កប៉ាល់ - La Reine Media

នាវាមុជទឹក Titan ប្រហែលជាបានរកវិធីងើបឡើងមុនពេលត្រូវគាបខ្ទេច

អតីតទីប្រឹក្សារបស់ OceanGate និយាយថា នាវាមុជទឹក Titan បានទម្លាក់ចោលវត្ថុដែលមានទម្ងន់ធ្ងន់ដើម្បីងើបឡើងមកលើផ្ទៃទឹក មុនពេលត្រូវបាត់ខ្លួន និងត្រូវគាបខ្ទេចដោយសម្ពាធទឹក។

លោក Rob McCallum អតីតទីប្រឹក្សាផ្នែកទីផ្សាររបស់ក្រុមហ៊ុន OceanGate កាលពីថ្ងៃទី 01 កក្កដា បានឱ្យដឹងថា លោកបានដឹងព័ត៌មានបឋមអំពីដំណើរចុងក្រោយរបស់ Titan ជានាវាមុជទឹកដែលបានជួបគ្រោះថ្នាក់នៅបាតមហាសមុទ្រអាត្លង់ទិកកាលពីថ្ងៃទី 18 មិថុនា 2023 ពេលកំពុងចុះទៅទស្សនាសាកសពកប៉ាល់ Titanic ដែលបានលិចកាលពីជាង 100 ឆ្នាំមុន។

«របាយការណ៍ដែលខ្ញុំទទួលបានបន្ទាប់ពីគ្រោះថ្នាក់កើតឡើងបង្ហាញថា នាវា Titan បានទម្លាក់ចោលវត្ថុដែលមានទម្ងន់ធ្ងន់ដើម្បីរកវិធីងើបឡើងពេលស្ថិតក្នុងជម្រៅ 3,500 ម៉ែត្រ បន្ទាប់ពីវាបានដាច់ទំនាក់ទំនងជាមួយកប៉ាល់មេ មុនពេលត្រូវគាបបែកខ្ទេចដោយសម្ពាធទឹកនៅបាតសមុទ្រ» លោក Rob McCallum ថ្លែងដូច្នេះ។

វត្ថុធ្ងន់នោះគឺជារបស់ដែលត្រូវបានភ្ជាប់ជាមួយ Titan ដើម្បីឱ្យវាអាចមុជចុះជ្រៅទៅបាតសមុទ្រ។ មនុស្សនៅក្នុងនាវានឹងទម្លាក់ចោលវត្ថុធ្ងន់នេះនៅពេលចង់ឱ្យនាវាងើបឡើងមកលើ។

យោងតាមការវិភាគ ការទម្លាក់ចោលវត្ថុធ្ងន់នេះគឺមានន័យថា អ្នកបញ្ជានាវាបានរកវិធីលុបចោលដំណើរនេះ ហើយអ្នកនៅក្នុងនាវាទំនងជាបានដឹងថា នាវាកំពុងមានបញ្ហា។

លោក Rob McCallum គឺជាសហស្ថាបនិករបស់ក្រុមហ៊ុនដំណើរផ្សងព្រេង EYOS Expeditions។ លោកធ្លាប់បានដឹកនាំភ្ញៀវចុះទៅមើល Titanic ជាច្រើនលើកផងដែរ។ ប៉ុន្តែ លោកបានប្រើប្រាស់នាវាមុជទឹកដែលអាចមុជជ្រៅជាង 5,900 ម៉ែត្រ ដែលត្រូវបានទទួលស្គាល់ដោយសមាគមដឹកជញ្ជូនតាមសមុទ្រ DNV។

Rob McCallum គឺជាមនុស្សទីពីរដែលបាននិយាយថា នាវា Titan បានរកវិធីងើបឡើងមុនពេលជួបគ្រោះថ្នាក់។ មុននោះ លោក James Cameron អ្នកដឹកនាំសម្ដែងរបស់ខ្សែភាពយន្ត Titanic ដែលមានបទពិសោធន៍ច្រើនក្នុងការមុជចូលសមុទ្រ ក៏បាននិយាយដូចលោក Rob McCallum។

នាវា Titan បានដាច់ទំនាក់ទំនងជាមួយកប៉ាល់មេកាលពីថ្ងៃទី 18 មិថុនា 2023 បន្ទាប់ពីមុជចូលសមុទ្របានប្រហែលជិតពីរម៉ោង នៅក្នុងដំណើរចុះទៅមើលសាកសពកប៉ាល់ Titanic ដែលស្ថិតក្នុងជម្រៅ 3,800 ម៉ែត្រ។

សមត្ថកិច្ចកំពុងធ្វើការស៊ើបអង្កេតដើម្បីស្វែងរកមូលហេតុដើមដែលបាននាំឱ្យនាវាមុជទឹក Titan ជួបគ្រោះថ្នាក់។ ក្រុមហ៊ុន OceanGate ដែលជាម្ចាស់នាវា Titan មិនទាន់មានការឆ្លើយតបអ្វីនៅឡើយ បន្ទាប់ពីមានការប្រកាសរបស់លោក Rob McCallum៕

July 4, 2023

អនាគតនៃសកម្មភាពទស្សនាសាកសពកប៉ាល់ Titanic ក្រោយហេតុការណ៍ Titan

ករណីនាវាមុជទឹក Titan ដែលដឹកមនុស្ស 5 នាក់ជួបគ្រោះថ្នាក់នៅបាតមហាសមុទ្រអាត្លង់ទិក បាននាំឱ្យមានការបារម្ភអំពីអនាគតនៃសកម្មភាពផ្សងព្រេងចុះទៅមើលសាកសពកប៉ាល់ Titanic ដែលបានលិចកាលពីជាង 100 ឆ្នាំមុន។

