មានឈ្មោះថា អាហារ មិនថាតែអាហារពេលចម្បងៗ ឬបង្អែមនោះឡើយ ឡារ៉ែនជឿថា នរណាៗក៏ត្រូវតែបរិភោគដែរ តែ តើមានប៉ុន្មានអ្នកទៅដែលចេះជ្រើសរើសអាហារដែលលោកអ្នកត្រូវទទួលទាននោះឱ្យសក្តិសមនឹងវ័យ និងមានប្រយោជន៍ មានគុណតម្លៃដល់រាងកាយរបស់ខ្លួនឯង?។ យើងគួរតែយកចិត្តទុកដាក់ក្នុងការជ្រើសរើសទទួលទានអាហារតាមអំឡុងពេលរបស់អាយុ ឬវ័យ ព្រោះក្នុងអំឡុងពេលនៃវ័យនីមួយៗ មានភាពខុសផ្លែកពីគ្នាខាងការវិវឌ្ឍរបស់រាងកាយ និងលក្ខណៈការរស់នៅ។
ក្នុងអំឡុងអាយុចាប់ពី 20 ឆ្នាំឡើងទៅ ៖ គឺជាអំឡុងពេលដែលរាងកាយមានការវិវឌ្ឍ និងចម្រើនធំធាត់ពេញទំហឹង មិនថាតែរឿងការរៀនសូត្រ ការធ្វើការងារឡើយ ហើយក៏ជាវ័យដែលសកម្ម មិនចេះនឿយហត់ និងរឹតតែសកម្មក្នុងជីវិតប្រចាំថ្ងៃច្រើនប៉ុនណា រាងកាយក៏រឹតតែដុតបំផ្លាញ និងប្រើប្រាស់កម្លាំងថាមពលច្រើនប៉ុននោះដែរ ដូច្នេះគួរជ្រើសរើសទទួលទានអាហារឲ្យបានសក្តិសមនឹងតម្រូវការរបស់រាងកាយ។
ចូរជ្រើសរើសទទួលទានពពួកសាច់សត្វ និងសណ្តែកផ្សេងៗ រួមទាំងបាយ និងម្សៅជាលំដាប់ទីមួយ តាមដោយបន្លែផ្លែឈើជាលំដាប់ទីពីរ ចំណែកឯទឹកដោះគោ និងអាហារជំនួសជាតិកាល់ស្យូមផ្សេងៗដូចជា តៅហ៊ូ ទឹកសណ្តែកលឿងបង្កើនកាល់ស្យូមជាលំដាប់ទីបី និងផ្តល់ភាពសំខាន់ចំពោះជាតិខ្លាញ់ជាលំដាប់ក្រោយគេបង្អស់។
សាច់ត្រីជាអាហារជំនួយខួរក្បាលដែលជួយរក្សាព្យាបាលជញ្ជាំងកោសិកាប្រសាទក្នុងខួរក្បាលឱ្យរឹងមាំ មិនឆាប់ភ្លេច។ បន្លែពណ៌បៃតងដូចជា ត្រកួន កញ្ឆែត ខាត់ណា សណ្តែកកួរ ជួយបំប៉នភ្នែក សាងឆ្អឹង និងធ្មេញឱ្យរឹងមាំ។
វ័យដែលចាប់ផ្តើមដោយលេខ 3៖ ឈានចូលដល់វ័យ 30ឆ្នាំ មនុស្សជាច្រើនចាប់ផ្តើមភ័យ តែការចេះជ្រើសរើសទទួលទានអាហារនឹងធ្វើឱ្យអ្នកឯទៀតមិនអាចស្មានដឹងពីអាយុរបស់អ្នកតាមរយៈរូបរាងមុខមាត់បានឡើយ ។ ក្នុងអំឡុងវ័យចាប់ផ្តើមជាមនុស្សចាស់នេះ តម្រូវការផ្នែកថាមពលនៅតែមាន ព្រោះជាចន្លោះជីវិតនៃការធ្វើការងារ តែត្រូវបន្ថែមការប្រុងប្រយ័ត្នលើរឿងខ្លាញ់ និងកូលេស្តេរ៉ូល ព្រោះអាចមានផលប៉ះពាល់ដល់រូបរាងមុខមាត់ផ្នែកខាងក្រៅដែលធ្វើឱ្យមើលឃើញមានការប្រែប្រួលបានយ៉ាងច្បាស់ ដូច្នេះគួរចៀសវាងអាហារដែលមានជាតិខ្លាញ់ច្រើន និងកូលេស្តេរ៉ូលខ្ពស់ដូចជា សាច់ជ្រូកបីជាន់ ប៊័រដុំ និងខ្ទិះ ជាដើម។
លោកអ្នកអាចជ្រើសរើសទទួលទានអាហារដែលជួយកាត់បន្ថយជាតិខ្លាញ់ និងកូលេស្តេរ៉ូលបានដូចជា ត្រីសមុទ្រជួយកាត់បន្ថយសម្ពាធឈាម ពួកគ្រាប់សណ្តែកស្ងួតដូចជា សណ្តែកក្រហម សណ្តែកខៀវ សណ្តែកលឿង ជួយកាត់បន្ថយភាពប្រថុយពីជម្ងឺបេះដូង និងមានប្រូតេអ៊ីនខ្ពស់ និងអាហារដែលមានជាតិកាកសរសៃខ្ពស់ដែលជួយឱ្យឆ្អែតពោះបានយូរ និងមានផលល្អដល់ប្រព័ន្ធពោះវៀនទៀតផង។
