអ៊ីរ៉ង់។ បើសិនជាត្រូវបានកាត់ទោសនៅសហរដ្ឋអាមេរិក អ្នកស្រី Meng Wanzhou អាចប្រឈមនឹងការជាប់ពន្ធនាគាររយៈពេល30ឆ្នាំ។
អ្នកស្រី Meng Wanzhou ចេញពីរថយន្ត បន្ទាប់ពីបានបង្ហាញខ្លួននៅតុលាការកាណាដាកាលពីខែមករា2020
រឿងក្ដីខាងលើនេះ បានធ្វើឱ្យទំនាក់ទំនងរវាងប្រទេសចិនជាមួយកាដាណា និងចិនជាមួយអាមេរិកាំងមានភាពតានតឹង។ បន្ទាប់ពីអ្នកស្រី Meng Wanzhou ត្រូវបានចាប់ឃាត់ខ្លួនបាន9ថ្ងៃ អាជ្ញាធរចិនក៏បានចាប់ខ្លួន Michael Kovrig ដែលជាអតីតអ្នកការទូត និង Michael Spavor ជាអ្នកជំនួញរបស់សហរដ្ឋអាមេរិកផងដែរ៕
ប្រភព៖ សារព័ត៌មានបរទេស
May 22, 2020
សុដន់ក្លែងក្លាយ ជួយសង្គ្រោះជីវិត…គ្រូពេទ្យប្រាប់ថា បានដុំស៊ីលីខូនជួយ អ្នករបួសរួចពីស្លាប់
ទីភ្នាក់ងារព័ត៌មាន CNN បានរាយការណ៍ពីករណីសិក្សាស្រាវជ្រាវខាងវេជ្ជសាស្ត្រមួយថា មានស្ត្រីជនជាតិកាណាដាម្នាក់ បានរួចជីវិតពីការត្រូវគេបាញ់ចំដើមទ្រូង ដោយសារតែដុំស៊ីលីខូនដែលដាក់ដើម្បីបង្កើនទំហំសុដន់បានជួយការពារគ្រាប់កាំភ្លើង។
ករណីមួយនេះត្រូវបានបោះពុម្ពផ្សាយនៅក្នុងព្រឹត្តិបត្រវេជ្ជសាស្ត្រ SAGE កាលពីសប្ដាហ៍មុន ដោយលោកគ្រូពេទ្យដែលជាអ្នកព្យាបាលអ្នករបួសឈ្មោះ ជិអាន់ខាឡូ ម៉េកអ៊ីវេនីវ បានសរសេររៀបរាប់ថា អ្នករបួសស្រីម្នាក់ អាយុ 30ឆ្នាំ មកពីទីក្រុងតូរ៉ុនតូ ប្រទេសកាណាដា បានរួចជីវិតពីការត្រូវគេបាញ់នៅក្នុងហេតុការណ៍មួយកាលពីឆ្នាំ 2019 ដោយសារតែដុំស៊ីលីខូនបង្កើនទំហំសុដន់ បានជួយបង្វែរទិសដៅរបស់គ្រាប់កាំភ្លើង។
រូបភាព X-ray ដើមទ្រូងរបស់ស្ត្រីរងគ្រោះ បានបង្ហាញឱ្យឃើញនូវគ្រាប់កាំភ្លើងកប់ជាប់នៅនឹងផ្ទាំងកំពែងខាងឆ្វេងនៃដើមទ្រូងដែលជាដុំស៊ីលីខូន គឺជាដុំស៊ីលីខូនដែលបានទទួលការអនុញ្ញាតឱ្យដាក់លក់នៅក្នុងសហរដ្ឋ អាមេរិក ចំនួន 2ប្រភេទ ដែលសុទ្ធតែជាប្រភេទមានសម្បកហ៊ុមព័ទ្ធ ដែល 1ប្រភេទមានទឹករ៉ែនៅខាងក្នុង និង 1ប្រភេទទៀតមានជេលនៅខាងក្នុង។
