ណាតូ បើកដំណើរការសមយុទ្ធកំញើញផ្នែកនុយក្លេអែរប្រចាំឆ្នាំនៅ អឺរ៉ុបខាងកើត ក្នុងគ្រាដែលភាពតានតឹងជាមួយនឹង រុស្ស៊ី កំពុងមានការកើនឡើង ដោយសារសង្គ្រាមនៅ អ៊ុយក្រែន។
អង្គការសន្ធិសញ្ញាអាត្លង់ទិកខាងជើង (NATO) ថ្ងៃនេះបានចាប់ផ្ដើមសមយុទ្ធនុយក្លេអែរប្រចាំឆ្នាំ «Steadfast Noon» ដោយបានសង្កត់ធ្ងន់ថា នេះគឺជា «សកម្មភាពហ្វឹកហ្វឺនជាទៀងទាត់ ជាប្រចាំ» ដែលត្រូវបានរៀបផែនការមុនពេល រុស្ស៊ី បើកយុទ្ធនាការយោធានៅ អ៊ុយក្រែន និងមិនទាន់ទងនឹងស្ថានការណ៍បច្ចុប្បន្ន។ សមយុទ្ធនេះមានការចូលរួមរបស់ប្រទេសចំនួន ១៤ ក្នុងចំណោមសមាជិក ៣០ ប្រទេសរបស់ ណាតូ។
សមយុទ្ធនុយក្លេអែរនេះនឹងត្រូវបានធ្វើឡើងរហូតដល់ថ្ងៃទី ៣០ តុលា ដោយមានវត្តមានរបស់យន្តហោះទម្លាក់គ្រាប់បែក B-52 របស់ សហរដ្ឋអាម៉េរិក ផងដែរ។ យន្តហោះសរុបចំនួន ៦០ គ្រឿងនឹងចូលរួមហោះហើរពីលើ ប្រទេសបែលហ្ស៊ិក អង់គ្លេស និងសមុទ្រខាងជើង (North Sea) ដើម្បីហ្វឹកហាត់ការប្រើប្រាស់អាវុធនុយក្លេអែរ ដែល សហរដ្ឋអាម៉េរិក បានដាក់ពង្រាយនៅ អឺរ៉ុប។
ណាតូ ឱ្យដឹងថា នឹងមិនមានការប្រើប្រាស់គ្រាប់បែកនុយក្លេអែរពិត នៅក្នុងសមយុទ្ធនេះ។ «សមយុទ្ធធ្វើឡើងដើម្បីធានាថា សកម្មភាពកំញើញផ្នែកនុយក្លេអែររបស់សម្ព័ន្ធមិត្ត នៅតែសុវត្ថិភាព មានការធានា និងមានប្រសិទ្ធភាព» អ្នកនាំពាក្យរបស់ ណាតូ Oana Lungescu ឱ្យដឹងដូច្នេះ។
សមយុទ្ធរបស់ ណាតូ ត្រូវបានធ្វើឡើងក្នុងគ្រាដែលមានការបារម្ភអំពីលទ្ធភាពដែល រុស្ស៊ី អាចប្រើប្រាស់អាវុធនុយក្លេអែរ នៅ អ៊ុយក្រែន ក្រោយពី ប្រធានាធិបតី ពូទីន កាលពីខែមុន បាននិយាយថា មូស្គូ អាចប្រើប្រាស់គ្រប់មធ្យោបាយដែលមាន រួមទាំងប្រភេទអាវុធដែលមានកម្រិតនៃការប្រល័យខុសៗគ្នា ដើម្បីការពារបូរណភាពទឹកដីរបស់ខ្លួន៕
