ប៉ូលិសរដ្ឋ Texas នៃសហរដ្ឋអាមេរិក បានបើកការស៊ើបអង្កេតលើបណ្ដឹងចោទប្រកាន់មួយករណីស្ដីអំពីកុមារស្បែកខ្មៅម្នាក់ដែលរៀននៅសាលាមធ្យមសិក្សា ត្រូវបានមិត្តរួមថ្នាក់ធ្វើបាបយ៉ាងព្រៃផ្សៃ ព្រមទាំងបង្ខំឱ្យផឹកទឹកនោមទៀតផង ទាក់ទងនឹងបញ្ហា «ប្រកាន់ពូជសាសន៍»។
យោងតាមសារព័ត៌មានអង់គ្លេស Daily Mail កាលពីថ្ងៃទី 10 មីនា 2021 ប៉ូលិសក្រុង Plano នៃរដ្ឋ Texas ឱ្យដឹងថា ពួកគេកំពុង «ញាប់ដៃ ញាប់ជើង» ស៊ើបអង្កេតករណីសិស្សថ្នាក់ទី 8 ម្នាក់ ឈ្មោះ SeMarion Humphrey ត្រូវសង្ស័យថា ត្រូវបានមិត្តរួមថ្នាក់ធ្វើបាបយ៉ាងអាណោចអាធម្ម។
ការស៊ើបអង្កេតត្រូវបានធ្វើឡើង បន្ទាប់ពីនាង Summer Smith ដែលជាម្ដាយរបស់កុមារ SeMarion បានធ្វើសន្និសីទសារព័ត៌មានមួយនៅខាងក្រៅសាលាមធ្យមសិក្សា Haggard ដោយស្នើឱ្យក្រុមអាណាព្យាបាល និងសិស្សដែលពាក់ព័ន្ធនឹងករណីនេះ ត្រូវទទួលខុសត្រូវចំពោះអំពើហិង្សារបស់កូនៗពួកគេ។
Smith ឱ្យដឹងថា កូនប្រុសរបស់នាង ត្រូវបានគេសម្លុតគំរាម និងរំខាននៅឯសាលា Haggard ក្នុងអំឡុង 2 ឆ្នាំកន្លងទៅនេះ។ ប៉ុន្តែ ហេតុការណ៍បានធ្ងន់ធ្ងរដល់ចំណុចកំពូលកាលពីថ្ងៃទី 12 កុម្ភៈ 2021 នៅពេល SeMarion ត្រូវបានមិត្តរួមថ្នាក់ម្នាក់អញ្ជើញឱ្យចូលរួមពិធីជប់លៀង និងគេងនៅទីនោះ។ កុមាររងគ្រោះនេះ មិនបានដឹងទាល់តែសោះថា មិត្តរួមថ្នាក់មួយចំនួនដែលធ្លាប់បានធ្វើបាបខ្លួន នឹងចូលរួមពិធីនោះ។
ក្នុងយប់នោះ Smith និយាយថា កូនប្រុសរបស់នាងត្រូវគេបង្អាប់ដោយពាក្យគ្រោតគ្រាតបំផុត។ សិស្សមួយចំនួនថែមទាំងបានយកកាំភ្លើងជ័រ បាញ់ទៅលើ SeMarion។ ក្នុងវីដេអូមួយបានបង្ហាញថា កុមាររូបនេះ ថែមទាំងត្រូវទះកំផ្លៀងទៀតផង។
អ្វីដែលសាហាវជាងគេ នោះគឺសកម្មភាពនៅក្នុងវីដេអូមួយដែលត្រូវបានចែករំលែកនៅលើបណ្ដាញសង្គម បង្ហាញថា SeMarion ត្រូវបានបង្ខំឱ្យផឹកទឹកមួយប្រភេទ ដែលវាទំនងជាទឹកនោម ដែលដាក់នៅក្នុងកែវក្រដាសមួយ ខណៈដែលនៅជុំវិញ មានសំឡេងសើចកងរំពង។
ដំបូងឡើយ SeMarion មិនហ៊ាននិយាយប្រាប់អ្នកណាអំពីអ្វីដែលបានកើតឡើងកាលពីយប់នោះ ដោយសារតែមានគេគំរាមថានឹងវាយធ្វើបាប។
SeMarion មិនបានត្រលប់ទៅសាលាអស់រយៈពេលជាងមួយសប្ដាហ៍ ដោយសារតែព្រឹលធ្លាក់ខ្លាំង។ ប៉ុន្តែ វីដេអូដែលបង្ហាញថា SeMarion ត្រូវមិត្តរួមថ្នាក់បង្ខំឱ្យផឹកទឹកនោម ត្រូវបានគេចែករំលែកតៗគ្នាពេញបណ្ដាញសង្គមនៅក្នុងអំឡុងពេលនោះ។
ក្រោយពីត្រលប់មកសាលាវិញ សិស្សម្នាក់បានសួរ SeMarion ថា តើត្រូវគេបង្ខំឱ្យផឹកទឹកនោមមែន ឬទេ។ ពេលនេះ SeMarion គ្រាន់តែឆ្លើយថា មិនចាំហេតុការណ៍នោះទេ។ មកដល់សប្ដាហ៍កន្លងទៅ ទើប SeMarion រៀបរាប់ហេតុការណ៍គ្រប់យ៉ាង ប្រាប់នាយកសាលារបស់ខ្លួន បន្ទាប់ពីក្រុមមន្ត្រីនៅសាលារៀនបានដឹងអំពីវីដេអូនោះ។
នៅក្នុងសេចក្ដីប្រកាសមួយកាលពីថ្ងៃទី 5 មីនា Sara Bonser ដែលជាអ្នកគ្រប់គ្រងសាលានៃតំបន់ Plano បានឱ្យដឹងថា ភ្លាមៗនោះ ពួកគេបានបើកការស៊ើបអង្កេតលើករណីនេះ។
«ហេតុការណ៍យ៉ាងដូច្នេះ បានធ្វើឱ្យប៉ះពាល់ដល់សហគមន៍របស់យើង។ ខ្ញុំចង់ឱ្យសហគមន៍របស់យើងដឹងថា Plano នឹងមិនអត់ឱនឱ្យទង្វើគំរាមកំហែង ឬរំខាននានាជាដាច់ខាត» Bonser បញ្ជាក់។
ក្រុមមន្ត្រីអប់រំរបស់សាលាបានឱ្យដឹងថា ពួកគេកំពុងធ្វើការជាមួយ «សិក្សានុសិស្សដែលពាក់ព័ន្ធ រួមនឹងអាណាព្យាបាលរបស់ពួកគេផងដែរ» ដើម្បីដោះស្រាយបញ្ហានេះ។
មេធាវី Cole តំណាងឱ្យគ្រួសារ SeMarion បានឱ្យដឹងថា គ្រួសារជនរងគ្រោះមានបំណងប្ដឹងពីបទព្រហ្មទណ្ឌចំពោះសិស្សទាំងឡាយដែលបានប្រើអំពើហិង្សាមកលើ SeMarion។
«នេះមិនមែនជាទោសស្រាលនោះទេ តែវាមានលក្ខណធ្ងន់ធ្ងរ។ ដែលហៅវាថាជាសកម្មភាពសម្លុតគំរាមគឺគ្រាន់តែដើម្បីកាត់បន្ថយទម្ងន់ទោសនៃអំពើហិង្សានេះតែប៉ុណ្ណោះ»៕
ប្រភព៖ Daily Mail
ប្រែសម្រួល៖ បុត្រា