អាជ្ញាធរបេឡារុស បានប្រកាសអំពីរឿងកងទ័ពរបស់ រុស្ស៊ី ដែលបញ្ជូនមកកាន់ប្រទេសនេះ ហើយ រុស្ស៊ី និង បេឡារុស នឹងធ្វើសមយុទ្ធបាញ់គ្រាប់ពិតនៅក្នុងតំបន់ហ្វឹកហ្វឺនជាច្រើន។
«ទាហានរុស្ស៊ី សរុប ដែលនឹងត្រូវបញ្ជូនមកកាន់ បេឡារុស គឺ ៩,០០០ នាក់។ ប្រទេសនេះក៏នឹងបញ្ជូនរថក្រោះប្រហែល ១៧០, រថពាសដែកច្រើនប្រភេទចំនួន ២០០ គ្រឿង រួមនឹងកាំភ្លើងធំ និងកាំភ្លើងត្បាល់កាណុងចាប់ពី ១០០ មម ចំនួន ១០០ ដើមផងដែរ» ជំនួយការរដ្ឋមន្ត្រីការពារជាតិបេឡារុស ទទួលបន្ទុកកិច្ចសហប្រតិបត្តិការយោធាអន្តរជាតិ Valery Revenko បាននិយាយកាលពីថ្ងៃទី ១៧ តុលាដូច្នេះ។
អង្គភាពរួមរបស់ រុស្ស៊ី និង បេឡារុស (Belarus) នឹងទៅកាន់ ៤ តំបន់ហ្វឹកហ្វឺននៅភាគខាងកើត និងភាគកណ្ដាលរបស់ប្រទេសបេឡេរុស ដើម្បីធ្វើសមយុទ្ធ។
លោក Valery Revenko ឱ្យដឹងថា «ខ្លឹមសារសំខាន់នឹងជាការហ្វឹកហាត់ផ្នែកយុទ្ធសាស្ត្រ ក្នុងនោះក៏មានការបាញ់គ្រាប់ពិត និងបាញ់ប្លោងមីស៊ីលការពារដែនអាកាស ក៏ដូចជាការប្រើប្រាស់សម្ភារយោធា»។ លោក Valery Revenko សង្កត់ធ្ងន់ថា កងកម្លាំងរបស់ រុស្ស៊ី ដែលបោះទ័ពនៅ បេឡេរុស គ្រាន់តែជាការបង្ការ និងជួយការពារព្រំដែនរបស់ បេឡារុស តែប៉ុណ្ណោះ។
បេឡារុស គឺជាសម្ព័ន្ធមិត្តជិតស្និទ្ធរបស់ រុស្ស៊ី និងបានអនុញ្ញាតឱ្យ កងកម្លាំងរុស្ស៊ី ប្រើប្រាស់ទឹកដីដើម្បីសម្រុកចូលទៅកាន់ អ៊ុយក្រែន។ បេឡារុស ក៏ត្រូវបានសង្ស័យថា បានអនុញ្ញាតឱ្យ រុស្ស៊ី ប្រើប្រាស់ដែនអាកាសដើម្បីបាញ់មីស៊ីលចូលទឹកដីរបស់ អ៊ុយក្រែន ផងដែរ៕