មុខរបរ​ថ្មី!  បុរស​ចិន​ម្នាក់ ​កំពុង​​កាក់​កប​​នឹង​​អាជីព “តាមរក​ប្ដី” និង “រៀបចំ​សាច់រឿង ឱ្យ​លែងលះ​ពី​ស្រី​ស្នេហ៍” ដោយ​រកប្រាក់​បាន​យ៉ាង​សន្ធឹក!

អាជីព​ថ្មី​មួយ កំពុង​ត្រូវបាន​គេ​ចាប់អារម្មណ៍​យ៉ាងខ្លាំង៖  បុរស​ចិន​ម្នាក់ ស៊ីឈ្នួល​បង្កើត​ស្ថានការណ៍​ឱ្យលោកប្រុសៗ នឹង​ស្រី​ស្នេហ៍ លែងលះគ្នា ដើម្បី​បាន​វិលត្រឡប់​ទៅរក​ប្រពន្ធ​នៅឯ​ផ្ទះ​វិញ កំពុង​រកបាន​ចំណូល​ច្រើន ខ្ទង់ម៉ឺនៗដុល្លារ!

អាច​និយាយបានថា ជា​អាជីព​មួយទៀត ដែល​កំពុង​ត្រូវបាន​គេ​កត់សម្គាល់​យ៉ាងខ្លាំង  គឺ​អាជីព “ផ្ដល់​ការប្រឹក្សា​ខាង​អារម្មណ៍” ដែលមាន​តួនាទី​រិះគិត វិភាគ និង​រៀប​ផែនការ និង​ធ្វើ​យ៉ាងម៉េច​ក៏បាន ឱ្យតែលោកប្រុសៗ ដែល​ក្បត់ចិត្ត​ភរិយា មាន​សតិ​ស្មារតី​ឡើងវិញ និង​នឹកឃើញ ហើយ​វិលត្រឡប់​មករក​ភរិយា និងកូនៗរបស់ខ្លួន​វិញ។

សៀវ ស៊ឹង បុរស​វ័យ 31ឆ្នាំ មាន​អាជីព​ជា “អ្នកផ្ដល់​ការប្រឹក្សា​ខាង​អារម្មណ៍” ជាង 6ឆ្នាំ​មកហើយ បាន​រៀបរាប់​ប្រាប់​អំពី​ដើមកំណើត​នៃ​ការធ្វើការងារ​នេះ​ថា ពីមុន គាត់​គ្រាន់តែ​ជា​អ្នក​នាំ​ភ្ញៀវទេសចរ​ធម្មតា​ម្នាក់​ប៉ុណ្ណោះ តែ​លោក​តែងតែ​ផ្ដល់​ការប្រឹក្សា​ទៅ​ពួកម៉ាក​មិត្តភក្តិ ពាក់ព័ន្ធ​នឹង​រឿង​ស្នេហា និង​ជីវិត​ស្វាមី-ភរិយា រហូតដល់​ពួកគេ​មាន​សម្ព័ន្ធ​គ្រួសារ​ល្អ​ដូច​មុន​ឡើងវិញ​ជាច្រើន​គូ។ មិត្តភក្តិ​នាំគ្នា​ហៅ​រូបគេ​ថា “បរមគ្រូ​ខាង​អារម្មណ៍” និង​ទោះជា​គ្រាន់តែ​ឈ្មោះ​ហៅលេងៗក៏ដោយ តែ​វា​បានធ្វើឱ្យ​រូបគេ​មើលឃើញ​ពី​សមត្ថភាព​ដែល​ខ្លួនឯង​មាន ទើប​សុំ​ឈប់​ពី​អាជីព​អ្នក​នាំ​ភ្ញៀវ ងាក​មក​ប្រកប​អាជីព​នេះ​យ៉ាង​ពេញទំហឹង​តែម្ដង។

តាំងពី​អតីតកាល រហូតមកដល់​បច្ចុប្បន្ន សៀវ​ស៊ឹង មាន​ក្រុមការងារចម្បងៗ 8នាក់ នៅចាំ​ជួយ​ធ្វើការ​ងារ​នេះ ឱ្យសម្រេចបាន​ជោគជ័យ មានដូចជា អ្នកវិភាគ​ស្ថានការណ៍ អ្នកចាត់ការ​គ្រប់គ្រង​អតិថិជន ផ្នែក​ស៊ើបអង្កេត​រក​ព័ត៌មាន រួមទាំង​អ្នក​បន្លំ​ខ្លួន អ្នក​សម្ដែង អ្នក​សរសរ​សាច់រឿង និង​អ្នកដឹកនាំ​សម្ដែង នៅចាំ​បង្កើត​ស្ថានការណ៍​ទៀតផង។