ចាប់តាំងពីកប៉ាល់ Titanic ចាប់ផ្ដើមដំណើរឆ្លងកាត់មហាសមុទ្រអាត្លង់ទិកដំបូងកាលពីថ្ងៃទី 10 មេសា 1912 មនុស្សម្នានៅជុំវិញពិភពលោកក៏ចាប់អារម្មណ៍ខ្លាំងទៅលើកប៉ាល់នេះ ក៏ដូចជាហេតុការណ៍គ្រោះថ្នាក់របស់វា។ រឿងរ៉ាវរបស់ Titanic មិនត្រឹមតែជួយឱ្យគេផលិតបានភាពយន្តក៏អស្ចារ្យនោះទេ តែក៏បានជួយជំរុញវិស័យទេសចរណ៍ផ្សងព្រេងទៅកាន់បាតសមុទ្រនៅកាណាដា សហរដ្ឋអាម៉េរិក និងអង់គ្លេសផងដែរ។

ទេសចររាប់លាននាក់បានទៅកាន់សារមន្ទីរ បូជនីយស្ថានស្ដីពីកប៉ាល់ និងសោកនាដកម្ម Titanic ហើយក៏មានមនុស្សជាច្រើនចង់មើលសាកសពកប៉ាល់នេះដោយផ្ទាល់។ ពួកគេហ៊ានចំណាយរហូតដល់ 250,000 ដុល្លារអាម៉េរិកដើម្បីសម្រេចក្ដីប្រាថ្នាគយគន់សាកសពកប៉ាល់ Titanic នៅជម្រៅជិត 4,000 ម៉ែត្រ ដោយជិះក្នុងនាវាមុជទឹក។

ក៏ប៉ុន្តែ ការស្លាប់របស់មនុស្ស 5 នាក់នៅក្នុងនាវាមុជទឹក Titan ដែលកើតហេតុនៅមិនឆ្ងាយពីសាកសពកប៉ាល់ Titanic ធ្វើឱ្យគ្រប់គ្នាមានការបារម្ភអំពីអនាគតនៃវិស័យទេសចរណ៍នៅបាតសមុទ្រ។

អ្នកស្រី Jean Legg កូនស្រីរបស់បុរសម្នាក់ដែលជាបុគ្គលិកលើកប៉ាល់ Titanic បាននិយាយថា «…កប៉ាល់ Titanic គួរតែត្រូវបានទុកឱ្យនៅក្នុងភាពស្ងប់សុខ។ កប៉ាល់នេះគួរតែត្រូវបានចាត់ទុកជាសុគតិភពរបស់វិញ្ញាណទាំងឡាយនៃមនុស្សដែលបានបាត់បង់ជីវិត»។

ឪពុករបស់អ្នកស្រី Jean Legg មានឈ្មោះថា Sidney Daniels ជាបុគ្គលិកបម្រើការនៅលើកប៉ាល់ Titanic ក្នុងពេលមានអាយុទើបតែ 18 ឆ្នាំ។ ក្នុងយប់កើតហេតុលិចកប៉ាល់ Titanic លោក Daniels បានរួចពីការស្លាប់ ដោយសារបានលោតចូលសមុទ្រ និងហែលដល់ទូកសុវត្ថិភាព។ គាត់បានទទួលមរណភាពកាលពីឆ្នាំ 1983។

ក្រោយពីនាវាមុជទឹក Titan ជួបគ្រោះថ្នាក់កាលពីថ្ងៃទី 18 មិថុនា 2023 ព័ត៌មានជាច្រើនបានឱ្យដឹងថា ក្រុមហ៊ុន OceanGate ដែលគ្រប់គ្រងនាវា Titan មិនបានគោរពគោលការណ៍ស្ដង់ដាធម្មតាស្ដីពីសុវត្ថិភាពរបស់នាវា។

Titan មិនមែនជានាវាដំបូងគេដែលចុះទៅមើលសាកសពកប៉ាល់ Titanic។ Deep Ocean Expeditions បានចាប់ផ្ដើមសកម្មភាពដូចគ្នានេះចាប់ពីឆ្នាំ 1998 ដោយលក់សំបុត្រតម្លៃ 32,000 ដុល្លារ/ម្នាក់។ បណ្ដាក្រុមហ៊ុនដទៃដូចជា Bluefish, RMS Titanic Inc និង Blue Marble Private ក៏ធ្វើសកម្មភាពនេះ។

ក៏ប៉ុន្តែ Deep Ocean Experditions និង Bluefish បានបញ្ឈប់សកម្មភាពតាំងពីឆ្នាំ 2012 ខណៈ RMS Titanic Inc ក៏បានផ្អាកតាំងពីជាងមួយទសវត្សរ៍កន្លង។

អ្នកស្រី Jean Legg ជាកូនស្រីរបស់លោក Sidney Daniels អតីតបុគ្គលិកលើកប៉ាល់ Titanic

នាវាមុជទឹកដែលផ្សងព្រេងចុះទៅទស្សនាសាកសពកប៉ាល់ Titanic ធ្វើសកម្មភាពក្នុងតំបន់សមុទ្រអន្តរជាតិ ដូច្នេះពុំមានស្ថាប័នរដ្ឋណាមួយគ្រប់គ្រងស្ដង់ដាសុវត្ថិភាពរបស់នាវាទាំងនេះ។ ប៉ុន្តែក្រុមហ៊ុននានាបានស្ម័គ្រចិត្តអនុញ្ញាតឱ្យរដ្ឋពិនិត្យនាវារបស់ពួកគេ។

នៅលើពិភពលោកមាននាវាត្រឹមតែ 10 គ្រឿងប៉ុណ្ណោះដែលមានសមត្ថភាពចុះដល់ជម្រៅរបស់សាកសពកប៉ាល់ Titanic។ នេះបើតាមលោក Will Kohnen ប្រធានសមាគមបច្ចេកវិទ្យាផ្លូវទឹក។ លោក Will និយាយថា «នាវាទាំងនេះសុទ្ធតែត្រូវបានត្រួតពិនិត្យ លើកលែងតែ Titan»។

នៅមុន និងក្រោយកើតហេតុការណ៍គ្រោះថ្នាក់នាវាមុជទឹក Titan បុគ្គល និងស្ថាប័នជាច្រើនបានអំពាវនាវឱ្យមានការត្រួតពិនិត្យនាវា Titan និងក្រុមហ៊ុន OceanGate ក៏ដូចជាបណ្ដាក្រុមហ៊ុនដែលផ្សេងព្រេងចុះទៅទស្សនាសាកសព Titanic។ ពួកគេយល់ថា ក្រុមហ៊ុន OceanGate មិនយកចិត្តទុកដាក់លើបញ្ហាសុវត្ថិភាព។

