នេះគឺជាលើកទី 18 ហើយ ដែលក្រុមហ៊ុន អ អិម អេ ខេមបូឌា (RMA Cambodia) ដែលជាក្រុមហ៊ុននាំចូលផ្តាច់មុខរថយន្ត FORD មកកាន់ទីផ្សារប្រទេសកម្ពុជាបានរៀបចំដំណើរកម្សាន្តបោះជំរំរបស់មហាគ្រួសារអតិថិជនរថយន្ត FORD ហើយអ្វីដែលកាន់តែអស្ចារ្យនោះគឺ ដំណើរកម្សាន្តបែបផ្សងព្រេងដ៏សប្បាយរីករាយនេះគឺពីមួយឆ្នាំទៅមួយឆ្នាំកាន់តែធំជាងមុន ដោយនៅក្នុងឆ្នាំ 2024 នេះ ក្រុមហ៊ុនបានបំបែកកម្មវិធីដំណើរកម្សាន្តប្រចាំឆ្នាំនេះជា 2វគ្គ ដែលមានរយៈពេល3 យប់ 4ថ្ងៃ ដោយវគ្គទីមួយចេញដំណើរនៅថ្ងៃទី 12 ដល់ថ្ងៃទី 15 ខែធ្នូ និងវគ្គទី 2 ចេញដំណើរពីថ្ងៃទី 19 ដល់ថ្ងៃទី 22 ខែធ្នូ ដោយសរុបទាំង 2ជើងនេះ មានក្បួនរថយន្ត FORD ចូលរួមសរុបជាង 200គ្រឿង លាយចម្រុះគ្រប់ម៉ូដែលនៃរថយន្ត FORD ដែលមានដូចជា ប្រភេទរថយន្ត Ford Ranger Wildtrak, Ford Ranger XLT, Ford Ranger Raptor ដែលជាប្រភេទរថយន្ត Pick-up និងរថយន្តប្រភេទ SUV មានដូចជាម៉ូដែល Ford Everest, Ford Territory និងរថយន្ត Ford Ecosport ជាដើម ដែលសរុបអ្នកចូលរួមទាំងអស់ប្រមាណជាជាង1,000នាក់ ដោយធ្វើដំណើរជាក្បួនដ៏ឱឡារិកចេញដំណើរពីរាជធានីភ្នំពេញនាពេលព្រឹកព្រលឹមថ្ងៃព្រហស្បតិ៍ ឆ្ពោះទៅខេត្តស្ទឹងត្រែង ដោយបោះជំរំស្នាក់នៅក្នុងខេត្តស្ទឹងត្រែង1យប់ រួចក្បួនរថយន្ត FORD ក៏បានបន្តដំណើរឆ្ពោះទៅកាន់ទីក្រុងប៉ាកសេ ស្ថិតក្នុងទឹកដីនៃប្រទេសឡាវ ដោយបោះជំរំស្នាក់នៅទីនោះរយៈពេល2យប់។
គួរបញ្ជាក់ផងដែរថា ដំណើរកម្សាន្តដ៏សែនរីករាយនេះបានរៀបចំឡើងដោយក្រុមហ៊ុន អ អិម អេ ខេមបូឌា (RMA Cambodia) ដោយសហការជាមួយធនាគារ BSP Finance PLC., ធនាគារ KB Daehan (KB Daehan Specialized Bank Plc.,) ដែលជាធនាគារផ្តល់នូវសេវាហិរញ្ញវត្ថុដ៏ល្អនៅក្នុងប្រទេសកម្ពុជា, ក្រុមហ៊ុន Hanuman Beverage Co., Ltd. និងមានការចូលរួមសហការឧបត្ថម្ភពីក្រុមហ៊ុន EFG (Express Food Group) ដែលមានដូចជា ហាង The Pizza Company, ភោជនីយដ្ឋានស៊ុប