ទោះជាមិនមានសេចក្ដីរាយការណ៍លម្អិតច្បាស់លាស់ថា ហេតុអីបានស្ត្រីរងគ្រោះត្រូវគេបាញ់ក្ដី តែគ្រូពេទ្យបានប្រាប់ថា ស្ត្រីរងគ្រោះបានដើរចូលមកក្នុងផ្នែកសង្គ្រោះបន្ទាន់ ដោយអាការភ័យស្លន់ស្លោ និងប្រាប់ថា នាងត្រូវគេបាញ់ចំដើមទ្រូង…។
“គ្រាប់កាំភ្លើង បុកចូលទៅរកដើមទ្រូងខាងឆ្វេង តែធ្វើឱ្យទៅកើតមានស្នាមប្រេះបែករបស់ឆ្អឹងជំនីផ្នែកខាងស្ដាំ។ លក្ខណៈគ្រាប់កាំភ្លើង បានបុកទម្លុះស្បែក ហើយខ្ទាតត្រឡប់មកក្រោយ ឆ្លងកាត់ឆ្អឹងសន្ទះទ្រូង តម្រង់ទៅដើមទ្រូងផ្នែកខាងស្ដាំ។ ដុំស៊ីលីខូនដែលបង្កើនទំហំសុដន់ ធ្វើឱ្យគ្រាប់កាំភ្លើងប្ដូរទិសដៅ”
លោកវេជ្ជបណ្ឌិត ម៉េកអ៊ីវេនីវ បានថ្លែងទៀតថា ស្ត្រីរងគ្រោះមានស្នាមរបួសដោយគ្រាប់កាំភ្លើង បែកឆ្អឹងជំនី និងបែកដុំស៊ីលីខូន តែអវយវៈផ្សេងទៀត គ្មានរងការខូចខាតអ្វីទាំងអស់ និងនៅពេលមើលតាមជ្រុងនៃការវះកាត់ យើងឃើញថា គ្រាប់កាំភ្លើងត្រូវបានបង្វែរទិសដៅដោយសារដុំស៊ីលីខូន។
“នៅផ្នែកខាងឆ្វេងរបស់ដើមទ្រូង មានបេះដូង និងសួត បើគ្រាប់កាំភ្លើងបុកធ្លុះចូលទៅត្រង់ៗ ជនរងគ្រោះអាចរងរបួសធ្ងន់ធ្ងរ ឬអាចដល់ថ្នាក់ស្លាប់បាន” លោកវេជ្ជបណ្ឌិតបានថ្លែងបញ្ចប់សេចក្ដី។
សម្រាប់ស្ត្រីរងគ្រោះវិញ ក្រោយមក នៅពេលធូរស្រាល និងបាត់អាការភ័យស្លន់ស្លោផុតកំពូលហើយ ទើបគ្រូពេទ្យព្យាបាលអាការរបួស និងយកដុំស៊ីលីខូនចេញមក ដើម្បីព្យាបាលត្រង់កន្លែងដែលរងរបួស ដោយផ្ដល់ថ្នាំផ្សះទៀតផង។ ចំណែកឯការស៊ើបសួរអំពីរឿងរ៉ាវមួយនេះមិនទទួលបានលទ្ធផលឡើយ ព្រោះខាងប៉ូលិសរកមិនឃើញទាំងកាំភ្លើង និងអ្នកបាញ់៕
ប្រភព៖ សារព័ត៌មានបរទេស
April 22, 2020
អាជ្ញាធរកាណាដា បាញ់សម្លាប់ “ខ្មាន់កាំភ្លើង” ដែលស្លៀកឈុតប៉ូលិសបន្លំខ្លួន-បើកឡានបាញ់រះទូទាំងទីក្រុង សម្លាប់មនុស្ស 16នាក់
