ម្ចាស់ជើងឯក Ligue 1 ក្លឹប Paris Saint-German បានបាត់បង់អ្នកតាមដានជាងមួយលាននាក់នៅលើបណ្ដាញសង្គម Instagram រាប់ចាប់តាំងពីបានប្រកាសថា Lionel Messi ចាកចេញពីក្លឹបនេះ។
ថ្មីៗនេះ ក្លឹប PSG បានប្រកាសជាផ្លូវការថា កិច្ចព្រមព្រៀងរវាងក្លឹបនេះ និង Lionel Messi មិនអាចពន្យារសុពលភាព ហើយភាគីទាំងពីរផ្ដាច់ទំនាក់ទំនងនឹងគ្នាបន្ទាប់ពីរដូវកាលនេះបានបញ្ចប់។ មិនយូរប៉ុន្មានក្រោយពីព័ត៌មាននេះត្រូវបានបញ្ជាក់ ចំនួនអ្នកតាមដាននៅលើទំព័របណ្ដាញសង្គមរបស់ PSG ក៏បានថយចុះអស់ជាងមួយលាននាក់។
ឆ្នាំ 2021 រឿង Lionel Messi ចុះកិច្ចព្រមព្រៀងពីរឆ្នាំជាមួយ PSG គឺជាព្រឹត្តិការណ៍លេចធ្លោជាងគេមួយក្នុងវិស័យបាល់ទាត់ពិភពលោក ហើយវានឹងត្រូវអស់សុពលភាពត្រឹមចុងខែមិថុនា 2023 ខណៈដែល Messi និង PSG មិនបន្តចុះហត្ថលេខាលើកិច្ចព្រមព្រៀងថ្មី។
![](https://i0.wp.com/lareine.com.kh/wp-content/uploads/2023/06/lareine.com.kh-2023-06-05_10-06-05_066175.jpg?resize=696%2C464&ssl=1)
Lionel Messi បានឆ្លងកាត់ពីររដូវកាលជាមួយនឹង PSG ក្នុងនោះ ពួកគេដណ្ដើមបានពានរង្វាន់ជើងឯក Ligue 1 ទាំងពីររដូវកាល ក៏ដូចជាដណ្ដើមបានតំណែងជើងឯក Champions Trophy របស់បារាំងឆ្នាំ 2022។ Messi ចូលរួមទាត់ឱ្យ PSG បាន 74 ប្រកួត រកបាន 32 គ្រាប់ និងបង្កឱកាសបាន 35 គ្រាប់។
![](https://i0.wp.com/lareine.com.kh/wp-content/uploads/2023/06/lareine.com.kh-2023-06-05_10-06-02_095442.jpg?resize=696%2C464&ssl=1)
ថ្មីៗនេះ PSG បានប្រកាសពីការចាកចេញរបស់ Messi ដោយការបង្ហោះវីដេអូខ្លីនៅលើទំព័របណ្ដាញសង្គម។ ក៏ប៉ុន្តែ ដំណឹងនេះធ្វើឱ្យអ្នកគាំទ្រមិនសប្បាយចិត្ត ព្រោះពួកគេយល់ថា Messi គួរតែទទួលបានការប្រព្រឹត្តល្អក្នុងវេលាចុងក្រោយនៅ PSG។ និន្នាការបោះបង់ការតាមដាន (Unfollow) ចំពោះទំព័រ PSG លើ Instagram កំពុងតែរីករាយដាលខ្លាំង ថ្វីបើមិនទាន់ដឹងថា អ្នកបោះបង់ការតាមដាននេះមានប៉ុន្មាននាក់ជាអ្នកគាំទ្ររបស់ PSG និងប៉ុន្មាននាក់ជាអ្នកគាំទ្ររបស់ Messi។
![](https://i0.wp.com/lareine.com.kh/wp-content/uploads/2023/06/lareine.com.kh-2023-06-05_10-15-35_764913.jpg?resize=696%2C463&ssl=1)
PSG ក៏ត្រូវបានវាយតម្លៃថា នឹងខាតបង់មិនតិចឡើយនៅពេល Messi ចាកចេញ ក្នុងនោះមានទាំងប្រាក់ចំណូលបានពីការលក់អាវ និងម្ចាស់ឧបត្ថម្ភផងដែរ៕