លោក ពីធើរ ណាវ៉ារ៉ូ ទីប្រឹក្សាផ្នែកពាណិជ្ជកម្មរបស់លោកប្រធានាធិបតី ដូណាល់ ត្រាំ បានចេញមកចោទប្រទេសចិនថា អាចមានចេតនាបិទបាំងព័ត៌មានពាក់ព័ន្ធនឹងការឆ្លងរាលដាលរបស់មេរោគកូរ៉ូណាប្រភេទថ្មី ក្នុងរយៈចាប់ផ្ដើមដំបូង “ដើម្បីផលប្រយោជន៍ខាងពាណិជ្ជកម្ម” ដោយសង្ឃឹមថា នឹងក្លាយជាអ្នកផលិតវ៉ាក់សាំងការពារមេរោគមួយនេះបានមុនគេ។ នេះបើតាមសេចក្ដីរាយការណ៍ព័ត៌មានរបស់ រ៉យទ័រ។
សហរដ្ឋអាមេរិក ដែលខណៈពេលនេះ បានក្លាយជាប្រទេសមួយដែលកំពុងរងទុក្ខទោសយ៉ាងធ្ងន់ធ្ងរបំផុតដោយសារជំងឺរាតត្បាតដ៏ធំ(Pandemic) កូវីដ-19 ធ្លាប់បានអំពាវនាវជាច្រើនលើក ឱ្យក្រុងប៉េកាំង ចែករំលែកព័ត៌មានពាក់ព័ន្ធនឹងវីរុសមរណៈ ដែលរាតត្បាតក្នុងទីក្រុងវូហានដំបូងគេ។
លោក ណាវ៉ារ៉ូ បានផ្ដល់បទសម្ភាសជាមួយទីភ្នាក់ងារព័ត៌មាន Fox Business កាលពីថ្ងៃម្សិលមិញ(ទី20មេសា)ថា៖ “មូលហេតុមួយ ដែលពួកគេមិនអនុញ្ញាតឱ្យយើងចូលទៅ និងមិនចែករំលែកព័ត៌មានពាក់ព័ន្ធនឹងមេរោគវីរុសនេះតាំងពីដំបូង អាចដោយសារតែពួកគេត្រូវការផលិតវ៉ាក់សាំងឱ្យបានមុនអ្នកណាទាំងអស់ និងមើលឃើញថា នេះគឺជាការប្រកួតប្រជែងខាងពាណិជ្ជកម្ម ជាសំណើខាងធុរកិច្ច ដែលនឹងជួយឱ្យពួកគេលក់វ៉ាក់សាំងនេះទូទាំងពិភពលោក”
“តែយើងនឹងធ្វើឱ្យពួកគេបរាជ័យ យើងនឹងឈ្នះពួកគេដោយការដឹកនាំរបស់លោកប្រធានាធិបតីត្រាំ…យើងនឹងឈ្នះពួកគេ ព្រោះក្រសួងសាធារណៈសុខាភិបាល និងសេវាកម្មសុខភាពមនុស្សរបស់យើង មានអ្នកផលិតដល់ទៅ 5នាក់ ដែលកំពុងប្រជែងគ្នាស្វែងរកវ៉ាក់សាំងការពារវីរុសមួយនេះនាពេលនេះ”
លោក ដូណាល់ ត្រាំ បានតែងតាំងលោក ណាវ៉ារ៉ូ ដែលជាអ្នករិះគន់ចិនដ៏ចំណាប់ម្នាក់ ឱ្យមើលការខុសត្រូវខាងផ្នែកការចាត់ចែងស្វែងរកវត្ថុធាតុដើមផ្សេងៗ ដើម្បីតស៊ូនឹងការឆ្លងរាលដាលរបស់កូវីដ-19។
រហូតមកដល់ពេលនេះ នៅមិនទាន់មានថ្នាំព្យាបាល ឬវ៉ាក់សាំងណាមួយដែលឆ្លងផុតការពិសោធអះអាងថា អាចការពារមេរោគកូវីដ-19 បាននៅឡើយ។