ថ្ងៃទី20 មេសានេះ សារព័ត៌មាន ដេលី មេល និង ដឹ ហ្គាឌៀន បានរាយការណ៍បន្តអំពីហេតុការណ៍ ជនល្មើសបើករថយន្តដើរបាញ់រះនៅតាមទីកន្លែងជាច្រើននៅភាគខាងជើងទីក្រុងផូតាភីក រដ្ឋណូវ៉ាស្កូសៀ របស់ប្រទេសកាណាដា រយៈពេល 12ម៉ោង ដែលធ្វើឱ្យមានអ្នកស្លាប់យ៉ាងតិច 16នាក់ និងរងរបួសមួយចំនួនទៀត តាំងពីថ្ងៃសៅរ៍ទី18 មេសា កន្លងមក។
មកដល់ពេលនេះ ក្រុមអាជ្ញាធរប៉ូលិស អាចគ្រប់គ្រងស្ថានការណ៍បានហើយ និងបានអះអាងថា ជនល្មើសដែលបានដឹងឈ្មោះនៅពេលក្រោយមកគឺ ហ្គាប្រៀល វ៉តមែន ជាជាងធ្វើធ្មេញសិប្បនិម្មិត អាយុ 51ឆ្នាំ បានស្លាប់ហើយ នៅក្នុងស្ថានីយប្រេងមួយកន្លែង នៅឆ្ងាយពីចំណុចបង្កហេតុទៅភាគខាងត្បូងប្រមាណ 96គីឡូម៉ែត្រ កាលពីអំឡុងពេលព្រឹក នៃថ្ងៃទី19 មេសា តាមពេលវេលាក្នុងស្រុក។
ព័ត៌មានបឋម មិនបានបញ្ជាក់ថា តើជនល្មើស វ៉តមែន បានស្លាប់ដោយរបៀបណានោះទេ តែមានរូបភាពពីកាមេរ៉ារបស់ក្រុមអាជ្ញាធរដែលបំពាក់អាវុធ បានសម្រុកចូលទៅប្រកៀករថយន្តជនល្មើស និងប្រញាប់ប្រញាល់នាំយកសាកសពរបស់ វ៉តមែន ចេញពីស្ថានីយប្រេងនោះ ដែលគេប៉ាន់ស្មានថា អាចត្រូវប៉ូលិសបាញ់សម្លាប់ ចំណែកមូលហេតុ និងតើមានរឿងអ្វីដែលបណ្ដាលឱ្យឈានដល់ការបង្កហេតុបាញ់សម្លាប់មនុស្សរបស់ វ៉តមែន នោះ កំពុងស្ថិតក្នុងការស៊ើបសួរនៅឡើយ។
ទីភ្នាក់ងារព័ត៌មានAP បានបញ្ជាក់ថា សោកនាដកម្មបាញ់រះ សម្លាប់មនុស្សដ៏សាហាវឃោរឃៅបំផុតក្នុងប្រវត្តិសាស្ត្រនៃប្រទេសកាណាដានេះ បានកើតឡើងក្នុងអំឡុងពេលព្រលប់ៗនៃថ្ងៃទី18 មេសា បន្ទាប់ពីជនល្មើស វ៉តមែន ដែលបានបន្លំខ្លួនដោយស្លៀកឯកសណ្ឋានប៉ូលិស បើករថយន្តត្រាច់ចរទៅតាមទីកន្លែងជាច្រើននៅក្នុងទីក្រុងផូថាភីក និងប្រើអាវុធដែលជាកាំភ្លើងយន្ត បាញ់រះទៅលើក្រុមមនុស្សចំនួនដ៏ច្រើន ដោយក្នុងរបាយការណ៍ បានបញ្ជាក់ថា ជនល្មើសបានបើកឡានប៉ូលិស តែក្រោយមកអគ្គស្នងការដ្ឋានប៉ូលិសផ្លូវគោក នៃប្រទេសកាណាដា បានថ្លែងអះអាងថា ជារថយន្តច្នៃប្រឌិតធ្វើឱ្យដូចរថយន្តប៉ូលិស។
