អតីតប្រធានាធបិតីសហរដ្ឋអាមេរិក លោក Donald Trump បានចាត់ទុកថា ខ្លួននិយាយត្រូវ នៅពេលទាយថា អតីតព្រះនាង Meghan ដែលជាព្រះរាជនត្តារបស់មហាក្សត្រីអង់គ្លេស គឺជាមនុស្ស «មិនល្អប៉ុន្មានឡើយ»។ សារព័ត៌មាន Business Insider បានចេញផ្សាយថា ទូរទស្សន៍ CBS ត្រូវចំណាយប្រាក់យ៉ាងហោចពី 7-9 លានដុល្លារអាមេរិក ដើម្បីទទួលបានសិទ្ធិផ្ដាច់មុខក្នុងការចាក់ផ្សាយកិច្ចសម្ភាសរវាងគ្រួសារ Meghan-Harry ជាមួយនឹង មហាសេដ្ឋិនី និងជាពិធីការិនី Oprah Winfrey កាលពីថ្ងៃទី 7 មីនាកន្លងទៅ។
យោងតាម Fox News ទីប្រឹក្សាជាន់ខ្ពស់របស់អតីតប្រធានាធិបតី Donald Trump ដែលស្ថិតនឹង Jasson Miller ថ្មីៗនេះ បានចូលរួមក្នុងកម្មវិធីផ្សាយផ្ទាល់មួយ។ ក្នុងនោះ លោក Miller បានបង្ហើបឱ្យដឹងអំពីការយល់ឃើញរបស់លោក Trump ចំពោះអតីតព្រះនាង Meghan បន្ទាប់ពីនាងបានសម្ភាសជាមួយពិធីការិនី Oprah Winfrey ដែលបានធ្វើឱ្យរាជវាំងអង់គ្លេសក្ដៅក្រហាយ។
«ឃើញទេ ខ្ញុំធ្លាប់បាននិយាយហើយថា នាងនោះមិនល្អប៉ុន្មានទេ ហើយពេលនេះ គ្រប់គ្នាបានឃើញច្បាស់ហើយ» លោក Miller ដកស្រង់សម្ដីរបស់លោក Donald Trump និយាយដូច្នេះ។
ប្រការដែលគួរឱ្យចាប់អារម្មណ៍ជាងគេ នោះគឺថា លោក Trump មិនហ៊ាននិយាយចេញជាសាធារណៈអំពីការយល់ឃើញរបស់ខ្លួនចំពោះអតីតព្រះនាង Meghan ព្រោះតែខ្លាចត្រូវរងសម្ពាធដូចករណីអ្នកដឹកនាំកម្មវិធី Piers Morgan របស់ទូរទស្សន៍ប្រទេសអង់គ្លេស។
លោក Morgan ថ្មីៗនេះ ត្រូវបានស្ថានីយទូរទស្សន៍ដកតំណែងចេញពីកម្មវិធីដ៏ល្បីឈ្មោះ “Good Morning Britain” ដោយសារតែពិធីករដ៏ល្បីឈ្មោះរូបនេះ បានរិះគន់ចំៗលើព្រះនាង Meghan ហើយក៏ត្រូវទស្សនិកជនប្រតិកម្ម។
លោក Morgan បានឱ្យដឹងថា ខ្លួនត្រូវបានបណ្ដេញពីការងារ ដោយសារមិនព្រមសុំទោស Meghan បន្ទាប់ពីកិច្ចសម្ភាសបរិហាកេរ្ដិ៍គ្រួសារខាងស្វាមី បង្កឱ្យមានផលប៉ះពាល់ដល់កិត្តិយសរាជវាំងអង់គ្លេស។
បើទោះជាមានការព្រួយបារម្ភ ប៉ុន្តែ អតីតប្រធានាធិបតីសហរដ្ឋអាមេរិក លោក Donald Trump នៅតែគាំទ្រលោក Piers Morgan ដដែល។
«ខ្ញុំនៅខាងលោក Morgan។ គាត់ជាមនុស្សពូកែ និងអស្ចារ្យ ប៉ុន្តែ ពួកគេបែរជាព្យាយាមបណ្ដេញគាត់ពីការងារព្រោះតែការរិះគន់ Meghan ទៅវិញ» ទីប្រឹក្សា Miller ថា អតីតប្រធានាធិបតី Trump ថ្លែងដូច្នេះ។
នេះមិនមែនជាលើកដំបូងនោះទេដែលលោក Trump បានរិះគន់ព្រះនាង Meghan។ អំឡុងឃោសនាបោះឆ្នោតប្រធានាធិបតី ឆ្នាំ 2016 ព្រះនាង Meghan កាលណោះគឺជាពលរដ្ឋអាមេរិកាំង បានប្រកាសថានឹងបោះឆ្នោតជូនបេក្ខភាព Hilary Clinton។ នាងឱ្យដឹងថា ខ្លួនបោះឆ្នោតនេះមិនមែនដោយសារលោកស្រី Hilary ជាស្ត្រីភេទនោះទេ តែដោយសារមិនចង់រស់នៅក្នុងស្ថានភាពដែលលោក Trump ជាអ្នកគូសវាស។
ឆ្នាំ 2019 អតីតប្រធានាធិបតី Trump កាលណោះមានអារម្មណ៍ភ្ញាក់ផ្អើលខ្លាំងអំពីរឿងរ៉ាវខាងលើ នៅពេលត្រូវបានសារព័ត៌មាន The Sun របស់អង់គ្លេសសួរដល់បញ្ហានោះ។ «ខ្ញុំមិនបានដឹងអំពីរឿងរ៉ាវនោះ។ អាចនិយាយយ៉ាងណាទេ…ខ្ញុំមិននឹកស្មានថា នាងចិត្តអាក្រក់ដូច្នេះសោះ» លោក Trump ឆ្លើយនឹងសំណួររបស់ The Sun។
នៅក្នុងរដូវឃោសនារកសំឡេងឆ្នោតកាលពីឆ្នាំ 2020 ពេលត្រូវបានសួរអំពីគ្រួសាររបស់ Meghan លោក Trump ក៏បានទទួលស្គាល់ថា ខ្លួនមិនចូលចិត្តព្រះនាង Meghan ទាល់តែសោះ។
«ខ្ញុំមិនចូលចិត្តនាងនោះទាល់តែសោះ ហើយនាងក៏ប្រហែលជាដឹងអំពីប្រការនេះ។ ប៉ុន្តែ ខ្ញុំនៅតែចង់ជូនពរសំណាងល្អចំពោះព្រះអង្គម្ចាស់ Harry ព្រោះថា គាត់នឹងត្រូវការប្រការនោះក្នុងជីវិតអាពាហ៍ពិពាហ៍» លោក Trump បន្ថែម៕
ប្រភព៖ BI, BBC
ប្រែសម្រួល៖ បុត្រា
