មេដឹកនាំកូរ៉េខាងជើង លោក គីម ជុងអុន រួមនឹងកូនស្រី ចូលរួមពិធីបាញ់មីស៊ីលប្លោង Hwasong-17 នេះបើតាមទីភ្នាក់ងារសារព័ត៌មាន KCNA។
នៅថ្ងៃទី 19 វិច្ឆិកានេះ ទីភ្នាក់ងារសារព័ត៌មាន KCNA បានប្រកាសថា កូរ៉េខាងជើង បានបាញ់មីស៊ីលអន្តរទ្វីប (ICBM) Hwasong-17 កាលពីថ្ងៃទី 18 វិច្ឆិកា។ រូបថតដែលប្រកាសដោយ KCNA បង្ហាញថា លោក គីម ជុងអុន រួមនឹងភរិយា និងកូនស្រី បង្ហាញខ្លួននៅក្នុងទីបញ្ជាការក្បែរតំបន់បាញ់មីស៊ីល។
រូបថតមួយសន្លឹកទៀតបង្ហាញថា កូនស្រីរបស់លោក គីម ជុងអុន ពាក់អាវក្រៅពណ៌ស កាន់ដៃឪពុកដើរនៅលើទីលានបាញ់មីស៊ីល ហើយនៅខាងក្រោយគឺជាមីស៊ីល Hwasong-17 ដែលស្ថិតក្នុងស្ថានភាពត្រៀមខ្លួនរួចរាល់សម្រាប់ការបាញ់។ កូរ៉េខាងជើង មិនទាន់បង្ហើបឱ្យដឹងអំពីឈ្មោះរបស់កូនស្រីលោក គីម ជុងអុន នេះនៅឡើយ។
សារព័ត៌មាន Reuters អះអាងថា នេះគឺជាលើកដំបូងហើយដែលលោក គីម ជុងអុន នឹងកូនស្រី ទៅកាន់ទីតាំងបាញ់សាកល្បងមីស៊ីលរបស់ កូរ៉េខាងជើង។
ក្រុមអ្នកជំនាញរបស់លោកខាងលិច ជឿថា លោក គីម ជុងអុន មានកូន 3 នាក់ រួមមានកូនស្រី 2 នាក់ និងកូនប្រុសម្នាក់។
អតីតកីឡាករបាល់បោះអាម៉េរិក Dennis Rodman កាលពីឆ្នាំ 2013 បានឱ្យដឹងថា លោក គីម ជុងអុន មានកូនស្រីម្នាក់ឈ្មោះ Ju-ae ហើយគាត់ក៏ធ្លាប់បានបីកុមារីនេះពេលទៅលេង កូរ៉េខាងជើង។ អ្នកជំនាញ Madden យល់ថា Ju-ae ដែលមានអាយុប្រហែល 12 ទៅ 13 ឆ្នាំនេះ នឹងចូលសាកលវិទ្យាល័យ ឬចូលបម្រើកងទ័ពនៅ 4 ទៅ 5 ឆ្នាំខាងមុខ៕