នៅពេល​មានការ​ជួល​ឱ្យធ្វើ​ការ កើតឡើង គ្រប់គ្នា​នឹងធ្វើ​ការជួបប្រជុំ ដើម្បី​រិះរក​វិធី​ដែល​ល្អ​បំផុត​ក្នុង​ការកែ​បញ្ហា ដែល​ត្រូវបាន​គេ​ជួល​ឱ្យធ្វើ​នោះ។ ពេលខ្លះ ត្រូវ​ជួល​តួ​ក្លែងបន្លំ ឱ្យទៅ​ធ្វើជា​និយាយ​ជាមួយ​ស្រី​ស្នេហ៍​របស់លោក​ប្រុស និង​លួច​ថតរូប​ភាព​នោះ ផ្ញើ​ទៅឱ្យ​លោកប្រុស ហើយ​ប្រាប់ថា ស្រី​ស្នេហ៍​ក្មេង​កំពុង​ក្បត់ចិត្ត ឬ​ជួនកាល តាមដាន​ជីវិត​ស្នេហា​លួចលាក់​នោះ​យ៉ាង​ដិតដល់ ដើម្បី​រកមើល​ថា តើ​មានការ​សម្ងាត់​អ្វីខ្លះ ដែល​អាច​ប្រើ​ជា​ប្រយោជន៍​បាន និង​រឿងរ៉ាវផ្សេងៗទៀត​ជាច្រើន ដែល​តិច​និក​ទាំងអស់នេះ ហាក់ដូចជា​រាង​ស្មុគស្មាញ​ខ្លាំង ដូច្នេះហើយ​ទើប​តម្លៃ​សេវា ជា​មធ្យម​ស្ថិតក្នុង​ចំនួន​ប្រមាណ​​ជា​ 20,000​ដុល្លារ​​អាមេរិក ចំណែក​ការប្រឹក្សា​តាម​អន​ឡាញ​វិញ ស្ថិតក្នុង​តម្លៃ 150ដុល្លារ ក្នុង 1ម៉ោង។

សៀវ​ស៊ឹង បាន​លើក​ឧទាហរណ៍ ពី​វិធី​ចាត់ការ​ជាមួយ​ពួកគេ​ទាំងនោះ​ថា កាលពី​ឆ្នាំទៅ លោក​បានទទួល​ការជួល​ឱ្យធ្វើ​ការ​នេះ ពី​ស្ត្រី​ម្នាក់៖ ស្វាមី​របស់​នាង​មាន​ស្រី​ស្នេហ៍ ជា​នារី​ក្មេង​ម្នាក់ ទើប​ចង់ឱ្យ​លោក​ចាត់ការ​រិះរក​វិធី ធ្វើឱ្យ​ស្វាមី​លែងលះ​ដាច់ ពី​ស្ត្រី​ស្នេហ៍​នោះ និង​វិលត្រឡប់​មករក​នាង​វិញ​ឱ្យបាន។ លោក​ក៏​បន្លំ​ខ្លួន​ធ្វើជា​អ្នករៀបចំ​ផែនការ​កម្សាន្ត សម្រាប់​ថ្ងៃ​ឈប់សម្រាក រៀបចំ​ដំណើរ​កម្សាន្ត​ដល់​គូស្នេហ៍​ទាំងឡាយ ដោយ​ភរិយា​រូបនោះ នឹង​បន្លំ​ខ្លួន​ធ្វើជា​អតិថិជន​មកប្រើប្រាស់​សេវា​កម្មនេះ ឱ្យជួយ​រៀបចំ​ចាត់ចែង​ថ្ងៃ​ឈប់សម្រាក​លម្ហែ​រយៈពេល 10ថ្ងៃ ឱ្យ​រូបនាង និង​ស្វាមី។

ក្នុងអំឡុង​ការសម្រាកលម្ហែ​កាយ​នោះ ស្វាមី​បានទទួល​សំបុត្រ 1ច្បាប់​ពី​អ្នកមាន​បំណងល្អ តែ​មិន​បង្ហាញ​ឈ្មោះ ដាស់តឿន​ឱ្យ​គាត់​ចាកចេញ​ឱ្យ​ឆ្ងាយ​ពី​ស្រី​ស្នេហ៍។ ស្វាមី គិតតែ​ពី​រិះគិត នឹក​ពិចារណា​ឡើងវិញ និង​ក្រោយមក ក៏​សម្រេចចិត្ត សុំ​បែក​គ្នា​ពី​ស្រី​ស្នេហ៍​ម្នាក់​នោះ ដោយ​មិនបាន​ដឹងថា ទាំងអស់នេះ គឺជា​ផែនការ​របស់​សៀវ​ស៊ឹង និង​ភរិយា​របស់ខ្លួន​ឡើយ។ ការរៀបចំ​រឿងរ៉ាវ​ទាំងអស់​ក្នុង​គ្រានោះ លោក​បានទទួល​តម្លៃ​ឈ្នួល​ដល់​ទៅ 29, 850ដុល្លារ​អាមេរិក។