តាមរយៈមូលដ្ឋានព័ត៌មានរបស់មហាវិទ្យាល័យ ចន ហប់គីនស៍ កាលពីវេលាម៉ោង 10.00នាទី ព្រឹកថ្ងៃនេះ(ទី21មេសា)បានឱ្យដឹងថា ទូទាំងពិភពលោក មានអ្នកឆ្លងមេរោគវីរុសនេះ កើនឡើងសរុប 2.47លាននាក់ ស្លាប់រួចហើយមិនតិចជាង 170,000នាក់ឡើយ ដោយសហរដ្ឋអាមេរិក មានចំនួនអ្នកឆ្លងសរុប 786,000នាក់ និងស្លាប់ជាង 41,100នាក់ រួចទៅហើយ។
រដ្ឋបាលសហរដ្ឋអាមេរិក បានធ្វើកិច្ចព្រមព្រៀងជាមួយក្រុមហ៊ុន ចនសុន អ៊ែន ចនសុន និងក្រុមហ៊ុន ម៉ូឌើណា អ៊ិងខ៍ និងកំពុងស្ថិតក្នុងអំឡុងការចរចាជាមួយក្រុមហ៊ុនយ៉ាងតិច 2ទៀត ដើម្បីឱ្យពួកគេត្រៀមផលិតវ៉ាក់សាំងការពារវីរុសកូរ៉ូណាប្រភេទថ្មីឱ្យបានក្នុងបរិមាណច្រើនៗ ទោះជាពិភពលោកនៅមិនទាន់រកឃើញវ៉ាក់សាំងដែលមានសុវត្ថិភាព និងមានប្រសិទ្ធភាពពិតប្រាកដនៅឡើយក៏ដោយ។
អ្នកជំនាញការផ្នែកសាធារណៈសុខាភិបាលទូទាំងពិភពលោកជឿថា យ៉ាងលឿនបំផុត អាចនឹងត្រូវរង់ចាំដល់ឆ្នាំ2021ឯណោះ ទម្រាំនឹងវ៉ាក់សាំងការពារវីរុសកូវីដ-19 ត្រៀមរួចរាល់ក្នុងការប្រើការបានពិតប្រាកដ ដោយសារតែត្រូវមានការសាកល្បងលើមនុស្សយ៉ាងទូលំទូលាយ រហូតជឿជាក់លើប្រសិទ្ធភាព និងសុវត្ថិភាពជាមុនសិន។
ចំណែកឯរដ្ឋបាលចិនវិញ ក៏បានអនុម័តឱ្យនាំយកវ៉ាក់សាំងគំរូដើម ទៅធ្វើការសាកល្បងលើមនុស្សរួចមកហើយ យ៉ាងតិចក៏ 3គំរូដែរ។
សារព័ត៌មាន ប៉ាក់គីង ដេលី បានអះអាងលើព័ត៌មានពីអគ្គនាយកមជ្ឈមណ្ឌលគ្រប់គ្រងរោគរបស់ប្រទេស ដែលបានបញ្ជាក់ថា ប្រទេសចិនអាចនឹងសាកល្បងផ្ដល់វ៉ាក់សាំងទៅលើក្រុមមនុស្សមួយចំនួន ដូចជាធនធានមនុស្សខាងវេជ្ជសាស្ត្រជាដើម ក្នុងអំឡុងចុងឆ្នាំនេះ។
លោក ម៉ៃក៍ ប៉ុមប៉េអូ រដ្ឋមន្ត្រីក្រសួងការបរទេសនៃសហរដ្ឋអាមេរិក បានចេញមកដាក់សម្ពាធលើប្រទេសចិន ឱ្យថ្លែងពីព័ត៌មានខាងផ្នែកការតស៊ូប្រឆាំងវីរុសយ៉ាងច្បាស់លាស់ ខណៈដែលប្រទេសចិន ក៏បានអះអាងរួចហើយថា ខ្លួនមិនបានលាក់បាំងអ្វីឡើយ និងនៅតែរិះគន់ពួកមន្ត្រីអាមេរិកាំងដែលចេញមកដាក់សំណួរបែបនេះដែរ។
ប្រភព៖ សារព័ត៌មានបរទេស
