ទាហានរាប់រយនាក់បានចូលរួមក្នុងហេតុការណ៍ប៉ះទង្គិចគ្នាមួយនៅព្រំដែនចិន និងឥណ្ឌា នៅតំបន់ Himalaya បណ្ដាលឱ្យទាហានទាំងសងខាងជាច្រើនរូប ត្រូវរងរបួស។
មន្ត្រីយោធាឥណ្ឌាមួយរូបសុំមិនបញ្ចេញឈ្មោះ បានឱ្យដឹងថា “ទាហានឥណ្ឌា4នាក់ និងទាហានចិន7នាក់ ត្រូវរងរបួសនៅក្នុងហេតុការណ៍ប្រតាយប្រតប់គ្នាមួយដែលមានទាហាន150នាក់ប៉ះទង្គិចគ្នា”។ មន្ត្រីទាហានរូបនេះនិយាយថា ហេតុការណ៍នេះគឺជាការប៉ះទង្គិចគ្នាដ៏សាហាវ។
ប្រភពព័ត៌មានពីកងទ័ពឥណ្ឌាក៏បានបញ្ជាក់ថា ការប៉ះទង្គិចគ្នានៅព្រំដែន ពិតជាបានកើតមានឡើងនៅភាគខាងជើងតំបន់Sikkim និងបានបណ្ដាលឱ្យទាហានទាំងសងខាងរងរបួស។
សារព័ត៌មាន ANI និង Hindustan Times បានរាយការណ៍ថា ហេតុការណ៍ប្រតាយប្រតប់គ្នានេះត្រូវបានដោះស្រាយរួចហើយដោយមន្ត្រីថ្នាក់ក្រោមនៅមូលដ្ឋាន។
កន្លងមក ប្រទេសចិន និងឥណ្ឌា ធ្លាប់មានការប៉ះទង្គិចបែបនេះជាច្រើនលើក ទាក់ទិននឹងបញ្ហាព្រំដែន។ ការប៉ះទង្គិចគ្នាបែបនេះ ជួនកាលកើតឡើងទូទាំងបន្ទាត់ព្រំដែនរវាងប្រទេសទាំងពីរផងដែរ។
ទីក្រុងប៉េកាំង និងទីក្រុងនីវដេលីបានបើកកិច្ចប្រជុំជាច្រើនលើកជាមួយគ្នាដើម្បីដោះស្រាយបញ្ហាព្រំដែន។ កាលពីខែធ្នូឆ្នាំ2019 ប្រទេសទាំងពីរបានយល់ព្រមបង្កើតខ្សែទូរស័ព្ទសំខាន់មួយដើម្បីចៀសវាងការប៉ះទង្គិចគ្នានៅតាមបន្ទាត់ព្រំដែននៃប្រទេសទាំងពីរ៕
ប្រភព៖ សារព័ត៌មានបរទេស
