ប្រធានាធិបតីបារាំង ម៉ាក្រុង កោះប្រជុំជាមួយនឹងក្រុមរដ្ឋមន្ត្រីដើម្បីដោះស្រាយបញ្ហាកូដកម្មដែលចេះតែរីកធំឡើង និងកំពុងតែបង្កើតឱ្យមានវិបត្តិថាមពលនៅប្រទេសនេះ។
ប្រធានាធិបតី អេម៉ានុយអែល ម៉ាក្រុង កាលពីម្សិលមិញ បានឱ្យដឹងថា លោកចង់ស្វែងរកដំណោះស្រាយ «លឿនបំផុតតាមដែលអាចធ្វើទៅបាន» ដើម្បីដោះស្រាយបញ្ហាបាតុកម្មនាបច្ចុប្បន្ន និងសន្យាថាប្រឹងប្រែងអស់ពីសមត្ថភាព នេះបើតាមទូរទស្សន៍បារាំង BFM TV។
រដ្ឋាភិបាលបារាំង ស្នើឱ្យកូដករដែលធ្វើកូដកម្មនៅឯឃ្លាំងឥន្ធនៈ ២ កន្លែងនៅក្នុងតំបន់ Feyzin ក្បែរទីក្រុង Lyon ត្រលប់ចូលធ្វើការ មិនដូច្នោះនឹងត្រូវប្រឈមនឹងការចោទប្រកាន់ទោសព្រហ្មទណ្ឌ នេះបើតាមការព្រមានរបស់ រដ្ឋមន្ត្រីក្រសួងថាមពលបារាំង Agnes Pannier-Runacher។
ស្ថានភាពកូដកម្មនៅមូលដ្ឋានចម្រាញ់ប្រេងរបស់ ExxonMobil និង TotalEnergies បានអូសបន្លាយពេលអស់ជាច្រើនសប្ដាហ៍មកហើយ ធ្វើឱ្យប្រភពផ្គត់ផ្គង់សម្រាប់ស្ថានីយប្រេងសាំងរាប់ពាន់នៅ ប្រទេសបារាំង ត្រូវរអាក់រអួល។ ក្រុមសហជីពបានស្នើឱ្យដំឡើងប្រាក់ខែជូនដល់កម្មករដើម្បីដោះស្រាយជីវភាពដែលកំពុងប្រឈមនឹងបញ្ហាអតិផរណា។
បុគ្គលិករបស់ ExxonMobil បានផ្អាកការធ្វើកូដកម្មនៅរោងចក្រចម្រាញ់ប្រេង Fos-sur-Mer និងឃ្លាំងប្រេងនៅភាគខាងត្បូងប្រទេសបារាំង កាលពីចុងសប្ដាហ៍កន្លង ក្រោយពីមានការចរចាអំពីប្រាក់ខែ។ ប៉ុន្តែស្ថានភាពកូដកម្មនៅតែបន្តកើតមាននៅឯរោងចក្រចម្រាញ់ប្រេងរបស់ TotalEnergies។
