ក្រុមតារារូបវិទូ ថ្ងៃនេះ (20កក្កដា) បានប្រកាសបង្ហាញអំពីផែនទី3Dមួយដែលស្ដីអំពីចក្រវាលទាំងមូល ដែលនេះត្រូវបានបង្កើតឡើងបន្ទាប់ពីបានវិភាគទៅលើកាឡាក់ស៊ីចំនួនជាង4លាន បូករួមជាមួយនឹង Quasar (quasi-stellar object) ជាច្រើនដែលនៅសែនឆ្ងាយ និងមានពន្លឺខ្លាំងក្លាផងដែរ។
ការប្រឹងប្រែងពីសំណាក់អ្នកវិទ្យាសាស្ត្ររាប់រយនាក់ មកពីវិទ្យាស្ថានស្រាវជ្រាវចំនួន30នៅពាសពេញពិភពលោក បាននាំមកនូវ “រឿងរ៉ាវដ៏ពេញលេញមួយស្ដីអំពីការរីកមាឌរបស់ចក្រវាល” នេះបើតាមសាស្ត្រាចារ្យ Will Percival មកពីសាកលវិទ្យាល័យ Waterloo ក្នុងខេត្ត Ontario ប្រទេសកាណាដា។
នៅក្នុងគម្រោងមួយដែលបានចាប់ផ្ដើមអនុវត្តតាំងពីជាង20ឆ្នាំមុន ក្រុមអ្នកវិទ្យាសាស្ត្របានធ្វើការវាស់វែងដោយប្រើរង្វាស់សុក្រឹតបំផុត ទៅលើប្រវត្តិនៃការរីកមាឌក្នុងរយៈពេលវែងជាទីបំផុត។ ផែនទីចក្រវាលនេះ ត្រូវបានបង្កើតឡើងដោយយោងទៅតាមការសង្កេតថ្មីៗបំផុតក្នុងរយៈពេលជាង6ឆ្នាំរបស់អង្គការសង្កេតតារា Sloan Digital Sky Survey (SDSS) នៅក្នុងគម្រោងមួយដែលមានឈ្មោះថា eBOSS ជាមួយនឹងទិន្នន័យដែលបានមកពីកែវយឹតអុបទិកមួយដែលមានទីតាំងនៅ New Mexico សហរដ្ឋអាមេរិក។
មនុស្សជាតិបានយល់ដឹងច្រើនអំពីចក្រវាលនៃយុគសម័យដំបូងក្រោយការផ្ទុះ Big Bang តាមរយៈរូបមន្តនៃទ្រីស្ដី និងការសង្កេតទៅលើរលកមីក្រូវ៉េវនៃចក្រវាល ដែលជារលកវិទ្យុសកម្មអេឡិចត្រូម៉ាញេទិកពីអវកាសជំនាន់ដំបូង។ ការសិក្សាស្រាវជ្រាវអំពីកាឡាក់ស៊ី និងទិន្នន័យនៃការវាស់វែងគម្លាតរវាងវត្ថុអវកាសនានាក៏បានរួមចំណែកក្នុងការជួយឱ្យអ្នកវិទ្យាសាស្ត្រយល់កាន់តែច្បាស់អំពីការរីកមាឌរបស់ចក្រវាលក្នុងរយៈពេលរាប់ពាន់លានឆ្នាំផងដែរ។ សាស្ត្រាចារ្យ Kyle Dawson មកពីសាកលវិទ្យាល័យ Utah ដែលជាអ្នកប្រកាសឧទ្ទេសនាមផែនទីនេះ បានឱ្យដឹងថា អ្នកវិទ្យាសាស្ត្រនៅតែមានចន្លោះប្រហោងមួយត្រូវការបកស្រាយបំពេញបន្ថែម។ ប៉ុន្តែ លោកថ្លែងថា “តាមរយៈការសង្កេតជាប្រចាំក្នុងរយៈពេល5ឆ្នាំមកនេះ យើងបានធ្វើការដើម្បីបំពេញចន្លោះប្រហោងនោះ”។
តារារូបវិទូ Jean-Paul Kneib មកពីមន្ទីរស្រាវជ្រាវរបស់ស្វីស (EPFL) ដែលជាស្ថាបនិកនៃគម្រោង eBOSS ឆ្នាំ2012 បានឱ្យដឹងថា គោលដៅរបស់ក្រុមស្រាវជ្រាវនេះគឺដើម្បីបង្កើត “ផែនទី3D ពេញលេញបំផុតនៃប្រវត្តិសាស្ត្រចក្រវាលទាំងមូល”។ ជាលើកដំបូង ពួកគេប្រើប្រាស់អាចម៍ផ្កាយ ឬវត្ថុអវកាសទាំងឡាយដើម្បីបង្ហាញអំពីការពង្រាយខ្លួនរបស់វត្ថុធាតុក្នុងចក្រវាលនៅក្នុងកាឡាក់ស៊ីនានាដែលកំពុងបង្កបង្កើតផ្កាយ និង Quasar ដែលនៅឆ្ងាយសែនឆ្ងាយពីប្រព័ន្ធព្រះអាទិត្យរបស់មនុស្ស។
ផែនទីនេះក៏បង្ហាញអំពីសរសៃវត្ថុធាតុ និងលម្ហអវកាសនានាដែលកំណត់រចនាសម្ព័ន្ធចក្រវាលតាំងពីយុគសម័យដែលវាមានអាយុត្រឹមតែ380,000ឆ្នាំ។
ផែនទីនេះក៏បានបង្ហើបអំពីការរីកមាឌរបស់ចក្រវាល ដែលចាប់ផ្ដើមបង្កើនល្បឿននៅក្នុងពេលវេលាមួយផងដែរ។ ក្រុមអ្នកវិទ្យាសាស្ត្រយល់ថា ប្រការនេះទំនងជាបណ្ដាលមកពីវត្តមានរបស់ថាមពលងងឹត ប៉ុន្តែប្រភពរបស់វានៅមិនទាន់ត្រូវបានយល់ច្បាស់នៅឡើយ៕
ប្រភព៖ សារព័ត៌មានបរទេស