ឯកអគ្គរដ្ឋទូតអាម៉េរិកប្រចាំអង្គការសហប្រជាជាតិ Thomas-Greenfield បានព្រមានថា ចិននឹងឆ្លង «បន្ទាត់ក្រហម» បើសិនផ្ដល់អាវុធទៅឱ្យរុស្ស៊ីប្រើប្រាស់នៅអ៊ុយក្រែន។
«យើងត្រូវតែយល់ច្បាស់ថា បើសិនចិន ឬប្រទេសណាមួយមានគំនិត បំណងផ្ដល់អាវុធឱ្យកម្លាំងរុស្ស៊ីប្រើប្រាស់នៅសមរភូមិអ៊ុយក្រែន នោះគឺជាប្រការដែលមិនអាចទទួលយកបាន។ នោះគឺជាបន្ទាត់ក្រហម» អគ្គរដ្ឋទូតអាម៉េរិកប្រចាំអង្គការសហប្រជាជាតិ Thomas-Greenfield បានប្រាប់ CNN កាលពីថ្ងៃទី 19 កុម្ភៈដូច្នេះ។
នៅពេលត្រូវបានសួរថា ចិននឹងត្រូវទទួលរងផលវិបាកអ្វីខ្លះ បើសិនផ្ដល់អាវុធទៅឱ្យរុស្ស៊ី លោកស្រី Thomas-Greenfield ថ្លែងថា វ៉ាស៊ីងតោនមិនប្រកាសមុនអំពីផែនការ ប៉ុន្តែបានជូនដំណឹងដល់ទីក្រុងប៉េកាំងរួចហើយ។
រដ្ឋមន្ត្រីការបរទេសអាម៉េរិក Antony Blinken មុននោះក៏បានឱ្យដឹងថា ចិនទំនងជាកំពុងពិនិត្យលទ្ធភាពផ្ដល់អាវុធទៅឱ្យរុស្ស៊ីប្រើប្រាស់ក្នុងសង្គ្រាមនៅអ៊ុយក្រែន។ លោក Antony ក៏បានព្រមានចិនថា រាល់ឥរិយាបថផ្ដល់អាវុធទៅឱ្យមូស្គូ គឺសុទ្ធតែនឹង «បង្កបញ្ហាធ្ងន់ធ្ងរ»។
ចិនមិនទាន់ប្រតិកម្មចំពោះមតិរបស់អាម៉េរិក ប៉ុន្តែទីក្រុងប៉េកាំងបានអះអាងជាច្រើនលើកមកហើយថា ខ្លួនចង់ជួយបញ្ចប់សង្គ្រាមនៅអ៊ុយក្រែនដោយសន្តិវិធី។
ចិនគឺជាខឿនសេដ្ឋកិច្ចធំជាងគេមួយលើពិភពលោកដែលមានទំនាក់ទំនងស្និទ្ធស្នាលនឹងរុស្ស៊ី ហើយជាប្រទេសដែលមិនដាក់ទណ្ឌកម្មលើទីក្រុងមូស្គូ ទាក់ទិននឹងសង្គ្រាមនៅអ៊ុយក្រែន។
ប្រទេសលោកខាងលិចជាច្រើនបានដាក់សម្ពាធដើម្បីឱ្យចិនប្រើប្រាស់ឥទ្ធិពលរបស់ខ្លួន ជំរុញឱ្យរុស្ស៊ីបញ្ចប់សង្គ្រាមនៅអ៊ុយក្រែន។ ទីក្រុងប៉េកាំងគាំទ្រដំណោះស្រាយសន្តិភាពសម្រាប់សង្គ្រាមនេះ ប៉ុន្តែក៏បានអះអាងជាច្រើនលើកអំពីទំនាក់ទំនងល្អជាមួយមូស្គូ និងមានបំណងលើកកម្ពស់ទំនាក់ទំនងនេះឱ្យឡើងដល់ចំណុចខ្ពស់ថ្មីមួយថែមទៀតផងដែរ៕
