ប្រធាន FBI យល់ថា កូវីដ-19 អាចមានប្រភពពីករណីបែកធ្លាយបន្ទប់ពិសោធន៍នៅទីក្រុង Wuhan ជាការចោទប្រកាន់ដែលរដ្ឋាភិបាលចិនធ្លាប់បានច្រានចោលជាបន្តបន្ទាប់នាពេលកន្លង។
«ការិយាល័យស៊ើបអង្កេតសហរដ្ឋអាមេរិក (FBI) តាំងពីយូរមកហើយបានវាយតម្លៃលើប្រភពរបស់កូវីដ-19 ថា អាចបណ្ដាលមកពីបញ្ហានៅក្នុងបន្ទប់ពិសោធន៍នៅទីក្រុង Wuhan» ប្រធាន FBI លោក Christopher Wray និយាយដូច្នេះនៅក្នុងកិច្ចសម្ភាសដែលត្រូវបានផ្សាយកាលពីថ្ងៃទី 28 កុម្ភៈ 2023។ «នៅទីនេះយើងកំពុងនិយាយពីករណីបែកធ្លាយមិនទាន់ឃើញច្បាស់នៅបន្ទប់ពិសោធន៍ដែលគ្រប់គ្រងដោយរដ្ឋាភិបាលចិន»។
លោក Wray ក៏បានចោទរដ្ឋាភិបាលចិនថាបានព្យាយាម «រារាំង និងធ្វើឱ្យមានភាពច្របូកច្របល់» ចំពោះការស៊ើបអង្កេតរបស់ FBI រួមទាំងស្ថាប័នរដ្ឋាភិបាលអាម៉េរិក និងដៃគូសហការបរទេស លើប្រភពរបស់កូវីដ-19។
ទាក់ទិននឹងការអះអាងរបស់ប្រធាន FBI ភាគីរដ្ឋាភិបាលចិនមិនទាន់បញ្ចេញប្រតិកម្មអ្វីនៅឡើយ។
នៅក្នុងរបាយការណ៍មួយដែលត្រូវបានបញ្ជូនឡើងទៅកាន់សេតវិមាន និងសមាជិកសភាកាលពីពេលថ្មីៗនេះ ក្រសួងថាមពលអាម៉េរិក ដែលជាអ្នកគ្រប់គ្រងមូលដ្ឋានស្រាវជ្រាវផ្នែកជីវសាស្ត្រនានា យល់ថា វីរុស nCoV អាចធ្លាយចេញពីបន្ទប់ពិសោធន៍ ប៉ុន្តែមិនទាក់ទងនឹងកម្មវិធីអាវុធ។
ការវាយតម្លៃរបស់ FBI និងក្រសួងថាមពល ត្រូវបានដាក់បញ្ចូលទៅក្នុងរបាយការណ៍សម្ងាត់ ហើយត្រូវបានបញ្ជូនឡើងទៅកាន់សេតវិមាន និងសមាជិកសភាកាលពីដើមឆ្នាំនេះ។ ស្ថាប័នស៊ើបការណ៍សម្ងាត់ចំនួន 4 ផ្សេងទៀត រួមនឹងក្រុមប្រឹក្សាជាតិស៊ើបការណ៍សម្ងាត់របស់សហរដ្ឋអាម៉េរិក នៅតែគាំទ្រសម្មតិកម្មដែលថា វីរុសឆ្លងពីសត្វមកមនុស្ស បើទោះជាមាន «ការជឿជាក់ក្នុងកម្រិតទាប»។
ចំណែកទីភ្នាក់ងារស៊ើបការណ៍សម្ងាត់អាម៉េរិក (CIA) វិញ មិនទាន់វាយតម្លៃចុងក្រោយអំពីប្រភពរបស់កូវីដ-19 ប៉ុន្តែយល់ថា nCoV មិនមែនជាផ្នែកមួយក្នុងកម្មវិធីអាវុធជីវសាស្ត្ររបស់ប្រទេសចិន។
ក្រុមមន្ត្រីចិនកន្លងមកនេះនៅតែច្រានចោលការសន្និដ្ឋានដែលថា កូវីដ-19 អាចធ្លាយចេញពីបន្ទប់ពិសោធន៍របស់ពួកគេ។ ក្រសួងការបរទេសចិន កាលពីថ្ងៃទី 27 កុម្ភៈ 2023 ក៏បានទាត់ចោលការអះអាងរបស់ក្រសួងថាមពលអាម៉េរិក និងបានស្នើឱ្យទីក្រុងវ៉ាស៊ីងតោន «បញ្ឈប់ការមួលបង្កាច់» និង «ការធ្វើនយោបាយូបនីយកម្មលើប្រភពកូវីដ-19»៕
