ប្រធានាធិបតីអ៊ុយក្រែន លោក ហ្សេឡែនស្គី បានចុះហត្ថលេខាលើពាក្យស្នើសុំចូលជាសមាជិកណាតូ (NATO) និងស្នើឱ្យសម្ព័ន្ធយោធានេះប្រញាប់ទទួលយក អ៊ុយក្រែន បន្ទាប់ពី រុស្ស៊ី រឹបអូសទឹកដី ៤ ខេត្តទៀតរបស់ប្រទេសនេះ។
«យើងបានបង្ហាញអំពីសមត្ថភាពរបស់យើងចំពោះស្ដង់ដាររបស់សម្ព័ន្ធមិត្ត។ យើងអនុវត្តជំហានដែលមានលក្ខណៈប្ដូរផ្ដាច់ដោយការចុះហត្ថលេខាសុំចូលជាសមាជិកណាតូ ជាបន្ទាន់» ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី កាលពីថ្ងៃទី ៣០ កញ្ញា បានឱ្យដឹងដូច្នេះ។
ប្រកាសនេះត្រូវបាន ប្រធានាធិបតីអ៊ុយក្រែន លោក ហ្សេឡែនស្គី លើកឡើងបន្ទាប់ពី ប្រធានាធិបតីរុស្ស៊ី លោក ពូទីន ប្រកាសច្របាច់បញ្ចូលទឹកដី ៤ ខេត្ត គឺ Donetsk, Lugansk, Zaporizhzhia និង Kherson របស់ អ៊ុយក្រែន ទៅក្នុង ប្រទេសរុស្ស៊ី។
ក្រោយពីបានចុះហត្ថលេខាទទួលយកទឹកដី ៤ ខេត្តនេះ លោក ពូទីន ក៏បានជំរុញឱ្យ អ៊ុយក្រែន បញ្ឈប់សកម្មភាពយោធា និងត្រលាប់ចូលតុចរចា។
ប៉ុន្តែ លោក ហ្សេឡែនស្គី បានបដិសេធរាល់ការចរចាជាមួយលោក ពូទីន។ «អ៊ុយក្រែន នឹងមិនចរចាអ្វីទាំងអស់ នៅពេលលោក ពូទីន នៅជាប្រធានាធិបតីរបស់ សហព័ន្ធរុស្ស៊ី។ យើងនឹងចរចាជាមួយប្រធានាធិបតីថ្មី» លោក ហ្សឡែនស្គី បញ្ជាក់ដូច្នេះ។
ភាគីរុស្ស៊ី មិនទាន់មានប្រតិកម្មទៅនឹងប្រកាសរបស់ ប្រធានាធិបតីអ៊ុយក្រែន នៅឡើយ។ អគ្គលេខាធិការនៃ អង្គការណាតូ លោក Jens Stoltenberg បានឱ្យដឹងថា ការសម្រេចទទួលយក អ៊ុយក្រែន ជាសមាជិក នឹងត្រូវការការយល់ព្រមពីសមាជិកទាំងអស់នៅក្នុងសម្ព័ន្ធមិត្តយោធានេះ៕
