ក្រុមអ្នកវិទ្យាសាស្ត្របានរកឃើញប្រហោងខ្មៅមួយដែលធំជាងព្រះអាទិត្យ ១២ ដង ស្ថិតនៅចម្ងាយ ១៥៥០ ឆ្នាំពន្លឺពីផែនដី ដែល ១ ឆ្នាំពន្លឺស្មើនឹង ៩៤៦១ ទ្រីលានគីឡូម៉ែត្រ។
ដើម្បីឱ្យដឹងថា មានប្រហោងខ្មៅប៉ុន្មានដែលកំពុងលាក់ខ្លួនក្នុងចក្រវាល អ្នកវិទ្យាសាស្ត្រមួយក្រុមបានពិនិត្យមើលទិន្នន័យប្រព័ន្ធផ្កាយភ្លោះជិត ២ សែន ដែលត្រូវបានរកឃើញដោយបេសកកម្ម Gaia។ ក្នុងចំណោមនោះ ពួកគេស្វែងយល់អំពីសញ្ញារបស់ផ្កាយដែលវិលជុំវិញវត្ថុខ្នាតយក្សដែលមិនអាចមើលឃើញ។
ប្រហោងខ្មៅ (Black Hole) គឺជាវត្ថុអវកាសដែលងងឹតសូន្យសុង សូម្បីតែពន្លឺក៏មិនអាចរត់គេចបាន។ ពួកវាត្រូវបានគេដឹងតាមរយៈពន្លឺខ្លះដែលបញ្ចេញនៅពេលស្រូបយកឧស្ម័ន ធូលី ឬលេបផ្កាយ ឬមួយការប៉ះទង្គិចនឹងគ្នាប៉ុណ្ណោះ។
យោងតាមបណ្ឌិត Sukanya Chakrabarti ប្រធានក្រុមស្រាវជ្រាវ បេក្ខភាពប្រហោងខ្មៅដែលមានសក្ដានុពលបំផុតត្រូវបានស្រាវជ្រាវស៊ីជម្រៅតាមរយៈការវាស់ស្ទង់វិសាលគមពន្លឺរបស់ផ្កាយ ដោយប្រើប្រាស់ឧបករណ៍វិទ្យាសាស្ត្រជាច្រើន។ បើសិនមានប្រហោងខ្មៅមួយនៅទីនោះ ក្រុមស្រាវជ្រាវអាចរកឃើញវាដោយមើលទៅលើកម្លាំងទំនាញរបស់ប្រហោងខ្មៅទៅលើវិសាលគមពន្លឺរបស់ផ្កាយដែលស្ថិតនៅលើគន្លងគោចរ។ ដោយប្រើវិធីសាស្ត្រនេះ ក្រុមខាងលើយកចិត្តទុកដាក់ជាពិសេសទៅលើផ្កាយមួយដួងដែលតូចជាងព្រះអាទិត្យ និងវិលជុំវិញវត្ថុអវកាសងងឹតមួយដែលធំជាង ១២ ដង ធៀបនឹងព្រះអាទិត្យ។ ផ្កាយនេះបញ្ចប់គន្លងគោចរមួយជុំរបស់វាដោយចំណាយពេល ១៨៥ ថ្ងៃ។
«កម្លាំងទំនាញរបស់ប្រហោងខ្មៅទៅលើផ្កាយដែលអាចមើលឃើញ អាចកំណត់បានពីលទ្ធផលវាស់ស្ទង់វិសាលគមពន្លឺ» Chakrabarti ឱ្យដឹងដូច្នេះ។ «តាមរយៈការវិភាគលើល្បឿនរបស់ផ្កាយ យើងអាចសន្និដ្ឋានបាននូវទំហំរបស់ប្រហោងខ្មៅដែលគោចរជាមួយគ្នា និងពេលវេលាវិលជុំវិញគន្លងគោចរ»។
ក្រុមស្រាវជ្រាវខាងលើបានគណនាឃើញថា ប្រហោងខ្មៅដែលទើបរកឃើញនេះមានចម្ងាយពីផែនដីប្រមាណ ១៥៥០ ឆ្នាំពន្លឺ ប៉ុន្តែ មិនទាន់ត្រូវបានបញ្ជាក់ថាជាប្រហោងខ្មៅនៅឡើយ។ Chakrabarti និងសហការី បានផ្ញើលទ្ធផលនៃការស្រាវជ្រាវនេះទៅឱ្យទស្សនាវដ្ដី Astrophysical Journal ដើម្បីចុះផ្សាយ៕