និងសាច់អាំង Bar-B-Q Plaza, ហាងការ៉េម Dairy Queen, ហាងការ៉េម Swensens, ហាងនំ Krispy Kream Donut, ទឹកផ្លែឈើ Boost, តែគុជ Kamu.Kamu, ហាងនំបុ័ង Tour Les Jours, ក្រុមហ៊ុនធានារ៉ាប់រង CB General Insurance និង ធនាគារ AEON Specialized Bank (Cambodia) PLC.។
បើយោងតាមប្រសាសន៍របស់លោក សេង វឹង នាយកគ្រប់គ្រងទូទៅនៃរថយន្ត FORD របស់ក្រុមហ៊ុន អ អិម អេ ខេមបូឌា (RMA Cambodia) បានឱ្យដឹងថា ជារៀងរាល់ឆ្នាំក្រុមហ៊ុនតែងតែរៀបចំដំណើរកម្សាន្តជាលក្ខណៈគ្រួសារធំនេះឡើងក្នុងគោលបំណងធំគឺ ជាការថ្លែងអំណរគុណទៅដល់អតិថិជនរថយន្ត FORD ទាំងអស់ ដែលតែងតែគាំទ្រដល់ក្រុមហ៊ុន ហើយក្រុមហ៊ុនក៏ចង់ឱ្យអ្នកចូលរួមទាំងអស់ដែលជាសមាជិកគ្រួសាររថយន្ត FORD បានជួបជុំគ្នាជាលក្ខណៈគ្រួសារធំ បានស្គាល់គ្នា និងអាចផ្លាស់ប្តូរធួរកិច្ចគ្នាទៅវិញទៅមក ព្រមទាំងទទួលបាននូវបទពិសោធន៍ក្នុងការធ្វើដំណើរជាក្បួនរថយន្តជាច្រើនរហូតដល់ជាង200គ្រឿង និងបទពិសោធន៍ថ្មីក្នុងការបោះជំរំគេងជុំគ្នាបែបលក្ខណៈផ្សងព្រេងផងដែរ។
ដំណើរកម្សាន្តមហាគ្រួសារ FORD ឬ FORD Adventure ឆ្នាំ2024នេះ ពិតជាធំ និងមានអ្នកចូលរួមច្រើនខ្លាំងណាស់ ដោយគ្រប់អតិថិជនរបស់រថយន្ត FORD ទាំងអស់សុទ្ធតែមានសិទ្ធិក្នុងការចូលរួមនៅក្នុងកម្មវិធីដំណើរកម្សាន្តដ៏រីករាយនេះ ដោយគ្រាន់តែលោកអ្នកធ្វើការចុះឈ្មោះចូលរួមឱ្យបានទាន់ពេលវេលា នោះលោកអ្នក និងក្រុមគ្រួសារនឹងទទួលបាននូវបទពិសោធន៍ថ្មីជាមួយការបើកបររយន្ត FORD ឆ្លងប្រទេសយ៉ាងមានទំនុកចិត្ត និងមានសុវត្ថិភាពជាមួយក្រុមហ៊ុន អ អិម អេ ខេមបូឌា (RMA Cambodia)។ ចំពោះកម្មវិធីកម្សាន្តសប្បាយៗ ដែលមាននៅក្នុងដំណើរកម្សាន្ត FORD Adventure ក្នុងឆ្នាំ2024នេះ មានដូចជា ការបោះជំរំគេងជុំគ្នា ការជិះរថយន្ត FORD ជាក្បួនដ៏អស្ចារ្យឆ្លងខេត្ត ឆ្លងប្រទេស ទៅទស្សនានៅតាមរមណីដ្ឋានទឹកធ្លាក់ ខនផាក់ផេង (Khone Phapheng Waterfall), ទឹកធ្លាក់ Tad