ក៏ប៉ុន្តែ អ្នកខ្លះថា ប្រវត្តិសាស្ត្រនឹងបាត់ស្រមោល បើសិនដំណើរចុះទៅមើលសាកសព Titanic ត្រូវបានបញ្ឈប់ជារៀងរហូត។ ពួកគេយល់ថា វិស័យទេសចរណ៍ប្រភេទនេះនឹងងើបឡើងវិញ។

លោក Alan Whitefield ដែលជាប្រធានក្រុមហ៊ុន Silvercrest Submarines នៅប្រទេសអង់គ្លេស និយាយថា «វាដូចទៅនឹងវិស័យអាកាសចរណ៍។ ពេលមានយន្តហោះធ្លាក់ គ្រប់គ្នាតែងតែព្រួយបារម្ភ…។ ប៉ុន្តែច្រើនខែក្រោយមក ពួកគេក៏បន្តជិះយន្តហោះ និងភ្លេចរឿងរ៉ាវដែលបានកើតឡើង»៕

July 3, 2023

សាកសពកប៉ាល់ Titanic នឹងទៅជាយ៉ាង បើសិនបូមទឹកអស់ពីជុំវិញ?

ថ្មីៗនេះ គម្រោងមួយបានប្រើប្រាស់បច្ចេកវិទ្យាស្កេន 3D ដ៏ទំនើប ដើម្បីបង្ហាញឡើងវិញនូវរូបភាពសាកសពកប៉ាល់ដែលបានលិចកាលពីប្រហែល 111 ឆ្នាំមុន យ៉ាងលំអិតបំផុត។

បច្ចេកវិទ្យាខាងលើ មិនត្រឹមតែបង្ហាញរូបភាពដ៏ស្រស់ស្អាត និងភាពអស្ចារ្យរបស់កប៉ាល់មួយកាលពីអតីតកាល ប៉ុន្តែក៏ជួយឱ្យអ្នកស្រាវជ្រាវដឹងអំពីអាថ៌កំបាំងស្ដីពីគ្រោះថ្នាក់កាលពីឆ្នាំ 1912 ផងដែរ។

គម្រោងខាងលើនេះត្រូវបានអនុវត្តកាលពីរដូវក្ដៅឆ្នាំ 2022 ដោយក្រុមហ៊ុនបង្កើតផែនទីបាតសមុទ្រ Magellan Ltd. និងផលិតកម្មភាពយន្តឯកសារ Atlantic Production។ ពួកគេប្រើប្រាស់កាមេរ៉ាបញ្ជាពីចម្ងាយដើម្បីស្វែងយល់ពីគំនរបាក់បែករបស់សាកសពកប៉ាល់ Titanic ក្នុងជម្រៅប្រហែល 4,000 ម៉ែត្រ នៅបាតមហាសមុទ្រអាត្លង់ទិក ដែលមានចម្ងាយប្រហែល 450 គីឡូម៉ែត្រពីឆ្នេរសមុទ្រ Newfoundland និង Labrador របស់ប្រទេសកាណាដា។

ក្រោយការថតនៅបាតសមុទ្រជាង 200 ម៉ោង ពួកគេក៏ប្រមូលបានរូបភាពចំនួន 700,000 រូប និងបានកាត់តចូលគ្នាដើម្បីបង្កើតបានជារូបភាព 3D ដ៏លំអិតដំបូងស្ដីពីសាកសពកប៉ាល់ Titanic។

Titanic នៅតែជានិមិត្តរូបរបស់មហាគ្រោះថ្នាក់នៅលើសមុទ្ររបស់មនុស្សជាតិ។ ដោយសារមានបច្ចេកវិទ្យាស្កេន 3D យើងអាចមើលឃើញសាកសពកប៉ាល់នេះបានយ៉ាងច្បាស់ និងប្រកបដោយភាពរស់រវើកជាងពេលណាៗទាំងអស់៕

July 1, 2023

បំណែកសាកសពនាវាមុជទឹក Titan ត្រូវបានស្រង់ឡើងគោក

បំណែករបស់នាវាមុជទឹក Titan ដែលបានជួបគ្រោះថ្នាក់កាលពីថ្ងៃទី 18 មិថុនា 2023 ត្រូវបានស្រង់ឡើងគោក និងនាំទៅកាន់កំពង់ផែនៅប្រទេសកាណាដា ក្នុងនោះក៏អាចមានផ្ទុកបំណែកសាកសពរបស់ជនរងគ្រោះ។

ក្រុមហ៊ុនអាម៉េរិក Pelagic Research ដែលមានរ៉ូបូតបញ្ជាពីចម្ងាយ Odysseus ដែលត្រូវបានប្រើប្រាស់ក្នុងការស្វែងរកនាវា Titan បានឱ្យដឹងថា បំណែកនានាពីសាកសពនាវាមុជទឹក Titan ក្នុងនោះអាចមានផ្នែកខាងមុខ និងឧបករណ៍បញ្ជា ត្រូវបាននាំទៅកាន់កំពង់ផែ St. John នៅប្រទេសកាណាដា កាលពីថ្ងៃទី 28 មិថុនា។

«ក្រុមអ្នកស្វែងរកបានធ្វើការទាំងយប់ទាំងថ្ងៃចំនួន 10 ថ្ងៃ នៅក្នុងការស្វែងរកសាកសពនាវា Titan» អ្នកនាំពាក្យរបស់ក្រុមហ៊ុនខាងលើឱ្យដឹងដូច្នេះ និងបន្តថា បេសកកម្មស្រង់ឡើងគោករបស់ពួកគេត្រូវបានបិទបញ្ចប់។

