ក្រសួងទេសចរណ៍ សហការជាមួយស្ថានទូតចិនប្រចាំកម្ពុជា និងផ្នែកឯកជន ត្រៀមនឹងរៀបចំពិព័រណ៍ទេសចរណ៍ កម្ពុជា-ចិន ដែលនឹងប្រព្រឹត្តទៅចាប់ពីថ្ងៃទី៦-៨ ខែធ្នូ ឆ្នាំ២០២៤ នៅខេត្តសៀមរាប។ បើយោងតាមសេចក្តីជូនដំណឹងដែលបានចេញផ្សាយកាលពីថ្ងៃពេលថ្មីៗនេះបានឱ្យដឹងថា “ពិព័រណ៍ទេសចរណ៍ កម្ពុជា-ចិន មានគោលបំណងជំរុញបន្ថែមទៀតនូវសកម្មភាពមួយក្នុងចំណោមសកម្មភាពលើកកម្ពស់ការផ្លាស់ប្តូរប្រជាជនកម្ពុជា-ចិន ឆ្នាំ២០២៤ និងយុទ្ធនាការ ទស្សនាខេត្តសៀមរាប ឆ្នាំ ២០២៤”។ ពិព័រណ៍ទេសចរណ៍នេះ នឹងមានការចូលរួមពីប្រតិបត្តិករទេសចរណ៍ជាអ្នកទិញជនជាតិចិន ចំនួន៥០ក្រុមហ៊ុន អ្នកលក់ជាជនជាតិចិនចំនួន៥០ក្រុមហ៊ុន និងអ្នកលក់ជនជាតិខ្មែរ ចំនួន១០០ក្រុមហ៊ុន ព្រមទាំងអ្នកសារព័ត៌មានកម្ពុជា និងអ្នកសារព័ត៌មានចិន ចំនួន៥០ស្ថាប័នផងដែរ។
ក្រសួងទេសចរណ៍បានបន្ថែមថា ពិព័រណ៍នេះនឹងបង្ហាញពីសកម្មភាពសំខាន់ៗដូចជា សិក្ខាសាលាផ្សព្វផ្សាយទេសចរណ៍កម្ពុជា ការផ្គូផ្គងអាជីវកម្ម កម្មវិធីទស្សនកិច្ចគោលដៅទេសចរណ៍មុន និងក្រោយពិព័រណ៍ និងកម្មវិធីផ្សេងៗទៀតជាច្រើន។ ក្រសួងក៏បានអំពាវនាវដល់សមាគមទេសចរណ៍ ប្រតិបត្តិករទេសចរណ៍ ផ្នែករដ្ឋ-ឯកជន ស្ថាប័នផ្សព្វផ្សាយជាតិ និងអន្តរជាតិ និងសាធារណជនទូទៅឱ្យចូលរួមក្នុងពិព័រណ៍ទេសចរណ៍នេះឱ្យបានច្រើនកុះករ ព្រមទាំងចូលរួមផ្សព្វផ្សាយ “ពិព័រណ៍ទេសចរណ៍កម្ពុជា-ចិន” នេះដល់ដៃគូពាក់ព័ន្ធឱ្យបានទូលំទូលាយ ដើម្បីធ្វើឱ្យកម្មវិធីនេះទទួលបានការគាំទ្រកាន់តែច្រើន និងទទួលបានជោគជ័យយ៉ាងត្រចះត្រចង់។
រដ្ឋមន្ត្រីក្រសួងទេសចរណ៍ លោក ហួត ហាក់ មានប្រសាសន៍ថា កម្ពុជាទទួលបានភ្ញៀវទេសចរអន្តរជាតិចំនួន៤.៣លាននាក់ក្នុងអំឡុងខែមករា ដល់ខែសីហា ឆ្នាំ២០២៤ កើនឡើង២២.៥%។ ក្នុងចំណោមចំនួននេះ មានភ្ញៀវទេសចរចិន ចំនួន៥៣៨,៨៣៤នាក់ កើនឡើង៤៧.៧%។ លោកបានបន្តថា “កម្ពុជាត្រូវបានគេព្យាករថានឹងទទួលបានភ្ញៀវទេសចរអន្តរជាតិចំនួន៧លាននាក់ ក្នុងនោះមានភ្ញៀវទេសចរចិនជាង២លាននាក់ក្នុងឆ្នាំ២០២៥”៕
