សហរដ្ឋអាម៉េរិក យល់ថា ការប្រឹងប្រែងចូលជាសមាជិកណាតូ (NATO) របស់ អ៊ុយក្រែន គួរតែធ្វើនៅពេលផ្សេង បន្ទាប់ពីលោក ហ្សេឡែនស្គី ចុះហត្ថលេខាលើពាក្យស្នើសុំចូលជាសមាជិករបស់សម្ព័ន្ធមិត្តយោធានេះ។
«តាមការយល់ឃើញរបស់យើង វិធីល្អបំផុតនាបច្ចុប្បន្នដើម្បីគាំទ្រ អ៊ុយក្រែន នោះគឺការផ្ដល់ជំនួយជាក់ស្ដែង នៅលើភូមិសាស្ត្រជាក់ស្ដែង។ ដំណើរការនៃការចូលជាសមាជិកណាតូ គួរតែត្រូវបានអនុវត្តនៅពេលផ្សេង» ទីប្រឹក្សាសន្តិសុខជាតិអាម៉េរិក Jake Sullivan ថ្លែងកាលពីថ្ងៃទី ៣០ កញ្ញាដូច្នេះ។
ប្រកាសនេះត្រូវបានលោក Sullivan លើកឡើងបន្ទាប់ពី ប្រធានាធិបតីអ៊ុយក្រែន លោក ហ្សេឡែនស្គី បានចុះហត្ថលេខាលើពាក្យស្នើសុំចូលជាសមាជិកណាតូ និងស្នើឱ្យសម្ព័ន្ធយោធានេះប្រញាប់ទទួលយក អ៊ុយក្រែន។ ការសម្រេចចិត្តរបស់ អ៊ុយក្រែន ត្រូវបានគេជឿថា ជាការប្រតិកម្មខ្លាំងក្លាបំផុតរបស់ ទីក្រុងកៀវ ចំពោះទង្វើរឹបអូសទឹកដី ៤ ខេត្តគឺ Donetsk, Lugansk, Zaporizhzhia និង Kherson របស់ អ៊ុយក្រែន ពីសំណាក់លោក ពូទីន។
យោងតាមច្បាប់របស់ ណាតូ បើសិនសំណើរបស់ អ៊ុយក្រែន ត្រូវបានយល់ព្រម នោះមានន័យថា ណាតូ នឹងត្រូវបានអូសឱ្យចូលក្នុងសង្គ្រាមដោយស្វ័យប្រវត្ត និងប្រឈមមុខដោយផ្ទាល់ជាមួយ រុស្ស៊ី ហើយសង្គ្រាមនេះនឹងកាន់តែធំឡើងៗ ដែលអាចនាំទៅរកសង្គ្រាមលោកលើកទី ៣៕