បំណែកពីនាវា Titan នឹងត្រូវបានដឹកទៅកាន់សហរដ្ឋអាម៉េរិក ដើម្បីវិភាគបន្ថែម។ កម្លាំងឆ្មាំសមុទ្រអាម៉េរិក ថ្មីៗនេះក៏បានបញ្ជាក់ថា ប្រហែលជាបានរកឃើញបំណែកសាកសពរបស់ជនរងគ្រោះនៅក្បែរបំណែកនាវា ក្នុងពេលស្រង់ឡើងគោក។

Jason Meubauer ប្រធានក្រុមស្រាវជ្រាវអំពីហេតុកាណ៍គ្រោះថ្នាក់នាវា Titan របស់សហរដ្ឋអាម៉េរិក និយាយថា «នៅមានកិច្ចការត្រូវធ្វើជាច្រើនទៀតដើម្បីស្វែងរកមូលហេតុដែលនាំឱ្យកើតមានហេតុកាណ៍ដ៏សោកសៅរបស់ Titan»។

នាវាមុជទឹក Titan បានដាច់ទំនាក់ទំនងតាំងពីថ្ងៃទី 18 មិថុនា 2023 ប្រហែលជិតពីរម៉ោងបន្ទាប់ពីបានចាកចេញពីកប៉ាល់មេ Polar Prince ដើម្បីចុះទៅមើលសាកសពកប៉ាល់ Titanic។ កាលពីថ្ងៃទី 22 មិថុនា ក្រុមល្បាតសមុទ្រអាម៉េរិកអះអាងថា នាវា Titan បានបែកបាក់ខ្ទេចខ្ទីនៅបាតសមុទ្រ បណ្ដាលឱ្យមនុស្ស 5 នាក់បាត់បង់ជីវិត។ បំណែករបស់ Titan ត្រូវបានរកឃើញនៅតំបន់ដែលមានចម្ងាយពីក្បាលសាកសពកប៉ាល់ Titanic ប្រហែល 488 ម៉ែត្រ។

មន្ត្រីអាម៉េរិកយល់ថា Titan ត្រូវបានកម្ទេចដោយសម្ពាធទឹកក្នុងជម្រៅជិត 4,000 ម៉ែត្រ ធ្វើឱ្យជនរងគ្រោះហាក់ត្រូវស្លាប់ភ្លាមៗ ប៉ុន្តែមិនទាន់ដឹងច្បាស់ថា គ្រោះថ្នាក់នេះកើតឡើងដោយសារបញ្ហាបច្ចេកទេសក្នុងនាវា ឬដោយសារមនុស្សធ្វើឱ្យមានកំហុស៕

June 29, 2023

ការស្រង់សាកសពកប៉ាល់ Titanic និងមូលហេតុដែលគេមិនអាចធ្វើបាន

ការស្រង់យកសាកសពកប៉ាល់ Titanic ដែលបានលិចកាលពី 111 ឆ្នាំមុន ពិតជាពិបាកនឹងធ្វើទៅរួច ព្រោះត្រូវការចំណាយប្រាក់ច្រើន រួមនឹងកត្តាជាច្រើនផ្សេងទៀត។

យោងតាមទំព័រ Business Insider មូលហេតុដែលគេមិនអាចស្រង់សាកសពកប៉ាល់ Titanic ឡើងគោកគឺ ដោយសារមានមូលហេតុធំៗបី រួមមាន ការចំណាយប្រាក់ច្រើន, Titanic កំពុងរលាយ និងត្រូវបានចាត់ទុកជាទីបញ្ចុះសព។

1-សាកសពកប៉ាល់ Titanic គឺជាកន្លែងបញ្ចុះសព

មនុស្សប្រហែល 1,500 នាក់បានស្លាប់នៅក្នុងហេតុការណ៍លិចកប៉ាល់ទេសចរណ៍ Titanic កាលពីឆ្នាំ 1912។ ក្រោយហេតុការណ៍នេះ សាកសពជាង 300 នាក់ត្រូវបានស្រង់ឡើងគោក ខណៈដែលសាកសពដទៃទៀត ខ្លះលិចទៅតាមកប៉ាល់ ខ្លះក៏អណ្ដែតចេញឆ្ងាយពីតំបន់កើតហេតុ។ រដ្ឋាភិបាលអាម៉េរិក និងអង់គ្លេស យល់ព្រមចាត់ទុកសាកសពកប៉ាល់ Titanic ជាទីបញ្ចុះសព ជាកន្លែងរម្លឹកហេតុការណ៍សោកនាដកម្ម។ ដូច្នេះ តំបន់នេះនឹងត្រូវបានការពារ ជំនួសឱ្យការស្រង់ឡើងគោក។

2- សាកសពកប៉ាល់ Titanic កំពុងរលាយ

កប៉ាល់នេះត្រូវបានសាងសង់ពីបន្ទះដែកកម្រាស់ 2.5 សង់ទីម៉ែត្រ និងប្រើប្រាស់ដែកគោលចំនួនពីរលានគ្រាប់។ បាក់តេរី Halomonas titanicae កំពុងតែនាំគ្នាស៊ីដែក និងស្ពាន់ធ័រនៅលើសាកសពកប៉ាល់ Titanic។ ក្នុងពេលរំលាយអាហារ បាក់តេរីនេះបង្កើតបានជា rusticle គ្របដណ្ដប់ពេញសាកសពកប៉ាល់។

Rusticle ជាវត្ថុធាតុម្យ៉ាងដែលដូចទៅនឹងកំណកច្រែះ និងងាយរលាយ។ ក្រៅពី rusticle ជាតិប្រៃរបស់ទឹកសមុទ្រ និងលំហូរទឹកសមុទ្រ ក៏ជាកត្តាដែលនាំឱ្យសាកសពកប៉ាល់ Titanic អាចបាត់ខ្លួននាពេលដ៏ខ្លីខាងមុច ពិបាកក្នុងការស្រង់ឡើងគោក។

