កីឡាករខ្សែប្រយុទ្ធ Christiano Ronaldo ត្រូវបានគេដឹងថា បានឡើងជើងខ្លាំង កាលពីអំឡុងឆ្នាំ2005 ពោលគឺ ក្រោយពេលដែលគេបានផ្លាស់ទៅនៅ Manchester United កាលពីឆ្នាំ2003។ ដោយសារតែឱកាសដ៏ល្អមួយ បានធ្វើឱ្យគេល្បីល្បាញនៅ ManU រហូតដល់ឡើងជើងខ្លាំងនៅ Real Madrid និងក្លាយជាកីឡាករលំដាប់ពិភពលោកដល់សព្វថ្ងៃនេះ។
កាលគ្រានោះ ក្នុងឆ្នាំ2003 ភ្នាក់ងារកីឡាកររបស់ Ronaldo បានដាក់សំណើសុំទៅលេងនៅ Barcelona តែត្រូវក្លិបមួយនេះបដិសេធ ដែលវាបានធ្វើឱ្យកីឡាកររូបនេះ ប្តូរចិត្តទៅលេងនៅ ManU វិញ។
អតីតប្រធានក្លិប Barcelona លោក Laporta បានបញ្ជាក់ថា៖ “ទោះជាកាលនោះ ភ្នាក់ងារកីឡាករមួយនោះ មកប្រាប់យើងថា គេលក់ឱ្យទៅ ManU ក្នុងតម្លៃ 23លានដុល្លារ តែលក់ឱ្យយើងតែក្នុងតម្លៃ 20លានទេ ក៏យើងនៅតែមិនព្រមដែរ ដោយសារតែពេលនោះ យើងបានទិញយក Ronaldinho រួចទៅហើយ”៕
