យន្តហោះចម្បាំង Su-34 របស់ រុស្ស៊ី បានបន្ទាបខ្លួនយ៉ាងលឿន នាំឱ្យក្រុមអ្នកបើកបរចុចប្លោងកៅអីរំដោះខ្លួនតែប៉ុន្មាននាទីប៉ុណ្ណោះមុនពេលយន្តហោះធ្លាក់ចំអគារស្នាក់នៅក្នុងទីក្រុង Yeysk។
រូបភាពពីកាមេរ៉ាសន្តិសុខដែលត្រូវបានចែករំលែកលើបណ្ដាញសង្គមរុស្ស៊ី នាថ្ងៃនេះបានបង្ហាញអំពីវិនាទីចុងក្រោយ មុនពេលយន្តហោះចម្បាំង Su-34 ធ្លាក់ចំអគារស្នាក់នៅដែលមានកម្ពស់ ៩ ជាន់ នៅឯទីក្រុង Yeysk ភាគនិរតីនៃប្រទេសរុស្ស៊ី បណ្ដាលឱ្យមនុស្ស ៦ នាក់បាត់បង់ជីវិត។
ក្នុងវីដេអូ យន្តហោះ Su-34 ហោះក្នុងល្បឿនលឿន និងបន្ទាបខ្លួនចុះយ៉ាងលឿន មុនពេលមានដុំភ្លើងចំនួន ២ នៅលើអាកាស ដែលនេះទំនងជាក្រុមអ្នកបើកបរចុចកៅអីប្លោងរំដោះខ្លួន។ ប៉ុន្មានវិនាទីក្រោយ យន្តហោះក៏ធ្លាក់ចំតំបន់អគារស្នាក់នៅ និងបង្កើតបានជាអណ្ដាតភ្លើងសន្ធោសន្ធៅ។
អាជ្ញាធរក្រុងបានឱ្យដឹងថា អគ្គិភ័យត្រូវបានគ្រប់គ្រងក្រោយរយៈពេលជាង ៣ ម៉ោង។ ក្រៅពីជនរងគ្រោះដែលបានស្លាប់ នៅមាន ៦ នាក់ទៀតបាត់ខ្លួន និង ១៩ នាក់ត្រូវរងរបួស ខណៈ ២៥០ នាក់ផ្សេងទៀតត្រូវឈ្លៀសចេញពីតំបន់កើតហេតុ។
ក្រសួងការពារជាតិរុស្ស៊ី ប្រកាសថា Su-34 ជួបគ្រោះថ្នាក់នៅ Yeysk នៅពេលហោះហើរហ្វឹកហាត់ ហើយក្រុមអ្នកបើកបរបានចុចកៅអីប្លោងរំដោះខ្លួន។ ស្ថាបនានេះក្រោយមកបានឱ្យដឹងថា ម៉ាស៊ីនរបស់យន្តហោះត្រូវឆេះពេលហោះពីមូលដ្ឋានទ័ពនៅភាគខាងត្បូងប្រទេស។
