David Beckham កំពុង​ត្រៀម​បង្កើត​ក្រុម​កីឡាករ​ជើង​ខ្លាំង​មកពី​ក្លឹប PSG និង Barca

David Beckham (ស្ដាំ​បង្អស់)

ក្លឹប​បាល់ទាត់​អាម៉េរិក Inter Miami របស់ David Beckham អូសទាញ Lionel Messi បានសម្រេច ប៉ុន្តែ​ក្លឹប​លេង​នៅ MLS នេះ នឹងមិន​ឈប់​ត្រឹម​នេះឡើយ គ្រា​ដែល​ពួកគេ​កំពុង​ទាក់ទាញ​កំពូល​កីឡាករ​បី​រូប​ផ្សេងទៀត​ដែល​សុទ្ធតែជា​អតីត «អ្នកលេង» របស់​ក្លឹប Barcelona។

រាប់​ចាប់តាំងពី​បាន​ទិញ Inter Miami កាលពី​ឆ្នាំ 2018 អតីត​កំពូល​តារាបាល់ទាត់​អង់គ្លេស David Beckham បាន​ចិញ្ចឹមចិត្ត​នាំយក​កំពូល​កីឡាករ​ពិតប្រាកដ​មក​ចូលរួម​ជាមួយ​ក្លឹប​នេះ និង​ប្រកួត​នៅ​ពានរង្វាន់​អាម៉េរិក MLS។

ថ្មីៗនេះ Beckham បានទទួល​ជោគជ័យ​ក្នុងការ​បញ្ចុះបញ្ចូល Lionel Messi។ ប្រការនេះ​ប្រាកដជា​ធ្វើឱ្យ Inter Miami កាន់តែ​ល្បីឈ្មោះ និង​អាច​បន្ត​ទាក់ទាញ​តារាបាល់ទាត់​ដទៃ​ទៀត​។ ក្រោយពី​សម្រេច​បាន​​កិច្ចព្រមព្រៀង​ជាមួយ M10 ក្លឹប Miami ក៏​កំពុង​សំដៅ​ទៅរក​ក្រុម​កីឡាករ​ដទៃ​ដើម្បី​ដើរ​ជាមួយ Messi ក្នុងនោះ​មាន​ជាអាទិ៍ Busquets, Suarez និង Alba ជាដើម។ ចំណែក Messi ក៏បាន​ស្នើឱ្យ​ក្លឹប​ថ្មី​របស់ខ្លួន​ទិញយក Angel Di Maria ដែលជា​មិត្ត​ជិតស្និទ្ធ​បំផុត​មួយរូប​របស់ M10 ហើយ Beckham ក៏​កំពុង​ពិចារណា​លើ​រឿង​នេះ។

ក្រុមកីឡាករជើងខ្លាំងដែល Inter Miami ប៉ងប្រាថ្នា

នៅពេល​មាន​កីឡាករ​ទាំងឡាយ​ខាងលើ ក្លឹប Inter Miami នឹងមាន​ក្រុម​ជើង​ខ្លាំង​ដ៏​គួរឱ្យ​ញញើត។ បច្ចុប្បន្ន ថ្វីបើ​ក្លឹប​នេះ​ឈរ​បាត​តារាង​នៅ MLS ប៉ុន្តែ ពួកគេ​នៅសល់​ពាក់កណ្ដាល​រដូវ​កាល​ទៀត ហើយ​ឱកាស​ហក់​ឡើង​នៅមាន​ច្រើន ពិសេស​គឺ​នៅពេល​មាន Messi៕

Advertisement