លោកតា Natsuo Nakajima អាយុ 87 ឆ្នាំ បានជូនមាសដុំទម្ងន់ 29 គីឡូក្រាម និងប្លាទីនទម្ងន់ 1 គីឡូក្រាម ដល់អាជ្ញាធរក្រុង Minoh ដើម្បីទិញរថយន្តសង្គ្រោះបន្ទាន់ និងអភិវឌ្ឍវិស័យទេសចរណ៍។
រដ្ឋបាលក្រុង Minoh ខេត្ត Osaka ប្រទេសជប៉ុន កាលពីថ្ងៃទី 20 មិថុនា បានរៀបចំពិធីទទួលដុំមាស និងប្លាទីន តម្លៃសរុប 280 លានយេន (ជិត 2 លានដុល្លារអាម៉េរិក) ពីលោកតា Nakajima បន្ទាប់ពីគាត់ជូនកាលពីខែឧសភា។
«ខ្ញុំចង់ប្រគល់ទៅវិញនូវអ្វីដែលខ្ញុំសន្សំបាននៅ Minoh ក្នុងរយៈពេលជាង 50 ឆ្នាំកន្លងមកនេះ» លោកតា Nakajima មានប្រសាសន៍ដូច្នេះ និងចង់ឃើញរដ្ឋអំណាចប្រើប្រាស់អំណោយនេះដើម្បីទិញរថយន្តសង្គ្រោះបន្ទាន់ និងអភិវឌ្ឍវិស័យទេសចរណ៍។
![](https://i0.wp.com/lareine.com.kh/wp-content/uploads/2023/06/lareine.com.kh-2023-06-21_15-04-45_163671.jpg?resize=696%2C392&ssl=1)
លោកតា Nakajima គឺជាម្ចាស់ហាងលក់សាច់គោមួយដែលបើកទ្វារតាំងពីឆ្នាំ 1960 នៅទីក្រុង Minoh។ បច្ចុប្បន្ន គាត់បានចូលនិវត្តន៍ និងបានប្រគល់មុខរបរនេះឱ្យកូនចៅគ្រប់គ្រងបន្ត។
អភិបាលក្រុង លោក Ueshima បាន «សម្ដែងការគោរពដឹងគុណចំពោះលោកតា Nakajima ដែលបានបរិច្ចាគទ្រព្យដែលជាញើសជាឈាមរបស់ខ្លួន»។ អាជ្ញាធរក្រុងនឹងប្ដូរមាស និងប្លាទីនទាំងនេះទៅជាសាច់ប្រាក់ដើម្បីដាក់ចូលថវិកាជាតិសម្រាប់ការចាត់ចែងនាពេលខាងមុខ៕