3- គេនឹងត្រូវចំណាយប្រាក់យ៉ាងច្រើន បើសិនចង់ស្រង់សាកសព Titanic

ឆ្នាំ 1914 វិស្វាករ Charles Smith ធ្លាប់រៀបគម្រោងស្រង់សាកសពកប៉ាល់ Titanic ឡើងមកលើគោក។ ពេលនោះ លោកគណនាឃើញថា នឹងត្រូវចំណាយប្រាក់ 1.5 លានដុល្លារអាម៉េរិក គឺប្រហែល 45 លានដុល្លារបច្ចុប្បន្ន។ ក៏ប៉ុន្តែ កាលពីឆ្នាំ 2013 គេត្រូវចំណាយប្រាក់អស់ 800 លានដុល្លារក្នុងការស្រង់កប៉ាល់ Costa Concordia ដែលបានក្រឡាប់។ ដូច្នេះ ការស្រង់សាកសពកប៉ាល់ Titanic នឹងត្រូវចំណាយអស់ប្រាក់ច្រើនជាងនេះមិនខាន ព្រោះវាមានភាពស្មុគស្មាញខ្លាំងណាស់៕

June 27, 2023

មហាសេដ្ឋីកំពូលសំណាង ព្រោះមិនបានស្លាប់ក្នុងនាវាមុជទឹក Titan

Jay Bloom សប្បាយចិត្តនៅពេលបង្អួតកូនប្រុសអំពីគម្រោងចុះទៅទស្សនាសាកសពកប៉ាល់ Titanic នៅបាតមហាសមុទ្រ ដោយជិះក្នុងនាវាមុជទឹក Titan ប៉ុន្តែសំណាងល្អ ព្រោះបានកូនព្រមានទាន់ពេល។

«មូលហេតុដែលឪពុកខ្ញុំមិនទៅក៏ព្រោះតែខ្ញុំបានព្រមានគាត់ថា «ប៉ា កប៉ាល់មុជទឹកនោះមិនអាចនៅសេសសល់ក្នុងជម្រៅជ្រៅបែបនេះនៅក្រោមមហាសមុទ្រនោះទេ» Sean Bloom អាយុ 20 ឆ្នាំ កូនប្រុសរបស់មហាសេដ្ឋី Jay Bloom និយាយកាលពីថ្ងៃទី 24 មិថុនាដូច្នេះ។

Sean បន្ថែមថា «ខ្ញុំព្រួយបារម្ភណាស់ ព្រោះគិតថា កូននាវានេះមិនអាចស៊ូទ្រាំបានជាមួយនឹងសម្ពាធខ្លាំងបែបនេះ។ វាក៏មិនអាចមុជទៅជ្រៅដូច្នេះ»។

Sean ចូលចិត្តស្រាវជ្រាវអំពី Titanic ហើយលោក Jay ដែលជាមហាសេដ្ឋីម្នាក់ដែរនោះ ក៏ចង់ឱ្យកូនប្រុសទៅជាមួយខ្លួន។ Stockton Rush ស្ថាបនិក និងជា CEO របស់ OceanGate ដែលក្រុមហ៊ុនគ្រប់គ្រងនាវា Titan បានទៅជួប Jay កាលពីខែមីនា។ ពួកគេបានទៅមើលពិព័រណ៍ Titanic នៅសណ្ឋាគារ Luxor និងបានពិភាក្សាគ្នាអំពីដំណើរផ្សងព្រេង។

Jay ឱ្យដឹងថា លោក Rush ជំរុញជាបន្តបន្ទាប់ដើម្បីឱ្យគាត់ទិញសំបុត្រទៅមើល Titanic នៅបាតសមុទ្រ។ ក្នុងពេល Rush កំពុងបញ្ចុះបញ្ចូល Jay កូនរបស់ Jay គឺ Sean និងមិត្តរបស់គេក៏ស្វែងយល់បន្ថែមអំពី Titan ហើយពួកគេក៏ចាប់ផ្ដើមព្រួយភ័យ។

«នោះគឺជាកូននាវាដ៏តូច មនុស្ស 5 នាក់អង្គុយប្រជ្រៀតគ្នានៅខាងក្នុង។ វាធ្វើឱ្យខ្ញុំមានអារម្មណ៍ថាគ្មានសុវត្ថិភាព។ អារម្មណ៍របស់ខ្ញុំរម្លឹកខ្ញុំជានិច្ចថា មិនគួរធ្វើដំណើរលើកនេះ» Sean និយាយដូច្នេះ។

Jay Bloom (ឆ្វេង) និងកូនប្រុស Sean Bloom

នៅចំពោះមុខឪពុក Sean បានព្រមាន និងរៀបរាប់អំពីបញ្ហាសុវត្ថិភាពដែល Titan អាចជួបប្រទះ។ ចុងក្រោយ ឪពុក និងកូនក៏យល់ស្របគ្នាថា មិនទៅ។ Rush ក៏បានជំនួសកៅអីរបស់ Sean និង Jay ដោយលក់សំបុត្រឱ្យមហាសេដ្ឋីអង់គ្លេសដើមកំណើតប៉ាគីស្ថាន Shahzada Dawood និងកូនប្រុស Suleman។

នាវាមុជទឹក Titan បានបាត់ខ្លួនកាលពីថ្ងៃទី 18 មិថុនា ពេលកំពុងដឹកមនុស្ស 5 នាក់ ធ្វើដំណើរចុះទៅមើលសាកសពកប៉ាល់ Titanic ក្រោមបាតមហាសមុទ្រអាត្លង់ទិក ជម្រៅជិត 4,000 ម៉ែត្រ និងមានចម្ងាយពី Newfoundland របស់កាណាដា ប្រហែល 600 គីឡូម៉ែត្រ។ ក្រុមមន្ត្រីអាម៉េរិក និងក្រុមហ៊ុន OceanGate កាលពីថ្ងៃទី 22 មិថុនា បានប្រកាសជាផ្លូវការថា នាវា Titan បានផ្ទុះបែក ហើយមនុស្ស 5 នាក់ក្នុងនាវាបានបាត់បង់ជីវិត។

