មហាសេដ្ឋី Yusaku Maezawa កាលពីថ្ងៃទី 08 ធ្នូ បានប្រកាសឈ្មោះសមាជិកក្រុមហោះហើរ 8 នាក់ ក្នុងនោះមានទាំងតារាចម្រៀងរ៉ែប T.O.P របស់ក្រុម Big Bang ផងដែរ ដែលនឹងរួមដំណើរជាមួយគាត់ ហោះទៅគោចរជុំវិញឋានព្រះចន្ទនៅឆ្នាំ 2023។
គម្រោងដំណើរទេសចរណ៍ជុំវិញឋានព្រះចន្ទរបស់ Maezawa ដែលមានឈ្មោះថា DearMoon ត្រូវបានប្រកាសជាលើកដំបូងកាលពីឆ្នាំ 2018 និងយកសិល្បករជាចំណុចកណ្ដាល។ ដំបូង មហាសេដ្ឋីជប៉ុន គ្រោងអញ្ជើញមនុស្សដែលគាត់ចង់ធ្វើដំណើរជាមួយ ប៉ុន្តែក្រោយមកក៏បានប្ដូរផ្លាស់ទៅជាការប្រកួតប្រជែងមួយដែលបេក្ខជនអាចចុះឈ្មោះតាមអនឡាញ។ Maezawa នឹងចេញថ្លៃទាំងស្រុងសម្រាប់ក្រុមហោះហើរនេះ។
បេក្ខជនទាំង 8 នាក់ដែលត្រូវបានជ្រើសរើសរួមមាន DJ និងជាអ្នកផលិតចម្រៀងរាំអេឡិចត្រូនិច Steve Aoki របស់ សហរដ្ឋអាម៉េរិក, Youtuber ជនជាតិអាម៉េរិក Tim Dodd, សិល្បករ និងអ្នកបង្កើតក្បាច់រាំជនជាតិឆែក Yemi AD, ជាងថតរូបជនជាតិអអៀរឡង់ Rhiannon Adam, ជាងថតរូបជនជាតិអង់គ្លេស Karim Iliya, ផលិតករភាពយន្តជនជាតិអាម៉េរិក Brendan Hall, តារាសម្ដែងជនជាតិឥណ្ឌា Dev Joshi និងតារាចម្រៀងរ៉ែប T.O.P របស់ក្រុមចម្រៀងកូរ៉េខាងត្បូង Big Bang។
យោងតាមទិន្នន័យលើទំព័រ DearMoon ដំណើរហោះហើរតាមយានអវកាស Starship ដែលកំពុងត្រូវបានអភិវឌ្ឍរបស់ SpaceX នេះ នឹងអូសបន្លាយពេលជិត 6 ថ្ងៃ និងគោចរជុំវិញព្រះចន្ទ ដោយមិនមានការចុះចត។ នៅពេលផលិតរួចរាល់ Starship នឹងក្លាយជារ៉ុក្កែតដែលមានកម្លាំងខ្លាំងបំផុតនៅលើពិភពលោក។
កាលពីខែធ្នូឆ្នាំកន្លង មហាសេដ្ឋីជប៉ុន Maezawa ស្ថាបនិករបស់មជ្ឈមណ្ឌលទិញដូរសម្លៀកបំពាក់អនឡាញធំបំផុតនៅ ជប៉ុន បានហោះទៅកាន់ស្ថានីយអវកាសអន្តរជាតិ ក្នុងរយៈពេលខ្លី ជាមួយនឹងអ្នកផលិតវីដេអូរបស់គាត់គឺ Yozo Hirano រួមនឹងក្រុមអវកាសចរជនជាតិរុស្ស៊ី តាមរយៈយានអវកាស Soyuz។ ថ្លៃសម្រាប់ដំណើរហោះហើរនេះគឺប្រហែល 73 លានដុល្លារអាម៉េរិក៕