លោក Thierry Seychelles ដែលគ្រងតំណែងជាចុងភៅចំណាន នៅកម្មវិធី Michelin Chef បានបង្ហាញជូននូវទេពកោសល្យចម្អិនម្ហូបបារាំងដ៏ពិសេស នៅសណ្ឋាគារសូហ្វីតែល ភ្នំពេញភូគីត្រា និងសណ្ឋាគារសូហ្វីតែល អង្គរភូគីត្រា ខេត្តសៀមរាប ដែលចូលរួមសហការដោយ ក្រុមហ៊ុនអាកាសចរណ៍ ថៃអ៊ែរវេ កាលពីថ្ងៃទី ១៣ ខែវិចិ្ឆកា ឆ្នាំ២០១៨ នេះ។
លោក Thierry Seychelles បានបញ្ចប់បរិញ្ញាប័ត្រនៅមហាវិទ្យាល័យ Pontivy ដែលជាសាលាដ៏ល្បីផ្នែកសណ្ឋាគារ និង បដិសណ្ឋារកិច្ច។ ដោយមានភាពប៉ិនប្រសព្វ និង ទេពកោសល្យខ្ពស់ ក្នុងការចម្អិនម្ហូប លោក Chef Thierry បានបញ្ចប់ជំនាញរបស់គាត់ជាមេចុងភៅ Michelin Chef ក៏ដូចជា Pierre Gagniare, Alain Passard និង Patrice Caillault ផងដែរ។ ក្រោយមកលោក Thierry Seychelles បានបើកភោជនីយដ្ឋានផ្ទាល់ខ្លួនដែលមានឈ្មោះថា “Le Roscanvec” គឺជាភោជនីយដ្ឋានដ៏មានប្រជាប្រិយភាពបំផុតដែលបម្រើអាហារបារាំងឆ្ងាញ់ៗជាច្រើនមុខ។
ថ្លែងក្នុងកម្មវិធីនេះ លោក Charles-Henri Chevet នាយកចាត់ការទូទៅរបស់ សណ្ឋាគារសូហ្វីតែល បានឲ្យដឹងថា នេះគឺជា ដំណើរទស្សនកិច្ចលើកដំបូងរបស់លោក Thierry Seychelles មកកាន់ព្រះរាជាណាចក្រកម្ពុជាដែលឆ្លុះបញ្ចាំងពីទិដ្ឋភាពដ៏រីកចម្រើននៃការរស់នៅរបស់ប្រជាជន
កម្ពុជា នូវបែបផែនជីវិតថ្មី នាសម័យទំនើប។
លោក Charles-Henri Chevet បានលើកឡើងថា «ប្រទេសកម្ពុជាកំពុងតែប្រែក្លាយទៅជាទីកន្លែងល្អមួយសម្រាប់អ្នកដែលនិយមចូលចិត្ត អាហារឆ្ងាញ់និងស្រាប្រណិតៗ ដូចនេះអាហារបែបបារាំង ចម្អិនឡើងយ៉ាងពិសេសដោយមេចុងភៅលោក Thierry Seychelles នឹងបានទទួលការគាំទ្រខ្លាំងពីសំណាក់ភ្ញៀវ ទាំងនៅទីក្រុងភ្នំពេញនិង ខេត្តសៀមរាប ដោយការចំអិនត្រូវបានប្រើប្រាស់គ្រឿងផ្សំដែលមានក្នុងស្រុក»។
គួរបញ្ជាក់ផងដែរថា អាហារពេលល្ងាចដ៏ឆ្ងាញ់ពិសានេះនឹងបម្រើជូននៅសណ្ឋាគារសូហ្វីតែល ភ្នំពេញភូគីត្រា នៅថ្ងៃ ទី១៤ និង ទី១៥ ខែវិច្ឆិកា និងនៅសណ្ឋាគារសូហ្វីតែល អង្គរភូគីត្រា ខេត្តសៀមរាប នៅថ្ងៃទី១៧ ខែវិច្ឆិកានេះ។ លើសពីនេះទៅទៀត លោក Thierry Seychelles នឹងមានបើកថ្នាក់បង្រៀនធ្វើម្ហូបបែបបារាំងនៅថ្ងៃទី១៥ ខែវិច្ឆិកា វេលាម៉ោង ១០ ព្រឹក នៅសណ្ឋាគារសូហ្វីតែលភ្នំពេញភូគីត្រាផងដែរ៕
