យន្តហោះចម្បាំង F-16A/B របស់កោះតៃវ៉ាន់ចំនួន 42 គ្រឿងដែលត្រូវបានដំឡើងឱ្យទៅជា F-16V តាមគម្រោងនឹងត្រូវប្រគល់ឱ្យកងកម្លាំងការពារដែនកោះនេះនៅចុងខែមីនា 2021។
Huang Chih-wei មេបញ្ជាការទ័ពអាកាសតៃវ៉ាន់ កាលពីថ្ងៃទី 17 មីនា បានឱ្យដឹងថា យន្តហោះចម្បាំង F-16A/B ដែលត្រូវបានធ្វើទំនើបកម្មឱ្យទៅជា F-16V មានសមត្ថភាពអាច «រកឃើញសត្រូវបានលឿនជាង និងអាចវាយប្រហារក្នុងរយៈចម្ងាយឆ្ងាយជាង»។ យន្តហោះចម្បាំង F-16V របស់ទ័ពអាកាសតៃវ៉ាន់ បច្ចុប្បន្ន មានសមត្ថភាពវាយប្រហារគ្របដណ្ដប់ទូទាំងដែនអាកាសរបស់កោះនេះ។
យន្តហោះចម្បាំង F-16V ទាំងនេះនឹងត្រូវបានដាក់ឱ្យប្រើប្រាស់នៅក្នុងក្រុមហោះហើរយុទ្ធសាស្ត្រលេខ4 នាំឱ្យអង្គភាពនេះក្លាយជាស្ថាប័នដំបូងគេរបស់កងទ័ពការពារដែនអាកាសតៃវ៉ាន់ មានសុទ្ធតែ F-16V នេះបើតាមលោក Huang Chih-wei។ ពិធីប្រគល់យន្តហោះចម្បាំងទាំងនេះនឹងត្រូវបានធ្វើឡើងនៅចុងខែមីនា ដែលក្នុងពិធីនោះនឹងមានវត្តមានរបស់មេដឹកនាំតៃវ៉ាន់ លោកស្រី Tsai Ing-wen ផងដែរ។
ទ័ពអាកាសតៃវ៉ាន់ កាលពីឆ្នាំ 2016 បានចាប់ផ្ដើមដំណើរការកម្មវិធីដំឡើង F-16A/B ទៅជា F-16V ប្រកបដោយភាពទាន់សម័យបំផុត ជាមួយនឹងប្រព័ន្ធអេឡិចត្រូនិកស្ដង់ដាខ្ពស់ជាងគេ រួមនឹងប្រព័ន្ធគ្រប់គ្រងការហោះហើរ និងប្រយុទ្ធទាន់សម័យ។ តាមផែនការ កម្មវិធីដែលត្រូវបានដំណើរការដោយក្រុមហ៊ុនអភិវឌ្ឍឧស្សាហកម្មអាកាសចរណ៍តៃវ៉ាន់ (Aerospace Industrial Development Corporation/AIDC) សហការជាមួយនឹងក្រុមហ៊ុនផលិតអាវុធLockheed Martin របស់អាមេរិក ដែលត្រូវចំណាយប្រាក់ប្រមាណ 3.7 ពាន់លានដុល្លារខាងលើនេះ នឹងត្រូវបញ្ចប់នៅមុនដំណាច់ឆ្នាំ 2023។
ក្រៅពី F-16A/B ដែលត្រូវបានដំឡើងស្ដង់ដាថ្មី តៃវ៉ាន់ក៏បានបញ្ជាទិញយន្តហោះចម្បាំង F-16V ថ្មី ពីសហរដ្ឋអាមេរិកចំនួន 66 គ្រឿង ដែលមានតម្លៃរាប់ពាន់លានដុល្លារផងដែរ ដែលកោះមួយនេះនឹងផ្ដើមទទួលបានចាប់ពីឆ្នាំ 2022។ កាលពីឆ្នាំ 1992 កោះតៃវ៉ាន់បានទិញយន្តហោះចម្បាំង F-16 ចំនួន 160 គ្រឿង ហើយបច្ចុប្បន្នកំពុងគ្រប់គ្រងប្រមាណ 150 គ្រឿង។
កោះតៃវ៉ាន់កំពុងតែស្វែងរកវិធីដើម្បីធ្វើទំនើបកម្មលើសព្វាវុធរបស់ខ្លួន នៅក្នុងគ្រាដែលប្រទេសចិនដីគោក កំពុងបង្កើនសម្ពាធលើកោះនេះ។ មួយរយៈពេលចុងក្រោយនេះ ចិនដីគោក តែងតែបញ្ជូនយន្តហោះចម្បាំងមកកៀកនឹងកោះនេះជារៀងរាល់ថ្ងៃ នាំឱ្យតៃវ៉ាន់ត្រូវពង្រាយយន្តហោះចម្បាំងដើម្បីទប់ទល់។
ក្រុមមន្ត្រី តៃវ៉ាន់ បានឱ្យដឹងថា ក្នុងឆ្នាំ 2020 កងកម្លាំងការពារដែនអាកាសរបស់ខ្លួនបានចំណាយប្រាក់ជិត 1.1 ពាន់លានដុល្លារអាមេរិកដើម្បីទប់ស្កាត់យន្តហោះយោធារបស់ចិនដីគោក ដែលហោះចូលក្នុងតំបន់កំណត់អត្តសញ្ញាណដែនអាកាស (ADIZ) របស់កោះនេះ។ មេបញ្ជាការទ័ពអាកាសតៃវ៉ាន់ លោក Huang Chih-wei បានបញ្ជាក់ថា ប្រាក់ចំណាយក្នុងមួយម៉ោងៗ សម្រាប់យន្តហោះចម្បាំង F-16 គឺ 5,300 ដុល្លារអាមេរិក, សម្រាប់ AIDC F-CK-1 គឺ 7,800 ដុល្លារ ហើយសម្រាប់យន្តហោះប្រមាញ់នាវាមុជទឹក P-3C គឺ 7,000 ដុល្លារ។
សាធារណរដ្ឋប្រជាមានិតចិន (ចិនដីគោក) តែងតែចាត់ទុកថា កោះតៃវ៉ាន់គឺជាទឹកដីមួយផ្នែករបស់ខ្លួនដែលមិនអាចកាត់ផ្ដាច់បាន ហើយថា ការប្រកាសឯករាជ្យរបស់កោះនេះគឺ «ស្មើនឹងសង្គ្រាម»។ ប៉ុន្តែ សាធារណរដ្ឋចិន (ចិនតៃវ៉ាន់) ឯណោះវិញ កំពុងតែចាត់ទុកថា ខ្លួនជាប្រទេសឯករាជ្យស្រាប់ មិនចាំបាច់ប្រកាសឯករាជ្យទៀតឡើយ៕
ប្រភព៖ Focus Taiwan
ប្រែសម្រួល៖ បុត្រា
