ដូវកាលថ្មីនេះ ក្នុងព្រឹត្តិការណ៍បាល់ទាត់ លីកកំពូលរបស់កម្ពុជា កីឡាករក្នុងស្រុកហាក់មិនសូវរកបានគ្រាប់បាល់ ដើម្បីប្រជែងស្បែកជើងមាសឡើយ មានតែកីឡាករបរទេសប៉ុណ្ណោះ គឺ ខ្សែប្រយុទ្ធរបស់ក្រុមណាហ្គាវើលកីឡាករ Autheire Kipson បាននឹងកំពុងបន្ដឈរកំពូលតារាងអ្នកស៊ុតបញ្ចូលទីច្រើនជាងគេ(Top-Scorers) ចំនួន ១០គ្រាប់ ។ ខណៈ ឃួន ឡាបូរ៉ាវី របស់បឹងកេតម្នាក់គត់ ដែលកំពុងមានគ្រាប់បាល់ខ្ពស់ជាងគេក្នុងនាមកីឡាករខ្មែរ ដោយមានរកបាន ៤គ្រាប់ក្នុងដៃ ។
កីឡាករសញ្ជាតិរ្វ៉ាន់ដារូបនេះ រក្សានូវកៅអីកំពូលតារាង Top-Scorers របស់ខ្លួនជាមួយនឹង ១០គ្រាប់ក្នុងដៃ ហើយតាមពីក្រោយកីឡាករ Choe Myong Ho របស់ក្រសួងការពារជាតិរកបាន ៨គ្រាប់ និងកីឡាករ Shane Booysen របស់ភ្នំពេញក្រោន រកបាន ៧គ្រាប់ ។
ឯកីឡាករ Michael Osei Tutu មកពីក្រុមស៊ីម៉ាក់, កីឡាករ Silva Maycon មកពីក្រុមបឹងកេត, កីឡាករ Baldwin Afanwi មកពីក្រុមប៉ូលិស និងកីឡាករ Dzarma Bata មកពីក្រុម Cambodian Tiger គឺសុទ្ធតែរកបាន ៦គ្រាប់ស្មើគ្នា បើគិតត្រឹមសប្ដាហ៍ទី៨ នៃលីគកំពូលកម្ពុជា រដូវកាលថ្មីនេះ ។
គួបញ្ជាក់ផងដែរថា៖ ខ្សែប្រយុទ្ធរបស់ក្រុមណាហ្គាវើលកីឡាករ Autheire Kipson សញ្ជាតិរ្វ៉ាន់ដា នៅបន្ត ឈរនៅក្នុងកំពូល តារាង Top-Scorers នេះគឺ ស្របពេលក្រុមខ្លួនបានខ្ទាតចេញពីកៅអី ៤ក្រុមឈរកំពូលតារាង(Top-4)ជាបណ្ដោះ អាសន្ន មកឈរចំណាត់ថ្នាក់លេខ៥ និងមាន ១២ពិន្ទុ ក្រោយចាញ់ក្រុមបឹងកេត ២-១ នៅក្នុងជំនួបលីគកំពូលកម្ពុជា សប្ដាហ៍ទី៨ កាលពីចុងសប្ដាហ៍កន្លងទៅ ៕
