ឈានចូលដល់ឆ្នាំ 2022 ពិភពលោកទាំងមូលហាក់មានក្ដីសង្ឃឹមច្រើន ដោយសារតែកូវីដបានថមថយកម្លាំង ហើយប្រទេសមួយចំនួនក៏បាន និងកំពុងត្រលប់ទៅរកសភាពការណ៍ធម្មតា។ ក៏ប៉ុន្តែ ពិភពលោកក៏ចាប់ផ្ដើមប្រឈមមុខនឹងបញ្ហាធំៗជាច្រើនផ្សេងទៀត ចាប់ពីការផ្ទុះសង្គ្រាមនៅ អ៊ុយក្រែន ភាពតានតឹងនៅច្រកសមុទ្រតៃវ៉ាន់ គ្រោះធម្មជាតិ ហេតុការណ៍បាក់ស្ពាន និងហេតុការណ៍ប្រជ្រៀតគ្នាស្លាប់។ល។
1-សង្គ្រាមរុស្ស៊ី-អ៊ុយក្រែន ផ្ទុះឡើង
ថ្ងៃទី 24 កុម្ភៈ 2022 រុស្ស៊ី បើកយុទ្ធនាការយោធាពិសេសនៅ អ៊ុយក្រែន ដោយវាយសម្រុកចូលកាន់កាប់ភាគខាងកើត និងខាងត្បូង និងរុលទៅរក រដ្ឋធានីកៀវ។
នេះគឺជាសង្គ្រាមធំបំផុតនៅ អឺរ៉ុប នៅក្រោយសង្គ្រាមលោកលើកទីពីរ ហើយបង្កផលប៉ះពាល់ធ្ងន់ធ្ងរដល់ អ៊ុយក្រែន ទ្វីបអឺរ៉ុប និងសកលលោកទាំងមូល។ សង្គ្រាមនេះបានសម្លាប់មនុស្សជាង 20,000 នាក់ និងជិត 8 លាននាក់ត្រូវភៀសខ្លួននៅ អ៊ុយក្រែន ខណៈទាហានរបស់ រុស្ស៊ី ជិត 6,000 នាក់ត្រូវបាត់បង់ជីវិត។
2-ប្រទេសចិនប្រារព្ធមហាសន្និបាតលើទី 20
ក្នុងឆ្នាំ 2022 លោក ស៊ី ជីនពីង បានពង្រីកឥទ្ធិពល និងអំណាចរបស់ខ្លួននៅពេលត្រូវបានជ្រើសរើសជាអគ្គលេខាធិការជាលើកទីបីនៅ មហាសន្និបាតបក្សកុម្មុយនីស្តចិន លើកទី 20 ដែលបានធ្វើឡើងកាលពីខែតុលា 2022។
ដោយសារតែមានឥទ្ធិពលក្នុងវិស័យសេដ្ឋកិច្ច និងនយោបាយរបស់ពិភពលោក ដូច្នេះ មហាសន្និបាតលើកទី 20 របស់ បក្សកុម្មុយនីស្តចិន ទទួលបានការចាប់អារម្មណ៍ច្រើនពីអន្តរជាតិ នៅពេលកំណត់គោលនយោបាយក្នុងស្រុក និងការបរទេស ក្នុងរយៈពេល 5 ឆ្នាំតទៅមុខ។
សហរដ្ឋអាម៉េរិក បោះឆ្នោតពាក់កណ្ដាលអាណត្តិ
កាលពីថ្ងៃទី 08 វិច្ឆិកា 2022 ពលរដ្ឋអាម៉េរិក នាំគ្នាទៅបោះឆ្នោតជ្រើសរើសសមាជិកសភាជាន់ទាបចំនួន 435 រូប, 35 ក្នុងចំណោម 100 កៅអីនៅ សភាជាន់ខ្ពស់, 36 អភិបាលរដ្ឋ រួមនឹងតំណែងជាច្រើនផ្សេងទៀត។ ការបោះឆ្នោតពាក់កណ្ដាលអាណត្តិនេះអាចបញ្ជាក់អំពីនិន្នាការនយោបាយ និងគោលនយោបាយអនាគតរបស់ សហរដ្ឋអាម៉េរិក ក្នុង 2 ឆ្នាំបន្តបន្ទាប់ទៀត ក្រោមការដឹកនាំរបស់ ប្រធានាធិបតី ចូ បៃដិន។
មហាក្សត្រីអង់គ្លេសសោយទិវង្គត
មហាក្សត្រីអង់គ្លេស Elizabeth II បានយាងចូលទិវង្គតនៅរាជដំណាក់ Balmoral នៅ ស្កុតឡែន កាលពីថ្ងៃទី 08 កញ្ញា ក្នុងព្រះជន្ម 96 វស្សា។ ការសោយទិវង្គតនេះបានបញ្ចប់រជ្ជកាលជាង 70 សង្សារបស់មហាក្សត្រីអង្គនេះនៅ ចក្រភពអង់គ្លេស។ ប្រជាជនអង់គ្លេស ចូលរួមគោរពព្រះវិញ្ញាណក្ខន្ធរបស់មហាក្សត្រីក្នុងរយៈពេល 10 ថ្ងៃ។