June 26, 2023

កប៉ាល់ទេសចរណ៍ធំជាងគេបង្អស់លើពិភពលោក ជិតដំណើរការជាផ្លូវការ

(ហ្វាំងឡង់) – កប៉ាល់ The Icon of the Seas ដែលមានបណ្ដោយ 365 ម៉ែត្រ និងអាចដាក់ទេសចរបានជាង 7,000 នាក់ កំពុងស្ថិតក្នុងដំណាក់កាលបង្ហើយកិច្ចការចុងក្រោយបង្អស់ មុនពេលចេញដំណើរជើងដំបូងនៅខែមករា 2024។

ដោយមានបណ្ដោយពីក្បាលដល់កន្ទុយស្មើនឹងប្រវែងរបស់ទីលានបាល់ទាត់ចំនួន 3.5 ទីលានបូកចូលគ្នា The Icon of the Seas នឹងក្លាយជាកប៉ាល់ទេសចរណ៍ធំជាងគេបំផុតលើពិភពលោក។

កប៉ាល់ទេសចរណ៍ខាងលើដែលត្រូវបានបញ្ជាទិញដោយក្រុមហ៊ុន Royal Caribbean ត្រូវបានដាក់ឈ្មោះថា The Icon of the Seas។ កប៉ាល់នេះនឹងប្រើប្រាស់ម៉ាស៊ីនដំណើរការដោយឧស្ម័នធម្មជាតិរាវ (LNG) និងបំពាក់បច្ចេកវិទ្យាថ្មីៗ ដែលជួយឱ្យវាក្លាយជាកប៉ាល់ទំនើបបំផុតមួយនៅលើពិភពលោក។ នេះបើតាម Tim Meyer នាយកប្រតិបត្តិរបស់ក្រុមហ៊ុនសាងសង់កប៉ាល់ Meyer Turku។

The Icon of the Seas អាចដាក់អ្នកដំណើរបាន 7,600 នាក់ ច្រើនជាងឆ្ងាយបើធៀបនឹងជាង 1,500 នាក់របស់កប៉ាល់ទេសចរណ៍ខ្នាតយក្ស Titanic ដែលបានលិចកាលពីឆ្នាំ 1912 (111 ឆ្នាំមុន)។

ការធ្វើដំណើរជើងដំបូងរបស់កប៉ាល់ The Icon of the Seas នឹងមានរយៈពេល 7 យប់ ដោយចាប់ផ្ដើមចេញពី Miami របស់សហរដ្ឋអាម៉េរិក នៅក្នុងខែមករា 2024៕

June 26, 2023

បទពិសោធន៍ «វិះនឹងស្លាប់ក្នុងនាវាមុជទឹកដូច Titan នៅក្បែរសាកសពកប៉ាល់ Titanic»

គ្រោះថ្នាក់នាវាមុជទឹក Titan បានធ្វើឱ្យ Michael Guillen នឹកឃើញដល់បទពិសោធន៍ដ៏រន្ធត់នៅពេលជាប់ក្នុងនាវាមុជទឹកនៅត្រង់កន្លែងដូចទីតាំងក្នុងករណី Titan កាលពីឆ្នាំ 2000។

«ខ្ញុំគឺជាមនុស្សម្នាក់ក្នុងចំណោមអ្នកយកព័ត៌មានដំបូងៗដែលបានមើលឃើញសាកសពកប៉ាល់ Titanic នៅបាតសមុទ្រអាត្លង់ទិក។ ប្រការនោះធ្វើឱ្យខ្ញុំមានមោទកភាព» Michael Guillen បណ្ឌិតផ្នែករូបវិទ្យាអាម៉េរិក រៀបរាប់អំពីដំណើរចុះទៅមើលសាកសពកប៉ាល់ Titanic ក្នុងនាមជាអ្នកយកព័ត៌មានផ្នែកវិទ្យាសាស្ត្ររបស់ទូរទស្សន៍ ABC កាលពី 23 ឆ្នាំមុន។

ក្នុងដំណើរផ្សងព្រេងនោះ Guillen ទៅជាមួយមិត្តម្នាក់ឈ្មោះ Brian និងអ្នកបើកបរនាវាជនជាតិរុស្ស៊ី Viktor នៅក្នុងនាវាមុជទឹក Mir-1 របស់រុស្ស៊ី ដែលត្រូវបានទម្លាក់ចុះទឹកពីកប៉ាល់មេ Akademik Mstislav Keldysh។ ក្រោយពីបានទស្សនាផ្នែកខាងមុខរបស់សាកសពកប៉ាល់ Titanic ប្រកបដោយភាពងាយស្រួលនៅក្នុងជម្រៅ 3,800 ម៉ែត្រ ពួកគេក៏សម្រេចចិត្តផ្លាស់ទីទៅកាន់ផ្នែកខាងក្រោយរបស់កប៉ាល់។

លោក Guillen រៀបរាប់៖ «ពេលឆ្លងកាត់តំបន់ដែលមានបំណែកជាច្រើន ដើម្បីឆ្ពោះទៅកាន់ចំណុចកន្ទុយកប៉ាល់ ពួកយើងក៏ស្រាប់តែត្រូវស្រូបចូលខ្សែទឹកដែលហូរខ្លាំងនៅបាតសមុទ្រ។ ចុងក្រោយ Mir-1 ត្រូវជាប់គាំងទៅនឹងស្លាបចក្រដ៏ធំរបស់កប៉ាល់ Titanic»។

«ក្រោយពីការប៉ះទង្គិច ពួកយើងឃើញដុំដែកច្រែះរបស់កប៉ាល់ Titanic ធ្លាក់មកលើនាវាមុជទឹក» លោក Guillen បន្ថែម និងបន្តថា «ពេលនោះខ្ញុំគិតថា ខ្ញុំនឹងមិនអាចគេចផុតពីការស្លាប់ឡើយ»។

Viktor ដែលធ្លាប់ជាអ្នកបើកបរយន្តហោះចម្បាំង MiG របស់រុស្ស៊ី ក៏បានរកវិធីរំដោះនាវាមុជទឹក។ លោក Guillen និយាយថា ពេលនោះ «ដូចទៅនឹងរថយន្តរបស់អ្នកកំពុងជាប់ផុង ហើយអ្នកត្រូវរកវិធីថយក្រោយដើម្បីរំដោះខ្លួន។ ពួកយើងសុទ្ធតែរក្សាភាពស្ងប់ស្ងាត់ ព្រោះមិនចង់រំខាន ឬធ្វើឱ្យ Viktor បែកអារម្មណ៍។ ពួកយើងសុទ្ធតែដឹងថា កំពុងស្ថិតក្នុងស្ថានភាពអាសន្ន…»។

