លោក Arsene Wenger ជឿជាក់ថា ស្មារតីប្រយុទ្ធដែលស្ថិតនៅពីក្រោយក្រុម Arsenal ក្នុងពេលពួកគេទទួលជ័យជម្នះក្នុងលទ្ធផល ២-១ លើក្រុម Manchester City ក្នុងការប្រកួតពាន FA Cup វគ្គពាក់កណ្តាលផ្តាច់ព្រ័ត្រ បានកើតឡើងក្រោមជំនួយនៃការបង្ហាញពីទម្រង់លេងយ៉ាងមុតស្រួចរបស់ខ្សែបម្រើប្រយុទ្ធ Alexis Sanchez។
គ្រូបង្វឹករបស់ក្រុមកាំភ្លើងធំរូបនេះ បានដឹកនាំឲ្យក្រុមរបស់លោកបង្ហាញខ្លួនក្នុងការប្រកួតពាន FA Cup វគ្គផ្តាច់ព្រ័ត្រ ជាលើកទី២០ ក្រោយពីការបង្ហាញពីទម្រង់លេងយ៉ាងល្អមួយសំណាក់ក្រុមមួយ ដែលរងនូវការរិះគន់ជារឿយៗសម្រាប់ការធ្លាក់ចូលក្នុងសម្ពាធ។ ក្នុងពេលដេញតាមពីក្រោយគ្រាប់បាល់ក្នុងតង់ទី២របស់ខ្សែប្រយុទ្ធ Sergio Aguero ក្រុមកាំភ្លើងធំ Arsenal ហាក់ស្ថិតនៅផ្លូវឆ្ពោះទៅកាន់ការរងបរាជ័យដ៏ខកចិត្តមួយផ្សេងទៀតទៅហើយ ក្នុងរដូវកាលដ៏ត្រដាបត្រដួសរបស់ពួកគេ ក្រោយពីស្ថិតក្រោមការគ្រប់គ្រងរបស់គូប្រកួតខ្លួនស្ទើរតែទាំងស្រុង។ ប៉ុន្តែ ក្រុមមានមូលដ្ឋាននៅទីក្រុងឡុងដ៍មួយនេះ បានបង្ហាញពីស្មារតីប្រយុទ្ធដ៏មិននឹកស្មានដល់ ខណៈដែលកីឡាករ Nacho Monreal បានរកគ្រាប់បាល់តាមស្មើដើម្បីបង្ខំឲ្យឈានដល់ការប្រកួតនៅនាទីបន្ថែម១៥នាទីពីរដង នៅមុនពេលខ្សែប្រយុទ្ធអន្តរជាតិស៊ីលី Sanchez បានរកគ្រាប់បាល់ឈ្នះជាមួយនឹងការស៊ុតបាល់បញ្ចូលទីយ៉ាងល្អ។
ក្នុងរយៈពេលប៉ុន្មានសប្តាហ៍ចុងក្រោយនេះ Sanchez ដែលត្រូវបានគេទាក់ទងជាមួយនឹងការផ្ទេរមួយ បន្ទាប់ពីបដិសេធមិនបន្តកិច្ចសន្យាថ្មីមកទល់ពេលនេះ បានជួបការលំបាកក្នុងការស្វែងរកទម្រង់លេងដ៏ល្អរបស់គេ នៅពេលប្រកួតជាមួយនឹងក្រុម Man City។ លោក Wenger ពិតជារីករាយជាមួយនឹងរបៀបដែលតារាឆ្នើមរបស់លោករក្សាការព្យាយាមរហូតទាល់តែរកបានគ្រាប់បាល់ឈ្នះ។ លោក Wenger បានឲ្យដឹងថា៖ «Alexis Sanchez មានលក្ខណៈដូចទៅនឹងក្រុមនេះអ៊ីចឹង។ រូបគេមានបញ្ហាក្នុងពេលចាប់ផ្តើម និងមានកម្រិតលេងកាន់តែខ្លាំងទៅៗ។ រូបគេគឺជាសត្វដែលត្រៀមលក្ខណៈរួចរាល់ក្នុងការសម្លាប់គូប្រកួតរបស់ខ្លួន។ រូបគេមិនដឹលបោះបង់ឡើយ»៕
ប្រភពពី៖ Channel News Asia