ប្រធានសភាជាន់ទាបអាម៉េរិក ធ្វើទស្សនកិច្ចកោះតៃវ៉ាន់
ដំណើរទស្សនកិច្ចរបស់ប្រធានសភាជាន់ទាបអាម៉េរិក នៅ កោះតៃវ៉ាន់ កាលពីដើមខែសីហា ធ្វើឱ្យលោកស្រី Nancy Pelosi ក្លាយជាមន្ត្រីជាន់ខ្ពស់បំផុតរបស់ អាម៉េរិក ដែលមកកាន់កោះនេះក្នុងអំឡុង 25 ឆ្នាំកន្លង។ អាជ្ញាធរចិន បានប្រតិកម្មយ៉ាងខ្លាំងក្លាចំពោះដំណើរទស្សនកិច្ចនេះ បណ្ដាលឱ្យច្រកសមុទ្រតៃវ៉ាន់ ឡើងកម្ដៅខ្លាំង។
អតីតនាយករដ្ឋមន្ត្រីជប៉ុន ស៊ីនហ្សូ អាបេ ត្រូវគេធ្វើឃាត
ដោយសារតែគ្រប់គ្រងអាវុធបានល្អ ដូច្នេះ ជប៉ុន គឺជាប្រទេសដែលមានសុវត្ថិភាពល្អខ្លាំង។ ក៏ប៉ុន្តែ ប្រការនេះបានប្រែប្រួលទាំងស្រុងបន្ទាប់ពីអតីតនាយករដ្ឋមន្ត្រីត្រូវបានគេធ្វើឃាតនៅទីសាធារណៈកាលពីថ្ងៃទី 08 កក្កដា។
ជនសង្ស័យ Tetsuya Yamagami ដែលជាអតីតទាហានមួយរូប ប្រើប្រាស់កាំភ្លើងកែច្នៃដោយខ្លួនឯង បាញ់ប្រហារពីក្រោយ ធ្វើឱ្យលោក ស៊ីនហ្សូ អាបេ ត្រូវបាត់បង់ជីវិតក្នុងវ័យ 67 ឆ្នាំ។
ហេតុការណ៍ប្រជ្រៀតគ្នាស្លាប់នៅ កូរ៉េខាងត្បូង
មនុស្សជាង 100,000 នាក់ កាលពីយប់ថ្ងៃទី 29 តុលា បានប្រមូលផ្ដុំគ្នានៅ Itaewon តំបន់កណ្ដាលរដ្ឋធានីសេអ៊ូល ដើម្បីចូលរួមពិធីបុណ្យខ្មោច ហាឡូវីន ជាលើកដំបូងក្រោយការរស់នៅក្រោមសម្ពាធកូវីដ-19 អស់រយៈពេល 2 ឆ្នាំ។ ហេតុការណ៍ប្រជ្រៀតគ្នាក៏បានកើតឡើង និងបានសម្លាប់មនុស្ស 158 នាក់ និងបង្ករបួសដល់មនុស្ស 196 នាក់។
ហេតុការណ៍បាក់ស្ពានយោលនៅ ឥណ្ឌា
នៅថ្ងៃទី 30 តុលា 2022 ស្ពានយោលសម្រាប់ថ្មើរជើងដែលឆ្លងកាត់ទន្លេ Machchhu នៅទីក្រុង Morbi ក្នុងរដ្ឋ Gujarat ប្រទេសឥណ្ឌា បានដាច់ បណ្ដាលឱ្យមនុស្សយ៉ាងតិច 135 នាក់ត្រូវបាត់បង់ជីវិត និងជាង 180 នាក់រងរបួស។
ទ្វីបអឺរ៉ុប រងការវាយប្រហារពីកម្ដៅដ៏ខ្លាំងក្លា
ទ្វីបអឺរ៉ុប ឆ្លងកាត់រដូវក្ដៅដែលមានសីតុណ្ហភាពខ្ពស់បំផុតរាប់ចាប់តាំងពីពេលចាប់ផ្ដើមកត់ត្រាទិន្នន័យរហូតដល់បច្ចុប្បន្ន។ សីតុណ្ហភាពមធ្យមក្នុងរដូវក្ដៅឆ្នាំនេះនៅ អឺរ៉ុប ខ្ពស់ជាង 2 អង្សាសេ បើធៀបនឹងដំណាក់កាលពីឆ្នាំ 1991 ដល់ 2020។ រលកកម្ដៅនេះ គឺជាមូលហេតុដែលនាំឱ្យពិភពលោកទាំងមូល ចាប់ផ្ដើមគិតដល់ដំណោះស្រាយទាក់ទិននឹងអាកាសធាតុ ពិសេសគឺជាបំភាយឧស្ម័នផ្ទះកញ្ចក់ដែលជាដើមហេតុនាំឱ្យផែនដីឡើងកម្ដៅខ្ពស់៕