Gneuang និងប្រាសាទវត្តភូនៅលើទឹកដីប្រទេសឡាវ ហើយតាមរយៈការធ្វើដំណើរបែបផ្សងព្រេងនេះ អតិថិជន FORD ទាំងអស់ក៏ទទួលបាននូវបទពិសោធថ្មីក្នុងការបើកបរលើប្រភេទផ្លូវដែលមានភាពបត់បែនច្រើន ផ្លូវគ្រួស និងការបើកបររថយន្តជាក្បួនដែលមានរហូតដល់ជាង130រថយន្តក្នុងមួយជើងៗ ដោយមានរថយន្តសារ៉ែននាំផ្លូវ និងហែហមយ៉ាងអធិកអធមផងដែរ។ អ្វីដែលកាន់តែពិសេស និងជាការចងចាំមិនអាចបំភ្លេចបានរបស់សមាជិកគ្រួសារ FORD នោះគឺ កម្មវិធីកម្សាន្តជួបជុំគ្នានាពេលរាត្រី ដោយមានការច្រៀងរាំលេងកម្សាន្តជួបជុំគ្នាយ៉ាងសប្បាយរីករាយ ពេញដោយភាពស្និតស្នាល និងពោរពេញដោយការចងចាំល្អៗមិនអាចបំភ្លេចបាន។
គួររំឭកផងដែរថា គ្រប់កម្មវិធីដំណើរកម្សាន្តមហាគ្រួសារ FORD ជារៀងរាល់លើកគឺក្រុមហ៊ុនមិនដែលរំលងនោះទេ ក្រុមហ៊ុនតែងតែផ្សារភ្ជាប់ជាមួយនឹងកម្មវិធីសប្បុរសធម៌ជានិច្ច ដើម្បីជាការចូលរួមជួយដល់ប្រទេសជាតិ និងជួយដល់ជនទុរគត ដែលកំពុងជួបការលំបាកនៅក្នុងជីវភាពរស់នៅរបស់ពួកគេ។ ការផ្សារភ្ជាប់ភាពរីករាយនៃដំណើរកម្សាន្ត ជាមួយនឹងការងារសប្បុរធម៌បែបនេះ គឺជាការបណ្តុះគំនិតដល់យុវជនខ្មែរជំនាន់ក្រោយឱ្យចេះជួយគ្នាទៅវិញទៅមក ឱ្យមានសេចក្តីសន្តោសប្រណីដល់ជនទីទាល់ក្រ និងឱ្យពួកគេចេះស្រឡាញ់រាប់អានគ្នាដោយមិនរើសអើងឋានៈទាបខ្ពស់ផងដែរ។
ព្រឹត្តិការណ៍ដំណើរកម្សាន្តមហាគ្រួសារ FORD ឬ FORD Adventure ឆ្នាំ2024នេះ គឺពិតជាអស្ចារ្យខ្លាំងណាស់ ហើយអ្នកចូលរួមទាំងអស់ក៏ពេញចិត្តចំពោះការរៀនចំ និងការស្វាគមន៍ដ៏កក់ក្តៅរបស់ក្រុមការងារនៃក្រុមហ៊ុន អ អិម អេ ខេមបូឌា (RMA Cambodia) ជាខ្លាំង ទាំងកន្លែងដើរលេងកម្សាន្ត ទាំងកន្លែងស្នាក់នៅ ទាំងអាហារហូបចុក ព្រមទាំងកម្មវិធីកម្សាន្តផ្សេងៗពេញរយៈពេល4ថ្ងៃ 3យប់នេះ គឺពិតជាសប្បាយរីករាយ និងទទួលបាននូវបទពិសោធន៍ថ្មីៗជាច្រើន នេះគឺជាកាដូដ៏មានអត្ថន័យបំផុតរបស់ក្រុមហ៊ុន អ អិម អេ ខេមបូឌា (RMA Cambodia) ជូនទៅដល់អតិថិជនដែលតែងតែគាំទ្ររថយន្ត FORD៕
