ក្រសួងការបរទេសអាម៉េរិក ប្រកាសអំពីខ្ទង់ជំនួយយោធាថ្មីតម្លៃ 400 លានដុល្លារ ទៅឱ្យអ៊ុយក្រែន ក្នុងនោះមានទាំងយានយន្តសម្រាប់កងវិស្វកម្ម រួមនឹងគ្រាប់រំសេវជាច្រើនផ្សេងទៀត។
«កញ្ចប់ជំនួយផ្នែកយោធានេះមានគ្រាប់រ៉ុក្កែត HIMARS និងគ្រាប់សម្រាប់កាំភ្លើងធំដែលផ្គត់ផ្គង់ដោយសហរដ្ឋអាម៉េរិក» ក្រសួងការបរទេសអាម៉េរិក កាលពីថ្ងៃទី 03 មីនា ប្រកាសដូច្នេះ។ ខ្ទង់ជំនួយថ្មីដែលមានតម្លៃ 400 លានដុល្លារនេះធ្វើឱ្យកញ្ចប់ជំនួយយោធាសរុបរបស់អាម៉េរិកសម្រាប់អ៊ុយក្រែន ឡើងដល់ជាង 32 ពាន់លានដុល្លារ គិតចាប់ពីសង្គ្រាមបានផ្ទុះឡើង។
កញ្ចប់ជំនួយខាងលើក៏មានទាំងគ្រាប់ 25 មិល្លីម៉ែត្រសម្រាប់រថពាសដែក M2 Bradley, ឧបករណ៍ថែទាំយានយន្ត គ្រឿងបន្លាស់ និងសម្ភារៈជាច្រើនផ្សេងទៀត។ អាម៉េរិកក៏ផ្ដល់ជាលើកដំបូងនូវ M60 AVLB ដែលប្រព័ន្ធស្ពានចល័តសម្រាប់រថក្រោះ និងរថពាសដែកឆ្លងកាត់ផងដែរ។
សហរដ្ឋអាម៉េរិកប្រកាសកញ្ចប់ជំនួយថ្មីនេះនៅក្នុងគ្រាដែលរុស្ស៊ីកំពុងបង្កើនការវាយប្រហារទៅលើតំបន់ដែលគ្រប់គ្រងដោយអ៊ុយក្រែន ក្នុងនោះមានទីក្រុង Bakhmut នៅក្នុងខេត្ត Donetsk ជាដើម។
បណ្ដាប្រទេសដែលគាំទ្រអ៊ុយក្រែន កំពុងបណ្ដុះបណ្ដាលទាហានរបស់ប្រទេសនេះឱ្យចេះប្រើអាវុធថ្មីៗដែលទីក្រុងកៀវទើបតែបានទទួល។ កងទ័ពអាម៉េរិក កាលពីថ្ងៃទី 02 មីនា បានប្រកាសបើកវគ្គបណ្ដុះបណ្ដាលដល់ទាហានអ៊ុយក្រែននៅមូលដ្ឋាន Wiesbaden ប្រទេសអាល្លឺម៉ង់ ដើម្បីជួយឱ្យពួកគេរៀបផែនការទប់ទល់នឹងកងកម្លាំងរុស្ស៊ី៕