លោកវរសេនីយ៍ឯកប៉ូលិស គ្រីស លេធើរ ស្នងការប៉ូលិសកាណាដា បានថ្លែងបញ្ជាក់ ដោយបានជឿថា ហេតុការណ៍នោះ ជាទង្វើរបស់ជនល្មើសតែម្នាក់ឯងគត់ ខណៈដែលលោកឧត្ដមសេនីយ៍ទោប៉ូលិស លី ប៊ើរគើរមែន ជំនួយការអគ្គស្នងការប៉ូលិសជាតិ បានថ្លែងថា មន្ត្រីប៉ូលិសម្នាក់ឈ្មោះ ហេឌិ ស្ទីវេនសុន អាយុ 23ឆ្នាំ ជាជនរងគ្រោះម្នាក់ក្នុងចំណោមអ្នកស្លាប់ទាំងនោះ។
ក្រោយពេលបំពេញតួនាទីដែលបានប្រញាប់ប្រញាល់ទៅកន្លែងកើតហេតុ និងព្យាយាមការពារប្រជាជន លោកបានធ្វើដំណើរទៅជួបក្រុមគ្រួសាររបស់មន្ត្រីប៉ូលិស ស្ទីវេនសុន និងគ្មានពាក្យអ្វី ថ្លែងក្នុងការប្រៀបធៀបក្ដីឈឺចាប់របស់ពួកគេបានឡើយ “កូនទាំង 2នាក់ត្រូវបាត់បង់ម្ដាយ ស្វាមីត្រូវបាត់បង់ភរិយា ឪពុកម្ដាយត្រូវបាត់បង់កូនស្រី និងក្ដីបាត់បង់ជាច្រើនទៀតពីមិត្តភក្តិ និងមន្ត្រីមិត្តរួមការងារ”
ចំណែកលោកនាយករដ្ឋមន្ត្រី ចាស្ទីន ធ្រូដូ មេដឹកនាំកាណាដា បានថ្លែងថ្កោលទោសថា នេះគឺជាហេតុការណ៍ដ៏អាក្រក់បំផុតមួយ។ ចំណែកលោក ថម ធែកហ្គាត សមាជិកសភាតំបន់ក្រុងផូថាភីក បានថ្លែងថា អ្នករស់នៅក្នុងទីក្រុងដែលធ្លាប់តែស្ងប់សុខមួយនេះ កំពុងភ័យរន្ធត់ និងមិនចង់ជឿថា មានហេតុការណ៍ដ៏អាក្រក់កើតឡើងនៅទីនេះឡើយ។

ប្រភព៖ សារព័ត៌មានបរទេស
April 20, 2020
ភរិយារបស់នាយករដ្ឋមន្ត្រីកាណាដា ឆ្លងវីរុស COVID-19 បន្ទាប់ពីបានត្រឡប់មកពីប្រទេសអង់គ្លេស
លោកស្រី Sophie Gregoire ដែលជាភរិយារបស់នាយករដ្ឋមន្ត្រីកាណាដា ត្រូវបានធ្វើតេស្តរកឃើញថា មានផ្ទុកវីរុស COVID-19 បន្ទាប់ពីបានវិលត្រឡប់មកពីប្រទេសអង់គ្លេស ប៉ុន្តែ នៅមានសុខភាពល្អ និងមានអាការរោគស្រាលប៉ុណ្ណោះ។
“ដំបូង ខ្ញុំសូមអរគុណយ៉ាងជ្រាលជ្រៅចំពោះអ្នកទាំងអស់ដែលបានសួរសុខទុក្ខខ្ញុំ។ បើទោះជាត្រូវឆ្លងកាត់អាការរោគមិនស្រួលខ្លួនដោយសារវីរុស តែខ្ញុំនឹងមានសុខភាពល្អឡើងវិញមិនខាន” លោកស្រី Sophie Gregoire Trudeau ដែលកំពុងបង្ខាំងខ្លួននៅក្នុងផ្ទះ បានឱ្យដឹងបែបនេះនៅក្នុងសេចក្ដីប្រកាសកាលពីថ្ងៃទី12មីនាកន្លងទៅ។