នាវា Mir-1 ត្រូវជាប់ប្រហែលមួយម៉ោងក្នុងភាពងងឹតនៅបាតសមុទ្រ ដោយសារតែ Viktor សម្រេចចិត្តបិទភ្លើងដើម្បីសន្សំសំចៃថាមពល។ «ខ្ញុំមិនភ្លេចសោះឡើយនូវស្ថានភាពដែលគិតថា ខ្លួននឹងស្លាប់មិនខាន» លោក Guillen រម្លឹកឡើងដូច្នេះ។

ក្នុងពេលនោះ Guillen មានអារម្មណ៍ថា នាវាកំពុងផុសឡើង។ «ខ្ញុំងាកក្រោយសួរ Viktor ថា មានបញ្ហាអ្វីអត់? គាត់ក៏ឆ្លើយដោយសំឡេងស្អកៗថា «មិនមានបញ្ហាទេ»។ ពេលនោះទើបខ្ញុំមានអារម្មណ៍ធូរទ្រូង» លោក Guillen ថ្លែងបន្តដូច្នេះ។

ដោយសារជំនាញរបស់ Viktor ចុងក្រោយ នាវាមុជទឹក Mir-1 ក៏បានរំដោះខ្លួនផុតពីស្លាបចក្រ និងគំនរបាក់បែករបស់សាកសពកប៉ាល់ Titanic។ ពួកគេត្រូវចំណាយពេលពីរម៉ោងកន្លះដើម្បីងើបឡើងលើផ្ទៃទឹក និងផុតពីគ្រោះអាសន្ន។

កាលពីឆ្នាំ 2000 មានតែពីរប្រទេសប៉ុណ្ណោះដែលអាចអភិវឌ្ឍនាវាមុជទឹកដែលស៊ូទ្រាំបានជាមួយនឹងសម្ពាធទឹកសមុទ្រដ៏មហាសាល នោះគឺប្រទេសបារាំង និងរុស្ស៊ី។ នេះបើតាម លោក Guillen។

នាវាមុជទឹក Mir របស់រុស្ស៊ី មានបណ្ដោយ 7.8 ម៉ែត្រ, ទទឹង 3.6 ម៉ែត្រ, កម្ពស់ 3 ម៉ែត្រ និងទម្ងន់ 18,600 គីឡូក្រាម។ នាវានេះអាចចុះជ្រៅរហូតដល់ 6,000 ម៉ែត្រ។ ក្នុងការធ្វើតេស្ដជាក់ស្ដែង Mir-1 អាចចុះដល់ជម្រៅ 6,170 ម៉ែត្រ និង Mir-2 អាចចុះដល់ 6,120 ម៉ែត្រ៕

June 26, 2023

កាណាដា និងអាម៉េរិក បើកការស៊ើបអង្កេតករណីគ្រោះថ្នាក់នាវា Titan

រដ្ឋាភិបាលកាណាដា បើកការស៊ើបអង្កេតលើហេតុការណ៍គ្រោះថ្នាក់នាវាមុជទឹក Titan ដែលបានបណ្ដាលឱ្យមនុស្ស 5 នាក់ស្លាប់ ពេលចុះទៅទស្សនាសាកសពកប៉ាល់ Titanic នៅបាតមហាសមុទ្រអាត្លង់ទិក។

អាជ្ញាធរកាណាដា កាលពីថ្ងៃទី 23 មិថុនា បានប្រកាសថា ប្រទេសនេះមានភារកិច្ចក្នុងការស៊ើបអង្កេតទៅលើកត្តាសុវត្ថិភាពនៅក្នុងករណីគ្រោះថ្នាក់នាវាមុជទឹក Titan ព្រោះកប៉ាល់មេដែលជួយគាំទ្រដល់ដំណើរផ្សេងព្រេងដែលមានវាសនាអាក្រក់នេះ គឺកប៉ាល់ Polar Prince ដែលដោតទង់ជាតិកាណាដា។

កប៉ាល់ Polar Prince ធ្លាប់ស្ថិតក្នុងជួរកងកម្លាំងល្បាតឆ្នេរកាណាដា មុនពេលត្រូវប្រគល់ឱ្យតំបន់ស្វយ័ត Miawpukek នៅភាគខាងត្បូងរបស់កោះ New Foundland។ កប៉ាល់នេះមានភារកិច្ចជាអ្នកទម្លាក់ និងទាញនាវាមុជទឹក Titan ក៏ដូចជាធ្វើការទាក់ទងគ្នាក្នុងដំណើរផ្សងព្រេងនេះ។

ក្រុមមន្ត្រីស៊ើបអង្កេតត្រូវបានបញ្ជូនទៅកាន់ St. John នៅ New Foundland ដែលជាកំពង់ផែរបស់កប៉ាល់ Polar Prince និងនាវា Titan។ ប៉ុន្តែ អាជ្ញាធរកាណាដាបញ្ជាក់ថា អង្គភាពនេះអាចត្រូវចំណាយពេលច្រើនឆ្នាំក្នុងការស៊ើបអង្កេត ហើយពុំមានសិទ្ធិក្នុងការអារកាត់លើការទទួលខុសត្រូវរបស់អ្នកដែលជាប់ពាក់ព័ន្ធ។

