តំបន់ Capitol Hill ត្រូវបានបិទនៅក្នុងគ្រាដែលការហាត់សមជាលើកចុងក្រោយសម្រាប់សម្ដែងក្នុងពិធីស្បថចូលកាន់តំណែងរបស់លោក Joe Biden ដោយសារតែមានអគ្គិភ័យកើតឡើងក្នុងតំបន់ប្រជុំជនដែលនៅក្បែរនោះ បង្កឱ្យមានការព្រួយបារម្ភអំពីសន្តិសុខ។
ក្រុមមន្ត្រីអាមេរិកកាលពីថ្ងៃទី 18 មករា បានធ្វើការហាត់ស៊ាំចុងក្រោយសម្រាប់អបអរក្នុងពិធីឡើងកាន់តំណែងប្រធានាធិបតីរបស់លោក Biden ដែលក្នុងនោះមានមនុស្សមួយចំនួនសម្ដែងជាប្រធានាធិបតីជាប់ឆ្នោត និងក្រុមមន្ត្រីជាន់ខ្ពស់ឈរនៅចំពោះមុខភ្នំ Capitol និងទស្សនាការប្រគំតន្ត្រីរបស់កងម៉ារីនអាមេរិក។
នៅក្នុងពេលកំពុងហាត់ស៊ាំ គេឃើញមានផ្សែងខ្មៅខ្មួលខ្មាញ់បាញ់ឡើងទៅលើនៅខាងក្រោយវិមានសភា បណ្ដាលឱ្យគ្រប់គ្នាត្រូវជម្លៀសខ្លួន ហើយ Capitol Hill ក៏ត្រូវបានបិទមិនឱ្យចេញចូល ដោយសារមានការព្រួយបារម្ភអំពីសន្តិសុខ។ ប៉ុន្តែ ផ្សែងនោះ ក្រោយមកត្រូវបានគេដឹងថា កើតឡើងពីអគ្គិភ័យមួយនៅក្នុងជំរំជនគ្មានផ្ទះសម្បែងដែលស្ថិតនៅខាងក្រោមស្ពានមួយ ចម្ងាយ 1.6 គីឡូម៉ែត្រពី Capitol Hill។
Vito Maggiolo អ្នកនាំពាក្យរបស់ការិយាល័យគ្រប់គ្រងអគ្គិភ័យនៃរដ្ឋធានីវ៉ាស៊ីងតោន បានឱ្យដឹងថា អគ្គិភ័យនេះមានប្រភពពីចង្ក្រានកម្ដៅស្វ័យប្រវត្តប្រើហ្គាសរបស់ស្ត្រីម្នាក់រស់នៅក្នុងជំរំនោះ។ ស្ត្រីម្ចាស់ចង្ក្រានកម្ដៅនេះរងរបួស ប៉ុន្តែបដិសេធមិនទទួលការព្យាបាល និងបានឱ្យដឹងថា ទ្រព្យរបស់គាត់ត្រូវឆេះខ្ទេចគ្មានសល់។ អគ្គិភ័យទំនងជាត្រូវបានពន្លត់ទាំងស្រុងបន្ទាប់ពីក្រុមគ្រប់គ្រងអគ្គិភ័យបានទៅដល់កន្លែងកើតហេតុ។
ក្នុងពេលអគ្គិភ័យកំពុងឆាប់ឆេះ ក្រុមមនុស្សដែលចូលរួមក្នុងពិធីហាត់ស៊ាំចុងក្រោយនេះ ត្រូវបានជម្លៀសពីខាងក្រៅវិមានសភា ចូលទៅកាន់ទីសុវត្ថិភាពដែលនៅខាងក្នុងអគារ។
ប្រហែលមួយម៉ោងក្រោយពីហេតុការណ៍បានកើតឡើង បម្រាមគោចរនៅតំបន់ Capitol Hill ក៏ត្រូវបានដកចេញ ហើយការហាត់ស៊ាំក៏បានបន្ត ខណៈដែលឧទ្ធម្ភាគចក្រហោះក្រឡឹងពីលើតំបន់អគារវិមានសភាអាមេរិក។ ក្រុមមន្ត្រីឱ្យដឹងថា មិនមានការគំរាមកំហែងណាមួយដល់ប្រជាជន ហើយអគ្គិភ័យនេះក៏មិនបង្កគ្រោះថ្នាក់ដល់ការហាត់ស៊ាំសម្រាប់ពិធីស្បថចូលកាន់តំណែងរបស់លោក Biden ដែលនឹងត្រូវប្រារព្ធឡើងនៅថ្ងៃទី 20 មករាខាងមុខ។
ក៏ប៉ុន្តែ បញ្ហានេះកំពុងតែធ្វើឱ្យមានការព្រួយបារម្ភកាន់តែខ្លាំងចំពោះសន្តិសុខនៅក្នុងរដ្ឋធានីវ៉ាស៊ីងតោន ចាប់តាំងពីព្រឹត្តិការណ៍ហិង្សានៅវិមានសភាបានកើតឡើងកាលពីថ្ងៃទី 6 មករា ដោយសារក្រុមអ្នកគាំទ្រលោក Trump បានសម្រុកចូលកាន់វិមានសភាដោយខុសច្បាប់៕
ប្រភព៖ AP
