មហាសេដ្ឋី អ៊ីឡុន ម៉ាស យល់ថា ភាពតានតឹងរវាង ចិនដីគោក និង កោះតៃវ៉ាន់ អាចត្រូវបានដោះស្រាយ បើសិនកោះនេះប្រគល់សិទ្ធិគ្រប់គ្រងមួយចំនួនទៅឱ្យ ទីក្រុងប៉េកាំង។
«អាចរកឃើញរូបមន្តតំបន់រដ្ឋបាលពិសេសសម្រាប់ តៃវ៉ាន់។ នោះគឺជាសំណើសមស្រប ប៉ុន្តែមិនអាចបំពេញចិត្តគ្រប់គ្នា» មហាសេដ្ឋីលំដាប់លេខ ១ ពិភពលោកលោក អ៊ីឡុន ម៉ាស ឆ្លើយតបនឹងសំណួរស្ដីពីស្ថានការណ៍ចិន របស់ Financial Times ក្នុងកិច្ចសម្ភាសដែលបានផ្សាយកាលពីថ្ងៃទី ០៧ តុលា។
យោងតាមលោក ម៉ាស ដំណោះស្រាយនេះអាចទៅរួច ហើយភាគីទាំងពីរអាចមានកិច្ចព្រមព្រៀង «ធូរស្រាល» ជាង បើធៀបនឹងករណី ហុងកុង។
លោក ម៉ាស យល់ថា «ស្ថានការណ៍ជម្លោះទាក់ទងនឹង តៃវ៉ាន់ គឺជារឿងមិនអាចគេចផុត» ប៉ុន្តែ លោកមិនបានបកស្រាយលម្អិត។ លោក ម៉ាស ព្រមានថា សេណារីយ៉ូនោះនឹងបង្កផលប៉ះពាល់ធំធេងដល់ក្រុមហ៊ុន Tesla របស់លោក រួមនឹងបណ្ដាក្រុមហ៊ុនអាម៉េរិក និងខឿនសេដ្ឋកិច្ចនានាក្នុងពិភពលោក។
ក្រុមហ៊ុនផលិតរថយន្តអគ្គិសនី Tesla របស់មហាសេដ្ឋី អ៊ីឡុន ម៉ាស កំពុងដំណើរការរោងចក្រធំមួយនៅ ទីក្រុងសៀងហៃ ប្រទេសចិន។ ឆ្នាំ ២០២១ រោងចក្រនេះផលិតរថយន្តអគ្គសនីប្រមាណពាក់កណ្ដាល ធៀបនឹងបរិមាណរថយន្ត Tesla សរុបដែលត្រូវបានប្រគល់ដល់ដៃអតិថិជននៅទូទាំងពិភពលោក។
សំណើថ្មីនេះរបស់លោក អ៊ីឡុន ម៉ាស ត្រូវបានលើកឡើងក្រោយពីលោកបានស្នើឱ្យ ទីក្រុងកៀវ ធ្វើសម្បទាន ឧបទ្វីបគ្រីមៀ (Crimea) ទៅឱ្យ ទីក្រុងមូស្គូ និងធ្វើប្រជាមតិឡើងវិញក្រោមការគ្រប់គ្រងរបស់ អង្គការសហប្រជាជាតិ ចំពោះ ៤ ខេត្តរបស់ អ៊ុយក្រែន ដែលទើបត្រូវបាន រុស្ស៊ី រឹបអូស ហើយ អ៊ុយក្រែន ត្រូវតែរក្សាអព្យាក្រឹតភាពផ្នែកនយោបាយការបរទេស។ សំណើនេះរបស់លោក ម៉ាស បានរងការរិះគន់យ៉ាងធ្ងន់ធ្ងរ។
លោក អ៊ីឡុន ម៉ាស (Elon Musk) បច្ចុប្បន្នគឺជាមហាសេដ្ឋីលំដាប់លេខ ១ ក្នុងពិភពលោក ដោយមានទ្រព្យជាង ២២០ ពាន់លានដុល្លារអាម៉េរិក នេះបើតាមតារាងចំណាត់ថ្នាក់មហាសេដ្ឋីរបស់ទស្សនាវដ្ដីពាណិជ្ជកម្ម Forbes៕