វិទ្យាស្ថានស្រាវជ្រាវមួយរបស់ សហរដ្ឋអាម៉េរិក ថ្មីៗនេះបានអះអាងថា កម្លាំងទ័ពរបស់ប្រទេសនេះស្ថិតនៅក្នុងលំដាប់ «ខ្សោយ» ដោយមានហានិភ័យមិនអាចទប់ទល់នឹងសង្គ្រាមទ្រង់ទ្រាយធំពីរក្នុងពេលតែមួយ។
មូលនិធិបេតិកភណ្ឌ ដែលជាវិទ្យាស្ថានស្រាវជ្រាវមួយត្រូវបានបង្កើតឡើងកាលពីឆ្នាំ ១៩៧៣ នៅ វ៉ាស៊ីងតោន នៅក្នុងរបាយការណ៍ដែលមានចំណងជើងថា សន្ទស្សន៍កម្លាំងទ័ពអាម៉េរិក ដែលត្រូវបានប្រកាសកាលពីថ្ងៃទី ១៨ តុលា បានអះអាងថា កងទ័ពប្រទេសនេះ «ខ្សោយជាង បើធៀបនឹងដែលកម្លាំងត្រូវការចាំបាច់ដើម្បីការពារផលប្រយោជន៍ជាតិនៅលើឆាកអន្តរជាតិ»។
យោងតាមការវាយតម្លៃរបស់ មូលនិធិបេតិកភណ្ឌ ក្រោយរយៈពេលច្រើនឆ្នាំដែលត្រូវបានកាត់បន្ថយថវិកា និងការកំណត់អាទិភាពមិនបានត្រឹមត្រូវក្នុងការវិនិយោគ កម្លាំងទ័ពបច្ចុប្បន្នរបស់ សហរដ្ឋអាម៉េរិក មានហានិភ័យ «មិនអាចឆ្លើយតបទៅនឹងតម្រូវការរបស់សង្គ្រាមទ្រង់ទ្រាយធំក្នុងតំបន់»។
«កងទ័ពអាម៉េរិក ប្រាកដជាមិនមានសម្ភារគ្រប់គ្រាន់ដើម្បីទប់ទល់នឹងជម្លោះប្រដាប់អាវុធធំៗពីរដែលកើតឡើងដំណាលគ្នា» របាយការណ៍មានឃ្លាសរសេរដូច្នេះ។ «ជារួម អំណាចកងទ័ពអាម៉េរិក បច្ចុប្បន្នអាចត្រូវបានវាយតម្លៃថាខ្សោយ»។
របាយការណ៍របស់មូលនិធិបេតិកភណ្ឌ បានចាត់ចំណាត់ថ្នាក់កងទ័ពម៉ារីន និងកងកម្លាំងនុយក្លេអែររបស់ សហរដ្ឋអាម៉េរិក ទៅក្នុងលំដាប់ «ខ្លាំង» ជាលំដាប់ខ្ពស់ជាងគេទីពីរក្នុងចំណោម ៥ ថ្នាក់។ កងទ័ពជើងគោកអាម៉េរិក ត្រូវបានវាយតម្លៃថា មានកម្លាំង «មធ្យម» ខណៈដែលទ័ពជើងទឹក និងកងកម្លាំងអវកាស ស្ថិតក្នុងលំដាប់ «ខ្សោយ»។ ចំណែកទ័ពអាកាសវិញ ត្រូវបានចាត់ទុកថា «ខ្សោយណាស់» ដែលជាកម្រិតទាបបំផុតនៅក្នុងតារាងចំណាត់ថ្នាក់។ ពុំមានអង្គភាពទ័ពណាមួយរបស់ សហរដ្ឋអាម៉េរិក ត្រូវបានវាយតម្លៃថា «ខ្លាំងណាស់» នោះទេនៅក្នុងរបាយការណ៍របស់វិទ្យាស្ថាននេះ៕