នៅក្នុងផ្នែកនៃកម្មវិធីដំណើរការផ្សាយពាណិជ្ជកម្មរបស់ Facebook ប្រជុំកោះចំនួន2 គឺ Spratly និង Paracel ត្រូវបានលុបចេញពីផែនទីវៀតណាម ហើយប្រមូលវាទៅភ្ជាប់ជាមួយនឹងប្រទេសចិន។
កាលពីយប់ថ្ងៃទី15មេសា អ្នកលេងបណ្ដាញសង្គមបានប្រទះឃើញ Facebook បានប្រើប្រាស់ផែនទីមិនត្រឹមត្រូវស្ដីអំពីកម្មសិទ្ធិរបស់ប្រជុំកោះ Truong Sa, Hoang Sa (Spratly និង Paracel)។ ជាក់ស្ដែង ក្នុងផ្នែកបង្កើតការផ្សាយពាណិជ្ជកម្ម នៅពេលគេចុចកំណត់យកតំបន់វៀតណាម គេនឹងមិនបានឃើញប្រជុំកោះទាំង2ខាងលើនេះទេនៅលើផែនទី។ ប៉ុន្តែ នៅពេលគេកំណត់យកតំបន់ប្រទេសចិន គេឃើញមានប្រជុំកោះទាំង2នេះ។ នេះបើតាមសារព័ត៌មានវៀតណាម VNexpress ចេញផ្សាយក្នុងថ្ងៃនេះ។
លោក Le Quang Tu Do អនុប្រធាននាយកដ្ឋានផ្សព្វផ្សាយនិងព័ត៌មានអេឡិចត្រូនិកនៃក្រសួងព័ត៌មានវៀតណាម បានឱ្យដឹងថា នាយកដ្ឋាននេះបានស្នើឱ្យ Facebook កែប្រែឡើងវិញ។ លោកថ្លែងថា “ពួកគេ (Facebook) បានត្រួតពិនិត្យ និងបានរាយការណ៍ថា នេះគឺជាកំហុសនៅពេលធ្វើបច្ចុប្បន្នភាពផែនទី”។
អ្នកប្រើប្រាស់បណ្ដាញសង្គមនៅវៀតណាម កំពុងតែអំពាវនាវឱ្យ Facebook កែប្រែកំហុសនេះឱ្យបានត្រឹមត្រូវ។ អ្នកលេងអ៊ីនធើណិតខ្លះ បានចូលទៅកាន់ App Store និង CH Play ដើម្បីបញ្ចេញមតិត្រឡប់ (Feedback) លើបញ្ហានេះ។ សាធារណៈមតិនៅប្រទេសវៀតណាមកំពុងតែអំពាវនាវគ្នា ឱ្យចូលទៅដាក់ចំណាត់ថ្នាក់ (vote) ផ្កាយ1ឱ្យ Facebook ផងដែរ។
“Facebook កំពុងតែប្រើប្រាស់ផែនទី Openstreetmap ដែលអភិវឌ្ឍដោយក្រុមទី3។ នេះគឺជាផែនទីប្រភេទបើក ចំហ (Open source) ដែលគេអាចកែប្រែទិន្នន័យបាន។ ផែនទីខាងលើនេះ ត្រូវបានកែប្រែកាលពី4ថ្ងៃមុន ដោយគណនីឈ្មោះ Kalc” នេះបើតាមការឱ្យដឹងពីអ្នកលេងបណ្ដាញសង្គម ឈ្មោះ Cuong Nguyen។
ក្រោយមកបន្តិច អ្នកលេង Facebook ម្នាក់ទៀត បានចូលទៅកាន់ផែនទី និងបាន “យក” Spratly និង Paracel ត្រឡប់មកជាកម្មសិទ្ធិរបស់វៀតណាមវិញ។ ប៉ុន្តែ មកដល់ព្រឹកថ្ងៃទី16មេសានេះ ម្ចាស់កម្មសិទ្ធិលើ Spratly និង Paracel លែងជារបស់វៀតណាមម្ដងទៀត នៅពេលគេកំណត់តំបន់វៀតណាម ដោយសារតែមានមនុស្សម្នាក់បានចូលទៅកែប្រែចំណុចនេះ។
បច្ចុប្បន្ន តំណាង Facebook ប្រចាំនៅប្រទេសវៀតណាម មិនទាន់បានបញ្ចេញមតិជុំវិញបញ្ហានេះនៅឡើយ។ កាលពីឆ្នាំ2018 អ្នកលេង Facebook នៅវៀតណាមក៏បានរកឃើញករណីដូចគ្នានេះដែរ ប៉ុន្តែ តំណាង Facebook បាននិយាយថា នេះជាកំហុសបច្ចេកទេស ហើយក៏បានកែឡើងវិញ។
នាយករដ្ឋមន្ត្រីវៀតណាម លោក Nguyen Xuan Phuc ធ្លាប់បានស្នើឱ្យក្រសួងព័ត៌មានប្រទេសនេះ គ្រប់គ្រងឱ្យបានត្រឹមត្រូវលើបញ្ហាខាងលើរបស់ Facebook។
សូមបញ្ជាក់ថា បច្ចុប្បន្ន ប្រជុំកោះ Spratly និង Paracel កំពុងត្រូវបានទាមទារជាកម្មសិទ្ធិដោយបណ្ដាប្រទេសដែលនៅជុំវិញប្រជុំកោះទាំងនេះ មានដូចជាប្រទេសចិន វៀតណាម ហ្វីលីពីន និងប៊្រុយណេ ជាដើម៕
ប្រភព៖ សារព័ត៌មានបរទេស
