ទាហានឥណ្ឌានិងប៉ាគិស្ថាន បានបាញ់ប្រហារគ្នាយ៉ាងខ្លាំងក្លានៅតំបន់ Kashmir បណ្ដាលឱ្យមនុស្សយ៉ាងហោច15នាក់បាត់បង់ជីវិត និងរាប់សិបនាក់ត្រូវរងរបួស។
សារព័ត៌មាន Reuters បានរាយការណ៍ថា ការប្រយុទ្ធគ្នានេះបានកើតឡើងនៅថ្ងៃទី13វិច្ឆិកាកន្លងទៅ នៅក្នុងតំបន់មានជម្លោះ Himalaya, Kashmir។ ជាសរុប មានមនុស្សយ៉ាងហោច15នាក់បានស្លាប់ ក្នុងនោះមានជនស៊ីវិលយ៉ាងតិច10 និងទាហាន5នាក់។ AP បានឱ្យដឹងថា តួលេខអ្នករងរបួសរបស់ភាគីទាំង2 សរុប36នាក់។
Reuters អះអាងថា នេះគឺជាថ្ងៃមួយដែលមានមនុស្សស្លាប់ច្រើនជាងគេនៅក្នុងឆ្នាំនេះ ទាក់ទងនឹងការប៉ះទង្គិចប្រដាប់អាវុធរវាងប្រទេសដែលមានអាវុធប្រល័យលោកដូចគ្នាទាំងពីរនេះ។
មន្ត្រីឥណ្ឌានិយាយថា ការវាយប្រហារគ្នាដោយកាំភ្លើងត្បាល់ និងអាវុធផ្សេងទៀតនៅតាមបណ្ដោយព្រំដែន LoC បានចាប់ផ្ដើមបន្ទាប់ពីកងទ័ពឥណ្ឌាបានរារាំងការរុលចូលរបស់ទាហានប៉ាគិស្ថាននៅភាគខាងជើងតំបន់ Kashmir។
ចំណែកភាគីប៉ាគិស្ថានវិញ និយាយថា ពួកគេបានឆ្លើយតបទៅនឹងការផ្ទុះអាវុធរបស់ភាគីឥណ្ឌា ដែលទីក្រុង Islamabad ចោទប្រកាន់ថា “គ្មានហេតុផល និងផ្ដេសផ្ដាស”។
រាប់សិបឆ្នាំមកហើយ ដែល Kashmir បានក្លាយជាតំបន់ប្រទាញប្រទង់រវាងឥណ្ឌានិងប៉ាគិស្ថាន។ ភាគីទាំងពីរសុទ្ធតែប្រកាសថា តំបន់នេះគឺជាសកម្មសិទ្ធិផ្ដាច់មុខរបស់ពួកគេរៀងៗខ្លួន បើទោះជាពួកគេបានបែងចែកគ្នាកាន់កាប់តំបន់នេះហើយដ៏ដោយ។
ឥណ្ឌានិងប៉ាគិស្ថាន ជាញឹកញាប់បានធ្វើការវាយប្រហារគ្នាយ៉ាងខ្លាំងក្លា ហើយពេលខ្លះថែមទាំងបានបាញ់គ្រាប់រ៉ុកកែតដាក់គ្នាផងដែរនៅតាមបន្ទាត់ព្រំដែនបែងចែក Kashmir ប៉ុន្តែ ការប៉ះទង្គិចគ្នាកាលពីម្សិលមិញនេះ ត្រូវបានគេចាត់ទុកថា ជាករណីធ្ងន់ធ្ងរជាងគេ។ ភាគីទាំងពីរបានចោទគ្នាថា បានផ្លោងគ្រាប់រ៉ុកកែតតម្រង់តំបន់ដែលមានពលរដ្ឋស៊ីវិលរស់នៅ។
សូមបញ្ជាក់ថា ពលរដ្ឋសាមញ្ញជាង40នាក់បានស្លាប់ដោយសារតែការប្រយុទ្ធគ្នារវាងឥណ្ឌានិងប៉ាគិស្ថាន នៅក្នុងឆ្នាំ2020នេះ៕
ប្រភព៖ Reuters