មុននោះ កងកម្លាំងល្បាតឆ្នេរអាម៉េរិក ក៏បានប្រកាសថា នឹងដឹកនាំការស៊ើបអង្កេតពេញលេញអំពីករណីគ្រោះថ្នាក់នាវា Titan នេះផងដែរ។ គណៈកម្មការសុវត្ថិភាពចរាចរណ៍ជាតិអាម៉េរិក (NTSB) ឱ្យដឹងថា ករណីគ្រោះថ្នាក់លើមហាសមុទ្រអាត្លង់ទិក ស្ថិតក្នុង «ព្រឹត្តិការណ៍បង្កការស្លាប់ធំនៅលើសមុទ្រ» ដូច្នេះ ការទទួលខុសត្រូវក្នុងការស៊ើបអង្កេតគឺជាសមត្ថកិច្ចរបស់កងកម្លាំងល្បាតឆ្នេរអាម៉េរិក ហើយ NTSB នឹងបញ្ជូនមនុស្សទៅជួយគាំទ្រ។

នាវាមុជទឹក Titan បានដាច់ទំនាក់ទំនងតាំងពីថ្ងៃទី 18 មិថុនា 2023 ក្រោយពីចុះសមុទ្របានជិតពីរម៉ោង នៅក្នុងដំណើរផ្សងព្រេងទៅទស្សនាសាកសពកប៉ាល់ Titanic។ កងកម្លាំងល្បាតឆ្នេរអាម៉េរិក កាលពីថ្ងៃទី 22 មិថុនា បញ្ជាក់ថា នាវា Titan ត្រូវរងសម្ពាធទឹករហូតដល់បែកខ្ទេចនៅក្រោមទឹកសមុទ្រ បណ្ដាលឱ្យមនុស្សទាំង 5 នាក់បាត់បង់ជីវិត ប៉ុន្តែ មិនទាន់ដឹងច្បាស់អំពីឫសគល់នៃមូលហេតុនេះនៅឡើយ៕

June 24, 2023

ក្រុមហ៊ុនគ្រប់គ្រងនាវាមុជទឹក Titan ប្រឈមនឹងបញ្ហាផ្លូវច្បាប់ក្រោយករណីស្លាប់មនុស្សប្រាំនាក់

OceanGate ដែលក្រុមហ៊ុនគ្រប់គ្រងនាវាមុជទឹក Titan អាចត្រូវប្រឈមមុខនឹងរឿងក្ដីប្ដឹងផ្ដល់ពីគ្រួសារជនរងគ្រោះ បើទោះជាក្រុមអ្នកទេសចណ៍នេះបានចុះហត្ថលេខាលើកលែងក៏ដោយ។

កាលពីថ្ងៃទី 22 មិថុនា សមត្ថកិច្ចសហរដ្ឋអាម៉េរិក និងក្រុមហ៊ុន OceanGate បានបញ្ជាក់ថា មនុស្សប្រាំនាក់ដែលស្ថិតក្នុងនាវាមុជទឹក Titan បានទទួលមរណភាពទាំងអស់ ក្រោយពីក្រុមសង្គ្រោះបានរកឃើញបំណែកនានារបស់ Titan។

អ្នកដែលបានស្លាប់ក្នុងហេតុការណ៍ខាងលើ រួមមាន Stockton Rush អាយុ 61 ឆ្នាំ ជាស្ថាបនិក និងជានាយកប្រតិបត្តិរបស់ OceanGate, មហាសេដ្ឋីអង់គ្លេស Hamish Harding អាយុ 58 ឆ្នាំ, Shahzada Dawood អាយុ 48 ឆ្នាំ ជាអ្នកជំនួញដើមកំណើតប៉ាគីស្ថាន និងកូនប្រុស Suleman អាយុ 19 ឆ្នាំ ដែលសុទ្ធតែជាពលរដ្ឋអង់គ្លេស រួមនឹងពលរដ្ឋបារាំងមួយរូបទៀត គឺអ្នកវិទ្យាសាស្ត្រខាងសមុទ្រ Paul-Henri Nargeolet អាយុ 77 ឆ្នាំ។

បច្ចុប្បន្ន មិនទាន់ដឹងច្បាស់ថា សាកសពជនរងគ្រោះខាងលើនឹងអាចត្រូវបានស្រង់មកលើគោកបានដែរ ឬយ៉ាងណានៅឡើយ។ ប៉ុន្តែ ក្រុមសមត្ថកិច្ចនៅតែបន្តស្វែងរកវត្ថុតាងនានាដើម្បីបញ្ជាក់បន្ថែមឱ្យកាន់តែច្បាស់។

មុនពេលឡើងកប៉ាល់ និងចូលនាវា Titan ដើម្បីចុះទៅទស្សនាសាកសពកប៉ាល់ Titanic ដែលនៅបាតសមុទ្រជម្រៅជិត 4,000 ម៉ែត្រ អតិថិជនទាំងអស់សុទ្ធតែត្រូវតម្រូវឱ្យចុះហត្ថលេខាលើកលែងការទទួលខុសត្រូវលើអាយុជីវិតសម្រាប់ OceanGate។ ក៏ប៉ុន្តែ ចំពោះគ្រួសារជនរងគ្រោះ គ្រប់យ៉ាងនឹងមិនបញ្ចប់ត្រឹមនេះឡើយ។ ក្រុមអ្នកវិភាគនិយាយថា សាច់ញាតិរបស់ជនរងគ្រោះនៅតែអាចប្ដឹងក្រុមហ៊ុននេះ សូម្បីតែនៅពេលជនរងគ្រោះបានចុះហត្ថលេខារួចរាល់ក៏ដោយ។

ទោះជាយ៉ាងណាក៏ដោយ មុនពេលរកឃើញមូលហេតុពិតប្រាកដនៃហេតុការណ៍គ្រោះថ្នាក់នេះ គេនៅតែមិនទាន់កំណត់បានថា ករណីនេះត្រូវផាត់ចោលកិច្ចសន្យា ឬអត់។ នេះបើតាម Joseph Low មេធាវីមួយរូបនៅរដ្ឋ California សហរដ្ឋអាម៉េរិក។

មកដល់បច្ចុប្បន្ន មិនទាន់មានប្រភពណាមួយនិយាយច្បាស់អំពីរឿងថា តើគ្រួសារជនរងគ្រោះមានបំណងប្ដឹងក្រុមហ៊ុន OceanGate ឬអត់នៅឡើយ៕

June 23, 2023

Tag: កប៉ាល់