វ័យដែលចាប់ផ្តើមដោយលេខ 4៖ ដោយសារតែសភាពរាងកាយចាប់ផ្តើមប្រែប្រួល ជាពិសេសចំពោះស្ត្រី ឯបុរសក្នុងវ័យនេះវិញក៏ចាប់ផ្តើមមានរោគាផ្សេងៗកើតឡើងដែរ តែទាំងអស់នេះការពន្យាវ័យ និងការការពារជំងឺផ្សេងៗដែលមកជាមួយវ័យ មិនបានលំបាកលំបិនហួសពីយើងអាចធ្វើបាននោះឡើយ ។
សម្រាប់ចន្លោះវ័យនេះតម្រូវការខាងថាមពលនឹងថយចុះ តែតម្រូវការកាល់ស្យូម និងវិតាមីនផ្សេងៗកើនឡើង ដែលរាងកាយអាចនឹងទទួលបានពីបន្លែផ្លែឈើដែលមានជាតិកាកសរសៃអាហារខ្ពស់ ហើយថែមទាំងមានសារធាតុប្រឆាំងរ៉ាឌីកាល់ សេរីទៀតផង។ ឯវិតាមីន C ពីចំណីអាហារដែលងាយរកទទួលទានបាននោះ មានដូចជា ផ្លែក្រូច ត្របែក ប៉េងប៉ោះ ត្រសក់ស្រូវជាដើម ចំណែកអាហារដែលមានវិតាមីន E គឺ ប្រេងសណ្តែក ប៊័រសណ្តែក សណ្តែកដី និងគ្រាប់អាល់ម៉ុន។ ក្រៅពីនេះគួរទទួលទានតៅហ៊ូ ប្រូតេអ៊ីនដែលមានជាតិខ្លាញ់ទាបដែលផ្តល់កាល់ស្យូមច្រើនជាងសាច់សត្វផ្សេងៗ និងគួរចៀសវាងភេសជ្ជៈដែលមានជាតិអាល់កុល និងកាហ្វេអ៊ីនផង ។
វ័យដែលចាប់ផ្តើមដោយលេខ 5៖ ការឈានចូលដល់វ័យ 50 នេះ មិនមែនមានផលប៉ះពាល់ចំពោះតែរាងកាយម្យ៉ាងប៉ុណ្ណោះទេ តែនៅមានផលដល់សភាពផ្លូវចិត្តផងដែរ ដើម្បីត្រៀមខ្លួនទប់ទល់ជាមួយនឹងវ័យនេះ លោកអ្នកគួរយល់ដឹងពីការធ្វើការងាររបស់រាងកាយដែលមានប្រសិទ្ធភាពថយចុះ ជាពិសេសប្រព័ន្ធការរំលាយ និងការបឺតយកសារធាតុអាហារ ធ្វើឱ្យរាងកាយខ្វះសារធាតុអាហារប្រភេទខ្លះ ។
ក្នុងអំឡុងវ័យនេះលោកអ្នកអាចមិនសូវមានអារម្មណ៍ស្រេកទឹកប៉ុន្មានទេ តែគួរទទួលទានទឹកឱ្យបានទៀងទាត់ យ៉ាងតិចមួយថ្ងៃ8 – 12 កែវ ដើម្បីការពារការខ្វះជាតិទឹកដោយមិនដឹងខ្លួន។ គួរទទួលទានអាហារដែលមានជាតិខាបូហាយដ្រេតឱ្យតិច សង្កត់ធ្ងន់លើអាហារពពួកសាច់ត្រីដើម្បីកុំឱ្យខ្វះជាតិប្រូតេអ៊ីន និងពពួកសាច់សត្វណាដែលងាយរំលាយ។ គួរទទួលបានកាល់ស្យូមឱ្យគ្រប់គ្រាន់ ហើយអាហារដែលមានកាល់ស្យូមខ្ពស់គឺនៅក្នុងទឹកដោះ យ៉ាអួប្រភេទក្រែម និងប៊័រដុំជាដើម។
រឿងដែលសំខាន់នោះ គឺមិនថាលោកអ្នកស្ថិតនៅក្នុងវ័យណាក៏ដោយ គួរតែយកចិត្តទុកដាក់រឿងការហូបចុកឱ្យបានគ្រប់ពេល ទោះជាមានជំងឺ ឬគ្មានក៏ដោយ។ ក្រៅពីនេះគួរបង្កើនការធ្វើចលនាក្នុងមួយថ្ងៃៗឱ្យបានច្រើន និងញឹកញាប់ នឹងធ្វើឱ្យមានសុខភាពកាន់តែល្អឡើង និងកាត់បន្ថយភាពធុញថប់ តឹងតែងបានទៀតផង៕