ការិយាល័យនាយករដ្ឋមន្ត្រីកាណាដា ក៏បានទទួលស្គាល់ថា លោកស្រី Sophie បានឆ្លងមេរោគកូរ៉ូណានេះ។ ការិយាល័យនេះក៏បានឱ្យដឹងថា លោកនាយករដ្ឋមន្ត្រី Trudeau មិនទាន់បានធ្វើតេស្តរកមេរោគនៅឡើយ ដោយសារតែគាត់ពុំមានរោគសញ្ញាដែលគួរសង្ស័យ ប៉ុន្តែលោកនឹងចាប់ផ្ដើមបង្ខាំងខ្លួនឯងក្នុងរយៈពេល14ថ្ងៃ។
លោកស្រី Sophie Gregoire ទើបតែបានវិលត្រឡប់មកប្រទេសកាណាដាវិញ បន្ទាប់ពីបានទៅបំពេញបេសកកម្មនៅឯទីក្រុងឡុងដ៍ ប្រទេសអង់គ្លេស ហើយក៏ចាប់ផ្ដើមមានអាការមិនស្រួលខ្លួនកាលពីយប់ថ្ងៃទី11មីនា ប៉ុន្តែ ភ្លាមនោះ លោកស្រីក៏បានស្វែងរកជំនួយពីក្រុមគ្រូពេទ្យ។
គិតមកដល់ពេលនេះ ប្រទេសកាណាដា បានរកឃើញអ្នកផ្ទុកវីរុសកូរ៉ូណាចំនួន 117នាក់ ក្នុងនោះមានម្នាក់បានបាត់បង់ជីវិត។
COVID-19 បានចាប់ផ្ដើមឆ្លងរាលដាលនៅប្រទេសចិន កាលពីខែធ្នូ ឆ្នាំ2019 ហើយមកដល់ពេលនេះ វាបានបង្ហាញខ្លួននៅក្នុងប្រទេស និងដែនដីចំនួន130 នៅទូទាំងពិភពលោក បណ្ដាលឱ្យមានអ្នកឆ្លងជំងឺជាង 128,343នាក់ ក្នុងនោះមាន 4,720នាក់បានស្លាប់ និង68,324នាក់បានជាសះស្បើយ៕
ប្រភព៖ សារព័ត៌មានបរទេស
March 13, 2020
កាណាដាបន្តកិច្ចព្រមព្រៀងស្តីពីការសម្រួលពាណិជ្ជកម្មដល់កម្ពុជា
បន្ទាប់ពីផុតសុពលភាពកាលពីថ្ងៃទី30 ខែកញ្ញា ឆ្នាំ2018 កន្លងទៅថ្មីៗនេះ ប្រទេសកាណាដាបានឯកភាពជាថ្មីឡើងវិញទៀតដល់កម្ពុជា លើកិច្ចព្រមព្រៀងស្តីពីការសម្រួលពាណិជ្ជកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំង2។
ការឯកភាពបន្តកិច្ចព្រមព្រៀងនេះធ្វើឡើងនៅក្នុងជំនួបពិភាក្សាការងារទ្វេភាគីរវាងឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជា ជាមួយលោកជំទាវ ដូនីកា ប៉ូទី (Donica Pottie) ឯកអគ្គរដ្ឋទូតកាណាដា ប្រចាំព្រះរាជាណាចក្រកម្ពុជាកាលពីម្សិលមិញ។
