ភ្នំពេញ ៖ ក្រុមបាល់ទាត់ជម្រើសជាតិកម្ពុជា អាយុក្រោម១៧ឆ្នាំ ក្រោមការដឹកនាំរបស់លោក អស់ឱកាសឡើងទៅជុំផ្ដាច់ព្រ័ត្រហើយ បន្ទាប់ពីបរាជ័យក្រោមថ្វីជើង ហ្វីលីពីន យ៉ាងមិនគួរឲ្យជឿ ដោយលទ្ធផល ០-២ ក្នុងប្រកួតបញ្ចប់ក្នុងពូល B ពានរង្វាន់ AFC U17 Asian Cup ឆ្នាំ២០២៥។
ក្នុងប្រកួតបើកឆាក ក្រុមជម្រើសជាតិកម្ពុជា បានឈ្នះ លើក្រុមបង់ក្លាដេស ក្នុងលទ្ធផល ១-០ និងបន្តយកឈ្នះ ក្រុមជម្រើសជាតិម៉ាកាវ ក្នុងលទ្ធផល ១-០ មុនពេលចាញ់ ក្រុមអាហ្វហ្គានីស្ថាន ក្នុងលទ្ធផល ៣-១ និង ហ្វីលីពីន ២-០។
ក្រោយបញ្ចប់ការប្រកួតក្នុងពូល B អាហ្វហ្គានីស្ថាន ឈរកំពូលតារាងមាន ១២ពិន្ទុ, បង់ក្លាដេស ឈរលេខ២ ហ្វីលីពីន ឈរលេខ៣ និងកម្ពុជា ឈរលេខ៤ មាន ៦ពិន្ទុស្មើគ្នា ខណៈ ម៉ាកាវ ឈរបាតតារាង។ដូច្នេះ ក្នុងពូល B នេះ មានតែក្រុមអាហ្វហ្គានីស្ថាន មួយគត់ឡើងទៅវគ្គបន្ត ខណៈបង់ក្លាដេស ដែលជាក្រុមឈរលេខ២ ក៏អស់ឱកាសអ៊ុតក្រុមលេខ២ល្អដូចគ្នា។
គួរបញ្ជាក់ថា ក្នុងចំណោមក្រុមទាំង១៦ មានក្រុមចំនួន ៣មកពីតំបន់អាស៊ាន ដែលបានឡើងទៅជុំចុងក្រោយគឺ ថៃ ក្នុងនាមជាក្រុមលេខ១ពូល D, ឥណ្ឌូណេស៊ី បានឡើងទៅកាន់ជុំចុងក្រោយ ក្នុងនាមជាក្រុមលេខ២ល្អបំផុតក្នុងពូល និង វៀតណាម ក៏បានឡើងទៅវគ្គបន្តក្នុងនាមជាក្រុមលេខ២ល្អបំផុតក្នុងពូលដែរ៕
