នៅរាត្រីថ្ងៃទី2 ខែតុលា ឆ្នាំ2017 ភោជនីយដ្ឋាន ខេមា ឡា ប៉ុស្ដិ៍ ( Khéma La Poste ) បានប្រារព្ធពិធីបើកសម្ភោធទីតាំងថ្មីដែលជាសាខាទី2 របស់ភោជនីយដ្ឋាន ខេមា ( Khema Restaurant ) ដែលស្ថិតនៅលើផ្លូវលេខ13 ឆៀងផ្លូវលេខ98 សង្កាត់វត្តភ្នំ ខណ្ឌដូនពេញ រាជធានីភ្នំពេញ ឬមានទីតាំងនៅខាងមុខប៉ុស្តិ៍ប្រៃសណីយ៍ និងទូរគមនាគមន៍ធំតែម្ដង។
អ្នកនាង នូវ សម្បូរ មានតួនាទីជាអ្នកគ្រប់គ្រងភោជនីយដ្ឋាន ខេមា ឡាប៉ុស្ដិ៍ នេះ បានប្រាប់អ្នកសារព័ត៌មាន ឡារ៉ែន កាលយប់មិញនេះថា « នេះជាសាខាទី 2 នៃភោជនីយដ្ឋាន ខេមា ដែលកន្លងមក យើងទទួលបានជោគជ័យក្នុងការបើក ខេមា សាខាទី 1 ដែលមានទីតាំងនៅផ្លូវប៉ាស្ទ័រ ក្នុងសណ្ឋាគារអរុណរៈរួចមកហើយ ហើយដោយសារសាខានេះមានទីតាំងនៅជិតប៉ុស្តិ៍ប្រៃសណីយ៍ធំ ទើបយើងដាក់ឈ្មោះថា ភោជនីយដ្ឋាន ខេមា ឡា ប៉ុស្ដិ៍ តែម្ដងទៅ»។
ដោយសម្លឹងមើលឃើញថា ទីតាំងនៅម្ដុំប៉ុស្តិ៍ប្រៃសណីយ៍នេះ មានបណ្ដាក្រុមហ៊ុនធំតូច រួមទាំងមានក្រសួង មន្ទីរ និងស្ថាប័ននានាជាច្រើននៅជិតនេះទៀតផងនោះ ទើបអ្នកនាងសម្រេចចិត្តជ្រើសយកទីតាំងមួយនេះ បើកនូវភោជនីយដ្ឋានខេមា ឡា ប៉ុស្ដិ៍ នេះឡើង ដើម្បីបម្រើសេវាកម្មអាហារមានគុណភាព និងសុខភាពជូនដល់ទាំងភ្ញៀវជាតិ និងអន្ដរជាតិទាំងឡាយ។
អ្នកនាង សម្បូរ បានបន្ដទៀតថា « ជាក់ស្ដែង ខេមា គឺជាប្រ៊េនដ៍ភោជនីយដ្ឋានមួយដែលមានស្ដង់ដា ហើយបម្រើជូនភ្ញៀវនូវអាហារដែលមានរសជាតិឆ្ងាញ់ និងមានសេវាកម្មល្អសម្រាប់អតិថិជន និងមានការនាំចូលនូវគ្រឿងផ្សំ និងគ្រឿងបន្ថែមរសជាតិអាហារខ្លះដូចជា ឈីស ខូហ្កាស មកពីប្រទេសបារាំងផ្ទាល់តែម្ដង ដែលកន្លងមកយើងទទួលបានការគាំទ្រ និងសរសើរមិនដាច់ពីមាត់អំពីរសជាតិអាហារនៅទីនេះ ពីសំណាក់អតិថិជនជាច្រើននាក់ ទាំងភ្ញៀវជាតិ និងអន្ដរជាតិ រួចមកហើយ»។
ចំពោះតម្លៃវិញ អ្នកគ្រប់គ្រងសម្ផស្សស្រស់ស្អាតរូបនេះ បានប្រាប់បន្ថែមជាពិសេសថា « ដោយមើលឃើញសោភ័ណភាពខាងក្រៅស្រស់ស្អាត កម្រិតស្ដង់ដារអន្ដរជាតិ ទើបបណ្ដាលឱ្យអតិថិជនមួយចំនួនគិតថា ភោជនីយដ្ឋាន ខេមា ឡាប៉ុស្ដិ៍ ជាកន្លែងលក់អាហារដែលមានតម្លៃថ្លៃ តែផ្ទុយទៅវិញ ប្រសិនបើពួកគាត់បានមកភ្លក្សរសជាតិនៅ ខេមា ឡា ប៉ុស្តិ៍ ហើយនោះ ពួកគាត់ប្រហែលជាលាន់មាត់ថា ឆ្ងាញ់ហើយមិនថ្លៃទៀតជាមិនខាន ព្រោះអាហារដូចជា សាច់អាំង (ស្តេក)មួយចាន គឺមានតម្លៃសមរម្យត្រឹមតែ 12 ដុល្លារតែប៉ុណ្ណោះ ដូច្នោះហើយ នាងខ្ញុំសូមបញ្ជាក់ប្រាប់ថា ភោជនីយដ្ឋាន ខេមា ឡាប៉ុស្ដិ៍ ជាភោជនីយដ្ឋានដែលមានតម្លៃសមរម្យដែលអតិថិជនអាចទទួលយកបាន និងមានជំនឿទុកចិត្តខ្លាំងបំផុត »។
ទន្ទឹមនឹងទទួលបានជោគជ័យពីសាខាទី 1 រហូតដល់មានសាខាទី 2 នេះហើយ ភោជនីយដ្ឋាន ខេមា គ្រោងនឹងបើកសាខាទី 3 បន្ដទៀតដែលមានឈ្មោះថា ភោជនីយដ្ឋាន ខេមា អង្គរ ( Khéma Angkor ) ដែលមានទីតាំងនៅក្នុងទីក្រុង សៀមរាប ខេត្តសៀមរាប នាដើមឆ្នាំ 2018 ខាងមុខនេះ៕