លោកជំទាវ ដូនីកា ប៉ូទី ឯកអគ្គរដ្ឋទូតនៃប្រទេសកាណាដាបានសម្តែងការកោតសរសើរ ចំពោះគោលនយោបាយរដ្ឋាភិបាលកម្ពុជាក្នុងការលើកទឹកចិត្តដល់អ្នកវិនិយោគបរទេសដែលចូលមកបណ្តាក់ទុនរកស៊ីនៅកម្ពុជា។ លោកជំទាវក៏បានលើកទឹកចិត្តរដ្ឋាភិបាលកម្ពុជាបន្តប្រឹងប្រែង និងប្រកាន់និយាមការងារនេះបន្តទៀត ដើម្បីនាំមកនូវភាពឈ្នះ-ឈ្នះ ដល់គ្រប់តួអង្គពាក់ព័ន្ធ សម្រាប់ឧស្សាហកម្មមួយនេះ ហើយលោកជំទាវនឹងពិនិត្យលទ្ធភាពជួយកៀងគរវិនិយោគិនកាណាដាឱ្យចូលមកបណ្តាក់ទុនលើការកែច្នៃវត្ថុធាតុដើមសំខាន់ៗ ដើម្បីបម្រើការអភិវឌ្ឍឧស្សាហកម្មវាយនភណ្ឌ និងការធ្វើទំនើបកម្មវិស័យកសិកម្ម នៅកម្ពុជា។
ឯកឧត្តមរដ្ឋមន្ត្រី ប៉ាន សូរស័ក្តិ បានលើកឡើងពីកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការគាំទ្រវិស័យវាយនភណ្ឌ តាមរយៈការបន្តស្វែងរកទីផ្សារសក្តានុពលបន្ថែម និងការបង្កើនប្រាក់បៀវត្សរ៍អប្បបរមាជូនកម្មករ-និយោជិត ចាប់ពី 140ដុល្លារ ក្នុងឆ្នាំ2016 ដល់ 170ដុល្លារ ក្នុងឆ្នាំ2018 ហើយគ្រោងនឹងបង្កើនឱ្យបាន 182ដុល្លារ នៅដើមឆ្នាំ2019 ខាងមុខថែមទៀត។
ឯកឧត្តម ប៉ាន សូរស័ក្តិ បានគូសបញ្ជាក់ថា រាជរដ្ឋាភិបាលកម្ពុជាបានអនុលោមតាមកាតព្វកិច្ចការងារដែលអង្គការ ILO បានកំណត់តាំងពីឆ្នាំ1999 និងបានគាំទ្រការអនុវត្តគម្រោងធ្វើឱ្យប្រសើរឡើងនៃរោងចក្រកម្ពុជា (Better Factory Cambodia) ដើម្បីលើកស្ទួយលក្ខខណ្ឌការងារ និងការប្រកួតប្រជែងក្នុងវិស័យនេះ។
សូមជម្រាបថា កាលពីឆ្នាំ2017 ទំហំពាណិជ្ជកម្មទ្វេភាគីរវាងកម្ពុជា និងកាណាដា សម្រេចបានទឹកប្រាក់សរុប 1.04ប៊ីលានដុល្លារអាមេរិក ជាមួយអត្រាកំណើនប្រចាំឆ្នាំ គិតជាមធ្យម 11%។ ក្នុងនោះ ទឹកប្រាក់នាំចេញពីកម្ពុជាទៅកាណាដាមានចំនួន 1ប៊ីលានដុល្លារអាមេរិក និងនាំចូលមានចំនួន 40លានដុល្លារអាមេរិក។ ចំពោះផលិតផលសក្តានុពលនាំចេញរបស់កម្ពុជា រួមមាន៖ សម្លៀកបំពាក់ ស្បែកជើង គ្រឿងផ្គុំយានយន្ត គ្រឿងសង្ហារិម ប្លាស្ទិក ផលិតផលក្មេងលេង និងទំនិញកសិកម្មជាដើម៕

October 17, 2018