មានរឿង 1ទៀត មាន​នារី​ម្នាក់ អាយុ 24ឆ្នាំ កើតក្ដី​សង្ស័យថា សង្សារ​របស់ខ្លួន ដែល​សេពគប់​មក​បាន 1ឆ្នាំ​ហើយ​នោះ កំពុង​ក្បត់ចិត្ត​នាង។ អ្វីដែល​នាង​សង្កេត​ដឹង​នោះ​គឺ សង្សារ តែងតែមាន​អាការ​ព្រងើយកន្តើយ​ជាមួយ​រូបនាង មិនសូវ​និយាយស្ដី​ជាមួយ​នាង​ដូច​កាល​គ្រាកន្លងមក រួមទាំង​តែងតែ​ជាប់​និយាយ​ទូរស័ព្ទ​ញឹកញាប់ និង​លួច​ឆាត​ជាមួយ​អ្នកណា​ក៏​មិនដឹង នៅពេលយប់។

សៀវ​ស៊ឹង ចាប់ផ្ដើម​ប្រតិបត្តិការ ដោយ​ការចូល​ទៅធ្វើជា​ស្និទ្ធស្នាល​ជាមួយ​មិត្តភក្តិ​របស់​សង្សារ របស់​ស្ត្រី​ដែល​ជួល​រូបគេ​ឱ្យធ្វើ​ការ​នោះ ដើម្បី​លួច​ស៊ើប​អំពី​រឿងរ៉ាវ​នោះ។ នៅពេល​ស៊ើប និង​តាមដាន​បាន​មួយរយៈ គេ​ក៏​ត្រឡប់មក​រាយការណ៍​ប្រាប់​ស្ត្រី​ម្ចាស់​រឿង​វិញ​ថា សង្សារ​របស់​នាង មិនបាន​ក្បត់ចិត្ត​នាង​ទេ គ្រាន់តែ​ញៀន​លេង​ហ្គេម​ក្នុង​ទូរស័ព្ទ​ច្រើនពេក​ប៉ុណ្ណោះឯង  ចំណែក​អ្នក​ដែល​គេ​ឆាត​ជាមួយ​នោះ សុទ្ធតែ​មិត្តភក្តិ ដែល​លេង​ហ្គេម​ជាមួយគ្នា​ទាំងអស់ និង​ព្រមទាំង​បាន​ដាស់តឿន​នាង​ទៀតផង​ថា អាច​ដោយសារតែ​បុគ្គលិកលក្ខណៈ​របស់​នាង ជា​អ្នក​ម៉ឺងម៉ាត់​ច្បាស់លាស់​ពេក ទើប​ធ្វើឱ្យ​គូសង្សារ​រាង​រំខាន​ចិត្ត និង​ធ្វើខ្លួន​ព្រងើយកន្តើយ​ចំពោះ​រូបនាង។

ទោះជា ការងារ​ភាគច្រើន​របស់​សៀវ​ស៊ឹង ជាការ​រៀបចំ​ឆាក បង្កើត​រឿង ឱ្យលោកប្រុសៗលែងលះ​ជាមួយ​ស្ត្រី​ស្នេហ៍​ក៏ពិតមែន តែ​វា​ក៏មាន​ពេលខ្លះ​ដែរ ដែល​សមាជិក​របស់​សៀ​វ​ស៊ឹង បាន​ចូល​ទៅរក​ស្រី​ស្នេហ៍​ទាំងនោះ​ដោយត្រង់ៗដែរ និង​និយាយ​ជាមួយ​ពួកនាង​ទាំងនោះ​យ៉ាង​ត្រង់​ទៅ​ត្រង់​មក​ថា គួរតែ​ផ្ដាច់​សម្ព័ន្ធភាព​ជាមួយ​បុរស​ដែលមាន​ប្រពន្ធ​រួចហើយនោះ​ទៅ ព្រោះ​វា​ខុស​នឹង​សីលធម៌​សង្គម តែ​ករណីនេះ វា​មានឱកាស​ជោគជ័យ​តិចតួច​ណាស់ និង​ប្រើ​ពេលវេលា​យូរ​ទៀតផង៕

ប្រភព៖ odditycentral,page.om.qq.com
ប្រែ​សម្រួល​ដោយ ទិ​ទី​តំ​តា​តូ

Advertisement