រដ្ឋាភិបាលចិនបានច្រានចោលការចោទប្រកាន់មកលើប្រទេសនេះថា មានបំណងផ្ដល់អាវុធទៅឱ្យរុស្ស៊ី ហើយថា រាល់ព័ត៌មានចារកម្មរបស់សហរដ្ឋអាម៉េរិកគឺជា «ការសន្និដ្ឋាន»។
«អ្វីដែលគេហៅថាព័ត៌មានចារកម្មនោះ វាគ្រាន់តែជាការស្មាន និងជាការមួលបង្កាច់សំដៅប្រទេសចិន» អ្នកនាំពាក្យក្រសួងការបរទេសចិន Wang Wenbin ថ្លែងនៅថ្ងៃនេះដូច្នេះ។
លោក Wang Wenbin ព្រមានថា ការចោទប្រកាន់នេះមិនត្រឹមតែប៉ះពាល់ដល់ដំណើរការចរចាបញ្ចប់សង្គ្រាមនៅអ៊ុយក្រែនប៉ុណ្ណោះទេ តែក៏ប៉ះពាល់ជាអវិជ្ជមានដល់ទំនាក់ទំនងរវាងចិន-អាម៉េរិកផងដែរ។
ការអះអាងរបស់លោក Wang Wenbin ត្រូវបានធ្វើឡើងបន្ទាប់ពីទំព័រ Wall Street Journal របស់អាម៉េរិក កាលពីថ្ងៃទី 22 កុម្ភៈ ដកស្រង់ប្រភពព័ត៌មានពីមន្ត្រីជាន់ខ្ពស់អាម៉េរិក ឱ្យដឹងថា សហរដ្ឋអាម៉េរិកកំពុងពិចារណាលើលទ្ធភាពនៃការប្រកាសព័ត៌មានចារកម្មដែលថា ប្រទេសចិនអាចបញ្ចប់គោលនយោបាយមិនផ្ដល់អាវុធឱ្យរុស្ស៊ី។
យោងតាមការវាយតម្លៃរបស់ក្រុមមន្ត្រីចារកម្មអាម៉េរិក ប្រទេសចិនកន្លងមកបានផ្ដល់ជំនួយផ្នែកហិរញ្ញវត្ថុ និងទិញប្រេងរបស់រុស្ស៊ី ប៉ុន្តែគោលនយោបាយនោះហាក់កំពុងផ្លាស់ប្ដូរ បើទោះជាទីក្រុងប៉េកាំងមិនទាន់សម្រេចចិត្តចុងក្រោយ។
ប្រទេសចិនគឺជាប្រទេសដែលនាំមុខគេលើពិភពលោក ស្ដីពីការផលិតអាវុធទៅតាមស្ដង់ដាសូវៀត ដែលត្រូវបានប្រើប្រាស់ច្រើននៅក្នុងសង្គ្រាមអ៊ុយក្រែន។ កងទ័ពរុស្ស៊ីត្រូវបានគេជឿថា កំពុងតែខ្វះប្រភពផ្គត់ផ្គង់គ្រាប់រំសេវ បន្ទាប់ពីសង្គ្រាមបានអូសបន្លាយជិតមួយឆ្នាំ។
ក្រុមមន្ត្រីអាម៉េរិក និងអឺរ៉ុបឱ្យដឹងថា ទីក្រុងប៉េកាំងនឹងមិនចាំបាច់ផ្គត់ផ្គង់អាវុធទំនើប ប៉ុន្តែពួកគេអាចផ្ដល់ឱ្យនូវអ្វីដែលវិមានក្រឹមឡាំងកំពុងត្រូវការនៅក្នុងសាមរភូមិអ៊ុយក្រែន៕