ដោយសារតែអណ្ដាតភ្លើងឆាបរាលដាលយ៉ាងសន្ធោសន្ធៅ ផ្ទះរបស់ប្រជាពលរដ្ឋចំនួន ៣ ខ្នង ក៏ត្រូវបានអគ្គិភ័យលេបត្របាក់អស់គ្មានសល់ ប៉ុន្តែសំណាងល្អ ព្រោះមិនបានបណ្ដាលឱ្យមានមនុស្សរងរបួស នេះបើតាម ការិយាល័យបង្ការពន្លត់អគ្គិភ័យ និងសង្គ្រោះ នៃ ស្នងការនគរបាលរាជធានីភ្នំពេញ។
ហេតុការណ៍គ្រោះអគ្គិភ័យដែលបានកើតឡើងនៅវេលាម៉ោង ១០ និង ៣០ នាទី ព្រឹក ថ្ងៃទី ២១ ខែមិថុនា ឆ្នាំ២០២២ នេះ ស្ថិតនៅចំណុចផ្លូវបេតុង ភូមិស្វាយប៉ាក ក្រុម០៥ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
ផ្ទះរបស់ប្រជាពលរដ្ឋដែលត្រូវបានអគ្គិភ័យលេបត្របាក់នេះគឺជាផ្ទះប្រភេទឈើប្រក់ស័ង្កសី ចំនួន ៣ ខ្នង រួមមាន ផ្ទះទីមួយមានទំហំ ៨ គុណ ២៥ ម៉ែត្រ, ទីពីរគឺផ្ទះមានទំហំ ១០ គុណ ២០ ម៉ែត្រ និងផ្ទះទីបីមានទំហំ ១០ គុណ ១០ ម៉ែត្រ។ ផ្ទះ និងសម្ភារក្នុងផ្ទះទាំង ៣ ខ្នងនេះត្រូវបានភ្លើងឆាបឆេះអស់គ្មានសល់ នេះបើតាមរបាយការណ៍របស់លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ។
យោងតាមការបញ្ជាក់ពីសមត្ថកិច្ច មូលហេតុដែលនាំឱ្យកើតមានករណីអគ្គិភ័យនេះគឺដោយសារបញ្ហាឆ្លងចរន្តអគ្គីសនី។
ក្នុងការពន្លត់អគ្គិភ័យ សមត្ថកិច្ចបានប្រើប្រាស់រថយន្តពន្លត់អគ្គិភ័យសរុប ១៣ គ្រឿង រួមមានរថយន្តរបស់ ការិយាល័យបង្កាពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ចំនួន ១១ គ្រឿង, រថយន្តក្រសួងមហាផ្ទៃចំនួន ១ គ្រឿង, រថយន្តសាលាខណ្ឌឫស្សីកែវចំនួន ១ គ្រឿង ដែលក្នុងចំនោមនោះ សមត្ថកិច្ចបានបាញ់ទឹកអស់ ១២ គ្រឿង៕
