អង្គការសុខភាពពិភពលោក (WHO) បានផ្ដល់អនុសាសន៍ដល់ប្រជាជនថា មិនត្រូវប្រើប្រាស់ថ្នាំប្រភេទស៊ីរ៉ូព្យាបាលអាការក្អកពីរប្រភេទដែលផលិតដោយក្រុមហ៊ុន Marion Biotech ព្រោះជាប់ទាក់ទងនឹងករណីក្មេង 19 នាក់បានស្លាប់នៅ អ៊ូសបេគីស្ថាន។
ការវិភាគរបស់ក្រសួងសុខាភិបាលអ៊ូសបេគីស្ថានបង្ហាញថា ថ្នាំស៊ីរ៉ូក្អកពីរប្រភេទគឺ Ambronol និង DOK-1 Max ដែលផលិតដោយ Marion Biotech មានផ្ទុកសារធាតុពុល ethylene glycol។ Ethylene glycol តែងស្ថិតក្នុងទម្រង់រាវមិនមានក្លិន មិនមានពណ៌ មានរសជាតិផ្អែម និងតែងត្រូវបានរកឃើញនៅក្នុងសារធាតុប្រឆាំងនឹងការកក។ យោងតាមរបាយការណ៍ស្រាវជ្រាវ អាណាព្យាបាលបានឱ្យកូនៗរបស់ពួកគេផឹកស៊ីរ៉ូក្អកនេះក្នុងបរិមាណច្រើនជាងការអនុញ្ញាត នាំឱ្យប៉ះពាល់ដល់សុខភាព។
កាលពីថ្ងៃទី 12 មករា WHO បានឱ្យដឹងថា Marion នៅតែមិនទាន់លើកឡើងនូវការធានាចំពោះសុវត្ថិភាព និងគុណភាពរបស់ផលិតផលទាំងនេះ។ ក្រោយករណីស្លាប់ជាច្រើនដែលត្រូវបានរាយការណ៍នៅ អ៊ូសបេគីស្ថាន ក្រសួងសុខាភិបាលឥណ្ឌា ក៏បានផ្អាកសកម្មភាពរបស់ក្រុមហ៊ុនខាងលើ។ ថ្មីៗនេះ រដ្ឋ Uttar Pradesh ក៏បានដកហូតលិខិតអនុញ្ញាតការផលិតរបស់ Marion។
កាលពីសប្ដាហ៍កន្លង អាជ្ញាធររបស់អ៊ូសបេគីស្ថាន បានចាប់ខ្លួនមនុស្ស 4 នាក់ដើម្បីស្រាវជ្រាវអំពីករណីស្លាប់ក្មេង 19 នាក់ ដែលទាក់ទិននឹងថ្នាំស៊ីរ៉ូក្អក។ អ៊ូសបេគីស្ថានក៏បានបញ្ឈប់បុគ្គលិក 7 នាក់ ព្រោះតែមិនបានវិភាគទាន់ពេលនូវករណីស្លាប់ ព្រមទាំងបានដកហូតថ្នាំគ្រាប់ និងស៊ីរ៉ូម៉ាក Doc-1 Max នៅទូទាំងប្រទេស។
មុននោះ ក្មេងយ៉ាងតិច 70 នាក់នៅ ប្រទេសហ្កំប៊ី បានស្លាប់ បន្ទាប់ពីបានផឹកថ្នាំស៊ីរ៉ូក្អក និងផ្ដាសាយរបស់ក្រុមហ៊ុន Maiden Pharmaceuticals ដែលមានទីស្នាក់ការនៅ ប្រទេសឥណ្ដា។ ក្រុមហ៊ុននេះបានបដិសេធរាល់ការចោទប្រកាន់ ខណៈដែលរដ្ឋាភិបាលឥណ្ឌា មិនបានរកឃើញជាតិពុលនៅក្នុងថ្នាំនេះ។
យោងតាម Reuters ប្រទេសឥណ្ឌូណេស៊ី ក៏ធ្លាប់បានរាយការណ៍ថា ក្មេងជិត 100 នាក់បានស្លាប់ព្រោះតែតម្រងនោមរងរបួសដែលត្រូវបានគេយល់ថា អាចជាប់ទាក់ទិននឹងការប្រើប្រាស់ថ្នាំស៊ីរ៉ូដែលផ្ទុកសារធាតុ paracetamol នាំចូលពីឥណ្ឌា។ ក្រសួងសុខាភិបាលឥណ្ឌូណេស៊ី បានស្នើឱ្យឱសថស្ថានទាំងអស់ផ្អាកលក់ប្រភេទថ្នាំនេះរហូតដល់ការស្រាវជ្រាវបានបញ្ចប់ និងបានសហការជាមួយអង្គការសុខភាពពិភពលោកដើម្បីស្វែងយល់លំអិតអំពីបញ្ហានេះ៕
