ឯកអគ្គរដ្ឋទូតចិនប្រចាំសហរដ្ឋអាម៉េរិក បានអរគុណចំពោះលោក អ៊ីឡុន ម៉ាស ព្រោះតែបានលើកសំណើដោះស្រាយបញ្ហាតានតឹងរវាង ចិនដីគោក និង ចិនតៃវ៉ាន់ ខណៈដែល ទីក្រុងតៃប៉ិ ធ្វើការរិះគន់មហាសេដ្ឋីរូបនេះ។
«ខ្ញុំចង់អរគុណលោក អ៊ីឡុន ម៉ាស ចំពោះការអំពាវនាវរកសន្តិភាពនៅច្រកសមុទ្រតៃវ៉ាន់ និងគំនិតរបស់គាត់ស្ដីពីការបង្កើតគោលការណ៍តំបន់រដ្ឋបាលពិសេសសម្រាប់កោះ» ឯកអគ្គរដ្ឋទូតចិនប្រចាំសហរដ្ឋអាម៉េរិក Qin Gang សរសេរលើ Twitter កាលពិថ្ងៃទី ០៨ តុលា។
លោក Qin Gang លើកឡើងដូច្នេះបន្ទាប់ពីមហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស (Elon Musk) កាលពីថ្ងៃទី ០៧ តុលា យល់ថា ភាពតានតឹងរវាង ចិនដីគោក និង ចិនតៃវ៉ាន់ អាចត្រូវបានដោះស្រាយ បើសិន តៃវ៉ាន់ ប្រគល់អំណាចមួយចំនួនឱ្យ ទីក្រុងប៉េកាំង។ យោងតាមលោក ម៉ាស ដំណោះស្រាយនេះពិតជាអាចទៅរួច ហើយភាគីទាំងពីរអាចមានកិច្ចព្រមព្រៀង «ទន់ភ្លន់» ជាង ធៀបនឹង ហុងកុង។
«ឯកភាពសន្តិភាព និង “ប្រទេសមួយរបបពីរ” គឺជាគោលការណ៍មូលដ្ឋានរបស់យើងនៅក្នុងបញ្ហាតៃវ៉ាន់ ជាវិធីដោះស្រាយល្អបំផុតដើម្បីអនុវត្តឯកភាពសន្តិភាព» លោក Qin Gang បន្ថែមដូច្នេះ។ «ឱ្យតែផលប្រយោជន៍ស្ដីពីសន្តិសុខ អធិប្បតេយ្យ និងការរីកចម្រើនរបស់ ប្រទេសចិន ត្រូវបានធានា ក្រោយពីការបង្រួបបង្រួមឡើងវិញ តៃវ៉ាន់ នឹងមានទទួលបានស្វ័យភាពខ្ពស់ និងបរិយាកាសធំទូលាយសម្រាប់ការរីកច្រើន»។
Hsiao Bi-Khim តំណាងរបស់ កោះតៃវ៉ាន់ នៅ សហរដ្ឋអាម៉េរិក បានរិះគន់លោក ម៉ាស ដោយយល់ថា «សេរីភាព និងប្រជាធិបតេយ្យរបស់កោះនេះ មិនមែនសម្រាប់លក់ឡើយ»។
«រាល់សំណើដែលមានលក្ខណៈយូរអង្វែងសម្រាប់អនាគតរបស់យើង គឺត្រូវតែសម្រេចដោយសន្តិភាព មិនត្រូវបង្ខិតបង្ខំ ហើយគោរពចំពោះបំណងប្រាថ្នាលើប្រជាធិបតេយ្យរបស់ប្រជាជនតៃវ៉ាន់» លោកស្រី Hsiao បញ្ជាក់។
អាជ្ញាធរចិនដីគោក តែងចាត់ទុក កោះតៃវ៉ាន់ ជាខេត្តមួយរបស់ខ្លួនដែលរង់ចាំតែការបង្រួបបង្រួមប៉ុណ្ណោះ ហើយប្រកាសថា នឹងប្រើកម្លាំងបាយបើសិនជាចាំបាច់។ ប្រទេសចិន ធ្លាប់លើកសំណើរូបមន្ត «ប្រទេសមួយ របបពីរ» ដូចទៅនឹង ហុងកុង ប៉ុន្តែត្រូវបាន អាជ្ញាធរតៃវ៉ាន់ បដិសេធ និងទទួលបានការគាំទ្រតិចតួច ពិសេសគឺនៅក្រោយពេល ទីក្រុងប៉េកាំង បានប្រើប្រាស់ច្បាប់សន្តិសុខជាតិទៅលើ ហុងកុង កាលពីឆ្នាំ ២០២០។
លោក អ៊ីឡុន ម៉ាស មុននោះក៏ធ្លាប់បានលើកឡើងដំណោះស្រាយសម្រាប់ការបញ្ចប់សង្គ្រាមរវាង រុស្ស៊ី និង អ៊ុយក្រែន ផងដែរ ដោយលោកបានស្នើឱ្យ ទីក្រុងកៀវ ធ្វើសម្បទាន ឧបទ្វីបគ្រីមៀ (Crimea) ទៅឱ្យ ទីក្រុងមូស្គូ និងធ្វើប្រជាមតិឡើងវិញក្រោមការគ្រប់គ្រងរបស់ អង្គការសហប្រជាជាតិ ចំពោះ ៤ ខេត្តរបស់ អ៊ុយក្រែន ដែលទើបត្រូវបាន រុស្ស៊ី រឹបអូស ហើយ អ៊ុយក្រែន ត្រូវតែរក្សាអព្យាក្រឹតភាពផ្នែកនយោបាយការបរទេស។ សំណើនេះរបស់លោក ម៉ាស បានរងការរិះគន់យ៉ាងធ្ងន់ធ្ងរ។
លោក អ៊ីឡុន ម៉ាស (Elon Musk) បច្ចុប្បន្នគឺជាមហាសេដ្ឋីលំដាប់លេខ ១ ក្នុងពិភពលោក ដោយមានទ្រព្យជាង ២២០ ពាន់លានដុល្លារអាម៉េរិក នេះបើតាមតារាងចំណាត់ថ្នាក់មហាសេដ្ឋីរបស់ទស្សនាវដ្ដីពាណិជ្ជកម្ម Forbes៕
