ក្រោយពីបញ្ចប់កម្មវិធីប្រគល់ពានរង្វាន់អចលនទ្រព្យកម្ពុជា ប្រចាំឆ្នាំ2019 កាលពីថ្ងៃសុក្រ ទី03 ខែឧសភា ឆ្នាំ 2019 នៅសណ្ឋាគារ សូហ្វីតែល ភ្នំពេញ ភូគីត្រា ប្រកបដោយភាពជោគជ័យជាទីមោទនៈមក នៅថ្ងៃទី29 ខែឧសភា កន្លងទៅនេះ PropertyGuru Group បានរៀបចំកម្មវិធីជួបជុំជាមួយអ្នកសារព័ត៌មាន ដើម្បីជួប និងធ្វើកិច្ចសម្ភារជាផ្លូវការជាមួយនឹងបុគ្គលសំខាន់ៗ ដែលមានវត្តមាននៅក្នុងកម្មវិធីប្រគល់ពានរង្វាន់អចលនទ្រព្យកម្ពុជា ប្រចាំឆ្នាំ2019 ដែលមានដូចជា លោក សន សៀប អគ្គនាយក និងជាស្ថាបនិកក្រុមហ៊ុន Key Real Estate Co. Ltd. ដែលជាគណៈកម្មាធិការវាយតម្លៃនៅក្នុងកម្មវិធី លោកឧកញ៉ា Nito H. Lim អ្នកឈ្នះពានរង្វាន់បុគ្គលឆ្នើមក្នុងវិស័យអចលនទ្រព្យកម្ពុជា ប្រចាំឆ្នាំ2019 ដែលជាសហស្ថាបនិកនិងជានាយកគ្រប់គ្រង នៃក្រុមហ៊ុន NI Development Co. Ltd. និងឯកឧត្តម ឆាន់ សូរ្យផល អគ្គនាយក នៃអគ្គនាយកដ្ឋានសំណង់ ក្រសួងរៀបចំដែនដី នគររូបនីយកម្ម និងសំណង់។
ក្នុងនោះ លោក សន សៀប បានមានប្រសាសន៍ថា ៖ “នេះជាលើកទី4ហើយ ដែលកម្មវិធីពានរង្វាន់អចលនាទ្រព្យកម្ពុជា បានរៀបចំធ្វើការផ្តល់ជូនពានរង្វាន់ដល់អ្នកអភិវឌ្ឍឆ្នើមនៅក្នុងប្រទេសកម្ពុជា ហើយកម្មវិធីនេះគឺជាយន្តការមួយក្នុងការជំរុញដល់ការអភិវឌ្ឍវិស័យអចលនទ្រព្យនៅកម្ពុជា ពីព្រោះកម្មវិធីនេះជាវេទិកាប្រកួតប្រជែងរបស់អ្នកអភិវឌ្ឍគម្រោង។ ការប្រកួតប្រជែង គឺតែងតែធ្វើឱ្យមានការពង្រឹងគុណភាពនៃគម្រោងរបស់ខ្លួន ដូច្នេះទាមទារឱ្យអ្នកអភិវឌ្ឍទាំងអស់ត្រូវតែពង្រឹងគុណភាពរបស់ខ្លួន ដើម្បីអាចចូលរួមប្រកួតប្រជែងបាន ហើយវាក៏បានជួយផ្សព្វផ្សាយដល់សាធារណជនពីគម្រោងរបស់ពួកគេ ចំណែកអ្នកអភិវឌ្ឍគម្រោងផ្សេងៗក៏ត្រូវតែពង្រឹងគុណភាពគម្រោងរបស់ខ្លួនដែរ ហើយអ្នកដែលចំណេញបំផុតនោះគឺអតិថិជនដែលត្រូវការទិញគម្រោងអចលនទ្រព្យ”។
លោកឧកញ៉ា Nito H. Lim ក៏បានលើកឡើងថា ៖ “ក្រោយពីបានចូលរួមនៅក្នុងកម្មវិធីពានរង្វាន់អចលនទ្រព្យកម្ពុជា និងទទួលបានពានរង្វាន់មក បានធ្វើឱ្យខ្ញុំកាន់តែមានភាពជឿជាក់លើសមត្ថភាពរបស់ខ្លួន ហើយសាធារណជនក៏បានស្គាល់យើងច្រើន ជាក់ស្តែងគឺត្រឹមតែរយៈពេល1ខែបន្ទាប់ពីក្រុមហ៊ុនខ្ញុំបានទទួលពានរង្វាន់បុគ្គលឆ្នើមក្នុងវិស័យអចលនទ្រព្យកម្ពុជា ប្រចាំឆ្នាំ2019 និងពានរង្វាន់ជាច្រើនទៀតលើការតុបតែងអគារ គឺក្រុមហ៊ុនខ្ញុំបានទទួលគម្រោងរហូតដល់20គម្រោង ទាំងនៅក្នុងស្រុក និងក្រៅស្រុក។ ដូច្នេះខ្ញុំអាចនិយាយបានថា កម្មវិធីពានរង្វាន់អចលនទ្រព្យកម្ពុជានេះគឺពិតជាបានជួយច្រើនដល់វិស័យអចលនទ្រព្យនៅកម្ពុជាពិតមែន គឺ100%។ ហើយនៅឆ្នាំក្រោយ យើងក៏មានគម្រោងថ្មីៗជាច្រើនទៀត ដើម្បីចូលរួមនៅក្នុងកម្មវិធីនេះជាបន្តទៀតផងដែរ”។
ឯកឧត្តមបណ្ឌិត ឆាន់ សូរ្យផល ក៏បានមានប្រសាសន៍ថា ៖ “ ការប្រកួតប្រជែង គឺនាំឆ្ពុះទៅរកឧត្តមភាព ដូច្នេះបើមានការប្រកួតប្រជែង ក៏ជួយឱ្យមានការអភិវឌ្ឍច្រើននៅក្នុងវិស័យអចលនទ្រព្យរបស់ប្រទេសកម្ពុជាយើងដែរ។ នៅក្នុងកម្មវិធីពានរង្វាន់អចលនទ្រព្យកម្ពុជានេះ ខាងក្រសួងក៏បានទទួលនូវពានរង្វាន់ សម្រាប់កម្មវិធីទូរស័ព្ទថ្មី ដែលមានឈ្មោះថា “Cambodia Construction” ផងដែរ ដែល App ថ្មីនេះបានជួយសម្រួលដល់វិស័យអចលនទ្រព្យនៅកម្ពុជា លើគ្រប់ផ្នែកទាំងអស់ ទាំងអ្នកអភិវឌ្ឍគម្រោង អ្នកផ្គត់ផ្គង់សម្ភារដល់គម្រោង សាធារណជន ដែលចង់ទិញគម្រោង ព្រមទាំងវិស័យធនាគារ ដើម្បីបានដឹងពីព័ត៌មាន ដែលខ្លួនចង់ដឹង និងអាចផ្តល់ព័ត៌មានដល់អតិថិជនរបស់ខ្លួនផងដែរ”៕
