ក្នុងពេលដែលឥណ្ឌាកំពុងអបអរសាទរចំពោះយានអវកាសចន្ទ្រាយាន-3 (Chandrayaan-3) ចុះចតបានជោគជ័យកាលពីថ្ងៃទី 23 សីហា 2023 នាយករដ្ឋមន្ត្រីប្រទេសនេះបញ្ជាក់ថា ឥណ្ឌាគ្រោងនឹងនាំមនុស្សឡើងទៅកាន់ឋានព្រះចន្ទនាពេលដ៏ខ្លីខាងមុខ។
ស្ថានីយចុះចត Vikram របស់យានអវកាសចន្ទ្រាយាន-3 បានឆ្លងផុតរាល់ឧបសគ្គដើម្បីចុះចតក្បែរប៉ូលខាងត្បូងរបស់ព្រះចន្ទកាលពីព្រលប់ថ្ងៃទី 23 សីហា នាំឱ្យឥណ្ឌាក្លាយជាប្រទេសដំបូងគេលើពិភពលោកមានយានចុះចតលើតំបន់នេះ និងជាប្រទេសទីបួនដែលមានយានចុះចតលើឋានព្រះចន្ទ បន្ទាប់ពីសូវៀត អាម៉េរិក និងចិន។
យោងទៅលើជោគជ័យរបស់ចន្ទ្រាយាន-3 ឥណ្ឌានឹងបន្តបោះជំហានទៅមុខ តាមរយៈការបាញ់បង្ហោះយានដឹកមនុស្សដំបូងទៅកាន់ឋានព្រះចន្ទ។ «ឥណ្ឌាកំពុងស្ថិតនៅលើឋានព្រះចន្ទ» នាយករដ្ឋមន្ត្រីឥណ្ឌា លោក Narendra Modi ថ្លែងអំពីការចុះចតលើឋានព្រះចន្ទកាលពីម្សិលមិញដូច្នេះ។ លោក Modi បន្ថែមថា ប្រទេសនេះនឹងពិនិត្យមើលលទ្ធភាពបង្កើតបេសកកម្មមានមនុស្សនាពេលខាងមុខ។
យោងតាម Times of India មុននោះ ឥណ្ឌាក៏បានប្រកាសអំពីគម្រោងនៃបេសកកម្មមានអវកាសចរនៅលើគន្លងតារាវិថីផែនដីសម្រាប់ឆ្នាំ 2024 បន្ទាប់ពីការបាញ់បង្ហោះយានគ្មានមនុស្ស Gaganyaan-1 និង Gaganyaan-2 ឡើងទៅកាន់ទីអវកាសនៅចុងឆ្នាំ 2023 នេះ។
គិតមកដល់បច្ចុប្បន្ន ពលរដ្ឋឥណ្ឌាដំបូងគេ និងតែម្នាក់គត់ដែលធ្លាប់បានហោះឡើងទៅកាន់ទីអវកាស នោះគឺអវកាសចរ Rakesh Sharma។ ឆ្នាំ 1982 Sharma ត្រូវបានជ្រើសរើសសម្រាប់បេសកកម្មអវកាសរវាងសូវៀត និងឥណ្ឌា។ ថ្ងៃទី 03 មេសា 1984 លោក Sharma រួមនឹងអ្នកអវកាសសូវៀតពីររូបទៀតបានឡើងទៅកាន់ស្ថានីយអវកាស Salyut 7 តាមរយៈយាន Soyuz T-11 ដើម្បីធ្វើការពិសោធមួយចំនួន។ ក្រោយពីចប់បេសកកម្ម អ្នកអវកាសខាងលើក៏បានចុះចតលើទឹកដីកាហ្សាក់ស្ថាននៅថ្ងៃទី 11 មេសា 1984៕
