ទីក្រុង Houston ដែលជាទីកំណើតរបស់ George Floyd បានប្រារព្ធពិធីហែក្បួនដើម្បីរំឭកវិញ្ញាណក្ខន្ធបុរសស្បែកខ្មៅដែលត្រូវបានប៉ូលិសសង្កត់កស្លាប់កាលពីពេលថ្មីៗនេះ ដោយមានមនុស្សចូលរួមប្រមាណ 60,000នាក់។
ពិធីហែក្បួនរំឭក និងគោរពវិញ្ញាណក្ខន្ធរបស់ George Floyd ត្រូវបានធ្វើឡើងនៅទីក្រុង Houston រដ្ឋ Texas កាលពីថ្ងៃទី2មិថុនា ដោយមានការជួយជ្រោមជ្រែងពីសិល្បករល្បីឈ្មោះក្នុងតំបន់ នោះគឺអ្នកចម្រៀង Rapper ឈ្មោះ Trae Tha Truth ដែលជាមិត្តជិតស្និទ្ធរបស់ Floyd និងអ្នកចម្រៀង Bun B។ អភិបាលក្រុង និងអធិការនគរបាលក្រុង Houston ក៏បានចូលរួមផងដែរ។
George Floyd បានរស់នៅអស់រយៈពេល46ឆ្នាំក្នុងតំបន់ដែលភាគច្រើនសុទ្ធតែជាជនជាតិស្បែកខ្មៅ នៅទីក្រុង Houston ដែលមានចម្ងាយពីកន្លែងប្រារព្ធពិធីរំឭកវិញ្ញាណក្ខន្ធប្រមាណជា2គីឡូម៉ែត្រ។ George Floyd ទៅធ្វើការនិងរស់នៅក្នុងទីក្រុង Minneapolis រដ្ឋ Minnesota បានមួយរយៈពេលខ្លីប៉ុណ្ណោះ។
“យើងនឹងជំនួសមុខឱ្យគាត់ (George Floyd)។ យើងនឹងហែកកម្ទេចប្រព័ន្ធនេះពីក្រៅទៅក្នុង។ George Floyd កំពុងតែសម្លឹងពីលើមើលមកយើង ហើយគាត់កំពុងញញឹម” Trae Tha Truth និយាយនៅចំពោះមុខមហាជនដែលប្រមូលផ្ដុំគ្នានៅខាងមុខ។
បន្ទាប់ពីពិធីបួងសួង ក្រុមមនុស្សបានចាកចេញពីតំបន់សួនច្បារ ឆ្ពោះទៅកាន់សាលាក្រុង។ Sheila Jackson Lee ដែលជាតំណាងរាស្ត្រមកពីបក្សប្រជាធិបតេយ្យ នៅតំបន់ដែល Floyd រស់នៅ បានប្រកាសថា នឹងស្នើបង្កើតច្បាប់កែទម្រង់កងកម្លាំងនគរបាលនៅថ្ងៃទី4មិថុនាខាងមុខ ដើម្បីរំឭកដល់វិញ្ញាណក្ខន្ធរបស់ Floyd។
អភិបាលក្រុង Houston លោក Sylvester Turner ដែលជាបុរសស្បែកខ្មៅម្នាក់ដែរនោះ ថ្លែងថា លោកយល់អំពីការឈឺចាប់របស់ពួកគេ ហើយពួកគេកំពុងធ្វើឱ្យមានផលប៉ះពាល់។ “យើងមិនត្រឹមតែស្ដាប់នោះទេ តែយើងត្រូវតែធ្វើសកម្មភាព។ ខ្ញុំចង់ឱ្យអ្នករាល់គ្នាដឹងថា ការហែក្បួន និងការធ្វើបាតុកម្មរបស់អ្នករាល់គ្នា មិនមែនគ្មានប្រយោជន៍នោះឡើយ”។
ទីក្រុង Houston ហាក់ដូចមិនមានបាតុកម្មហិង្សាកើតឡើងដូចទៅនឹងទីក្រុងផ្សេងៗនៅសហរដ្ឋអាមេរិកនោះទេ។ David Hill ដែលជាគ្រូអាចារ្យ និងជាសកម្មជនសង្គមម្នាក់នៅទីក្រុង Houston ដែលបានស្គាល់ច្បាស់អំពីគ្រួសាររបស់ Floyd បានថ្លែងថា “អ្នកដែលបានស្គាល់ George Floyd បានជួយបង្កើតបរិយាកាសសម្រាប់ Houston។ George Floyd ជាមនុស្សស្លូតត្រង់ និងជាមនុស្សផ្អែមល្ហែមម្នាក់”។
Floyd បានស្លាប់ដោយសារ “បេះដូង និងសួតលែងដំណើរការ ព្រោះតែត្រូវប៉ូលីសចាប់ក្រៀក និងសង្កត់ក” កាលពីថ្ងៃទី25ឧសភា នៅពេលត្រូវបានចាប់ខ្លួនពីបទចាយលុយក្លែងក្លាយ។ ហេតុការណ៍នេះបាននាំឱ្យមានបាតុកម្មជាច្រើនកើតឡើងនៅក្នុងទីក្រុងយ៉ាងតិចចំនួន140នៅសហរដ្ឋអាមេរិក ដើម្បីទាមទារយុត្តិធម៌ជូន Floyd៕
ប្រភព៖ សារព័ត៌មានបរទេស