ប្រទេសរុស្ស៊ី កាលពីថ្ងៃទី ៣០ កញ្ញា បានប្រឆាំងទៅនឹងសេចក្ដីសម្រេចចិត្តរបស់ ក្រុមប្រឹក្សាសន្តិសុខអង្គការសហប្រជាជាតិ ដែលលើកឡើងដោយ សហរដ្ឋអាម៉េរិក និង អាល់បានី ក្នុងតំណងថ្កោលទោសចំពោះទីក្រុងមូស្គូ ទាក់ទិននឹងការរឹបអូសទឹកដី ៤ ខេត្តរបស់ អ៊ុយក្រែន។
មុននោះ ប្រធានាធិបតីរុស្ស៊ី លោក ពូទីន បានប្រកាសអំពីអធិបតេយ្យរបស់ រុស្ស៊ី ចំពោះទឹកដី ៤ ខេត្ត ដែលស្មើនឹង ១៥% នៃទឹកដីរបស់ អ៊ុយក្រែន។ នេះគឺជាករណីរឹបអូសទឹកដីធំបំផុតនៅ អឺរ៉ុប រាប់ចាប់ពីសង្គ្រាមលោកលើកទី២។ បណ្ដាប្រទេសលោកខាងលិច និងសូម្បីតែសម្ព័ន្ធមិត្តជិតស្និទ្ធរបស់ រុស្ស៊ី ក៏បានជំទាស់ទៅនឹងទង្វើរបស់ ទីក្រុងមូស្គូ។
ភ្លាមនោះ តំណាងរបស់ សហរដ្ឋអាម៉េរិក នៅ អង្គការសហប្រជាជាតិ បានដាក់សំណើទៅកាន់ ក្រុមប្រឹក្សាសន្តិសុខនៃ អង្គការសហប្រជាជាតិ អំពាវនាវឱ្យមានការថ្កោលទោស និងមិនត្រូវទទួលស្គាល់រាល់ស្ថានភាពប្រែប្រួលនៅ អ៊ុយក្រែន ហើយបង្ខំឱ្យ រុស្ស៊ី ដកទ័ពចេញពីប្រទេសជិតខាងនេះ។
សមាជិកចំនួន ១០ របស់ ក្រុមប្រឹក្សាសន្តិសុខ បានបោះឆ្នោតគាំទ្រសេចក្ដីសម្រេចចិត្តថ្កោលទោសចំពោះទង្វើរឹបអូសទឹកដីប្រទេសដទៃរបស់ រុស្ស៊ី។ ចំណែក ប្រទេសចិន ប្រទេសហ្កាបុង ឥណ្ឌា និង ប្រេស៊ីល បានបោះឆ្នោតអនុបវាទ។
«ពុំមានប្រទេសណាមួយបោះឆ្នោតសម្រាប់ រុស្ស៊ី។ មិនមានប្រទេសណាទាំងអស់» លោកស្រី Linda Thomas-Greenfield តំណាងរបស់ សហរដ្ឋអាម៉េរិក នៅ អង្គការសហប្រជាជាតិ បានប្រាប់អ្នកយកព័ត៌មានបន្ទាប់ពីកិច្ចប្រជុំរបស់ ក្រុមប្រឹក្សាសន្តិសុខ។ លោកស្រីបន្ថែមថា បណ្ដាប្រទេសដែលបោះឆ្នោតអនុបវាទ «ពិតណាស់ មិនមែនជាការការពារ រុស្ស៊ី ឡើយ»។
លោកស្រី Thomas-Greenfield បញ្ជាក់ថា លោកស្រីនឹងដាក់សេចក្ដីសម្រេចចិត្តនេះឡើងទៅកាន់សន្និបាតអង្គការសហប្រជាជាតិ ដែលមានសមាជិក ១៩៣ ប្រទេស ដើម្បីថ្កោលទោសទង្វើថ្មីបំផុតរបស់ រុស្ស៊ី៕