ក្រុមប៉ូលិសមីយ៉ានម៉ា (ភូមា) ត្រូវបានចោទប្រកាន់ថា បានបន្តបាញ់ប្រហារដោយគ្រាប់ពិតដើម្បីបំបែកហ្វូងបាតុករ បណ្ដាលឱ្យមនុស្ស 2 នាក់រងរបួសធ្ងន់ធ្ងរ មួយថ្ងៃបន្ទាប់ពីកងទ័ពបានស្នើឱ្យឈប់ប្រើប្រាស់គ្រាប់កាំភ្លើងពិត។
ក្រុមបាតុករប្រឆាំងរដ្ឋប្រហារនៅប្រទេសភូមា ថ្ងៃនេះនៅតែបន្តចេញធ្វើបាតុកម្ម។ នៅទីក្រុង Yangon ក្រុមបាតុករពាក់មួកសុវត្ថិភាពការងារ និងប្រដាប់ដោយខែលការពារដែលពួកគេបានច្នៃ និងបានប្រមូលផ្ដុំគ្នានៅខាងមុខរបងបន្លាលួសនៅក្នុងតំបន់ផ្សេងៗគ្នា។ ក្រុមបាតុករនាំគ្នាស្រែកហ៊ោប្រឆាំងរដ្ឋាភិបាលយោធា។
«បើសិនជាយើងត្រូវបានបង្រាប នឹងមានការផ្ទុះឡើង។ បើសិនយើងត្រូវបានវាយប្រហារ យើងនឹងតបត» នេះគឺជាជ័យឃោសន៍របស់ក្រុមបាតុករ។
មិនយូរប៉ុន្មាន ក្រុមប៉ូលិសក៏បានបង្ហាញខ្លួន បាញ់គ្រាប់បែកផ្សែងបង្ហូរទឹកភ្នែក និងគ្រាប់បែកបង្ករន្ធត់ស្មារតី (Stun grenade) ដើម្បីបំបែកហ្វូងបាតុករនៅក្នុងតំបន់ចំនួន 4 ផ្សេងៗគ្នា។ សកម្មជនម្នាក់ និងអ្នកសារព័ត៌មានម្នាក់បានឱ្យដឹងថា ប៉ូលិសនៅទីរួមស្រុក Kale ភាគពាយព្យប្រទេសភូមា បានបាញ់ប្រហារដោយគ្រាប់កាំភ្លើងពិត បណ្ដាលឱ្យមនុស្សជាច្រើននាក់រងរបួស។
វេជ្ជបណ្ឌិតម្នាក់នៅ Kale និយាយថា មាន 3 នាក់រងរបួសធ្ងន់ ខណៈដែលសកម្មជនម្នាក់ឈ្មោះ War War Pyone បានប្រាប់ថា៖ «មនុស្សមួយចំនួនបានរងរបួស ក្នុងនោះមាន 2 នាក់ស្ថិតក្នុងស្ថានភាពអាសន្ន»។ ចំណែកបុគ្គលិកសង្គ្រោះម្នាក់ក៏បានអះអាងថា បាតុករជាច្រើននាក់រងរបួសដោយសារគ្រាប់កាំភ្លើងពិត និងគ្រាប់កាំភ្លើងកៅស៊ូ។
ក្រុមមន្ត្រីយោធានៃប្រទេសមីយ៉ានម៉ា និងក្រុមមន្ត្រីប្រចាំតំបន់មិនទាន់មានប្រតិកម្មអ្វីទៅនឹងករណីប៉ូលិសបាញ់ប្រហារដោយប្រើគ្រាប់កាំភ្លើងពិតនេះនៅឡើយ៕
ប្រភព៖ Reuters
ប្រែសម្រួល៖ បុត្រា