ផ្កាមួយប្រភេទនេះត្រូវបានចាត់ទុកដូចទៅនឹងត្បូងពេជ្រពណ៌សនៃវិស័យឧស្សាហកម្មផលិតទឹកអប់ ដោយសារតែសារធាតុប្រេងរបស់វាអាចជួយឱ្យរោងចក្ររកប្រាក់ចំណូលបានប្រហែល 17,000,000 រៀល ក្នុងមួយលីត្រ។
ផ្កាម្លិះត្រូវបានប្រដូចទៅនឹង «ត្បូងពេជ្រពណ៌ស» របស់វិស័យឧស្សាហកម្មទឹកអប់។ ក្លិនក្រអូបរបស់វាសាយភាយពេញបរិយាកាសចំការ នៅពេលកសិករនៅឥណ្ឌានាំគ្នាប្រមូលផល។ ផ្កាដែលស្រស់បំផុតត្រូវបានជ្រើសយក និងកែច្នៃជាមឋមដើម្បីឱ្យក្លាយជាវត្ថុធាតុសម្រាប់ការផលិតទឹកអប់គុណភាពខ្ពស់ច្រើនប្រភេទនៅលើពិភពលោក។ នេះបើតាមទំព័រ The New Indian Express។
នៅទីក្រុង Madurai ក្នុងភាគខាងត្បូងប្រទេសឥណ្ឌា ផ្កាម្លិះគុណភាពខ្ពស់មានវត្តមាននៅពាសពេញតំបន់។ ពួកវាទាក់ទាញបានអ្នកផ្គត់ផ្គង់ទឹកអប់ល្បីៗលំដាប់កំពូលលើពិភពលោក មានដូចជា Jádore by Dior ឬ Mon Guerlain ជាដើម។
![](https://i0.wp.com/lareine.com.kh/wp-content/uploads/2023/08/lareine.com.kh-2023-08-22_11-13-03_131681.jpg?resize=696%2C405&ssl=1)
លោក Raja Palaniswamy ប្រធានក្រុមហ៊ុនចម្រាញ់ប្រេងពីផ្កាម្លិះ Jasmine Concrete ឱ្យដឹងថា ប្រេងរបស់ផ្កានេះគឺជាមួយក្នុងចំណោមប្រេងផ្កាដែលថ្លៃបំផុតក្នុងពិភពលោក។
ក្រោយពីត្រូវបានបេះពីដើម ផ្កាម្លិះនឹងត្រូវបានលក់ពី 200 ទៅ 2,000 រូពីឥណ្ឌា (ប្រហែលពី 10,000 ទៅ 100,000 រៀល) ក្នុងមួយគីឡូក្រាម អាស្រ័យលើគុណភាព។ ប៉ុន្តែនេះគ្រាន់តែជាតម្លៃរបស់ផ្កាម្លិះស្រស់ប៉ុណ្ណោះ។
ផ្កាម្លិះដែលទើបតែត្រូវបានបេះនឹងត្រូវត្រាំក្នុងសារធាតុរំលាយម្យ៉ាងដើម្បីបង្កើតបានជាប្រេងពិសេសមួយប្រភេទ បន្ទាប់មកគេប្រើប្រាស់អាល់កុលដើម្បីចម្រាញ់ចោលកាក និងយកសារធាតុប្រេងសុទ្ធ ដែលជាវត្ថុធាតុសម្រាប់ការផលិតទឹកអប់។
![](https://i0.wp.com/lareine.com.kh/wp-content/uploads/2023/08/lareine.com.kh-2023-08-22_11-06-26_424084.jpg?resize=696%2C478&ssl=1)
លោក Palaniswamy ឱ្យដឹងថា គេត្រូវការផ្កាម្លិះស្រស់រហូតដល់ 700 គីឡូក្រាម ទើបអាចចម្រាញ់យកសារធាតុប្រេងម្លិះសុទ្ធបានមួយលីត្រ។ ប្រេងម្លិះសុទ្ធត្រូវបានលក់ក្នុងតម្លៃប្រហែល 4,200 ដុល្លារអាម៉េរិក (ប្រហែលនឹង 17,300,000 រៀល) ក្នុងមួយលីត្រ។
![](https://i0.wp.com/lareine.com.kh/wp-content/uploads/2023/08/lareine.com.kh-2023-08-22_11-14-12_527927.jpg?resize=696%2C684&ssl=1)
កំហាប់ប្រេងម្លិះកាន់តែខ្ពស់ ទឹកអប់ក៏នឹងកាន់តែមានតម្លៃខ្ពស់ បន្ទាប់ពីត្រូវបានផលិត និងដាក់ចូលដប។ យោងតាមទំព័រ Bellatorty ទឹកអប់ Clive Christian Imperial Majesty ដែលផលិតពីផ្កាម្លិះនៅឥណ្ឌា មានតម្លៃរហូតដល់ 215,000 ដុល្លារអាម៉េរិក (ឬ 888,791,510 រៀល) ក្នុងមួយដប 500 មិល្លីលីត្រ៕